Былырыын,  куорат икки хаһыаттарын коллективын салалтата уларыйар-тэлэрийэр айдаана журналистар ортолоругар улахан аймалҕаны таһаарбыта. Орто үйэҕэ буорах уонна испиир саҥа сири, саҥа өйү-дууһаны баһылыыр кыахтаах эбит буоллаҕына, билигин буорахтан уонна буоккаттан өйү-санааны сүүйэр саамай көдьүүстээх ньыма биир - БЭЧЭЭТ, а.э. информация, информацияны тиэрдии ньымата. 
Быыбардар быысаһар кэмнэригэр республика бэчээтигэр улахан уларыйыы-тэлэрийии таҕыста. 
Бастатан туран, 2012 сыл, кулун тутар 4 күнүгэр Дьокуускай куорат саҥа мээрдэммитинэн сиэттэрэн, куорат икки хаһыатыгар каадыры уларытыы саҕаламмыта. Саҥа мээр улахан дуоһунаска дураһыйар санаатын киэһээҥҥи хаһыакка биэрбит интервьютуттан истибиппит. Политик салгыы былааска талаһар суолун иһитиннэрэр-биллэрэр тэрилтэ нөҥүө тэлинэрэ биллэр. Ол иһин "Эхо столицы" уонна "Киин куорат" редактордара уларыйыахтаатара сэрэйиллэр этэ.
Юрий Заболев мээрдиирин саҕана анаммыт "Эхо столицы" МУ генеральнай дириэктэрэ Василий Соловьев биир бастакынан ууратыллар. Кини оннугар ыам ыйын 2-гэр Игорь Николаев ананар. "Эхо столицы" кылаабынай редакторын дуоһунаһыгар олорбут Евгений Грибчатов эмиэ Заболев саҕанааҕы киһи буолан дуоһунаһын босхолуохтааҕа эмиэ биллэрэ. Грибчатов "баҕа өттүнэн" сайабылыанньа суруйар уонна тута федеральнай сонуну тарҕатар агенство Саха сиринээҕи салаатыгар редакторынан үлэлии киирэр. Кини оннугар өр кэмҥэ редактор дуоһунаһын  генеральнай дириэктэр Игорь Николаев бэйэтэ тэҥинэн толорор. "Эхо столицы" уонна "Киин куорат" хаһыаттарга үлэлээбит сорох уопуттаах суруналыыстар саҥа салалта политикатын кытары сөпсөспөккө уурайаллар. 
***
Бу күһүн Александр Прокопьев "Эхо столицы" кылаабынай редакторынан ананар. "Киин куорат" редактора Борис Павлов уоппускаттан үлэтигэр тахсыбакка уурайабын диэн коллективыгар этэр. 
***
Саҥа дьыл бырааһынньыгын иннинэ генеральнай дириэктэр Игорь Николаев уоппускаҕа барар уонна... уурайар.
Кини оннугар Александр Прокопьев анаммыт. Оттон "Эхо столицы" редакторынан, бу иннинэ хаһыаттан уурайбыт Олеся Войтович анаммыт. Этэргэ дылы, киһи тылыттан матар...
Оттон "Киин куорат" редакторынан өр сыл үлэлээн баран, саҥа салалтаны кытары сатаспакка хаһыаттан уурайан,  мээрийэ пресс-сулууспатыгар үлэлии барбыт Розалия Томская төттөрү "Киин куоракка" кэлбит.  Томская "Киин куоракка" редакторынан төннүбүтүн араастаан ырыталлар. Журналист редактор дуоһунаһыгар ананыан баҕарбатаҕын этэллэр, "мээрийэ пресс-сулууспата Томскаялаах Войтовичтан аккаастанан, соруйан  редактор оҥоттордо" диэн этээччилэр эмиэ бааллар.
***
Аартык.ру