Саха сирин ыччатын промышленноска киллэрэн үлэлэтии проблемата инньэ 50-с сылтан барар. Ол гынан баран, улаханнык киһи киэн туттардыы кэпсиир түмүкпүт суох. Республикаҕа улахан кэлии хампаанньалартан "АЛРОСАны" таһынан "Сургутнефтегаз", "Мечел", "Полюс Золото" үлэлииллэр. Бу хампаанньаларга төһө-хачча олохтоох каадыр киирэн сири сүргэйэрэ чопчу биллибэт. Промышленноска саха ыччата ордук хото олохтоох тэрилтэлэрбитигэр "Анаабыр алмаастара", "Нижне-ленскэй" тарҕам алмааһы хостуур хампаанньаларга үлэлииллэр. "Нижне-ленскэй" АО акцията атыыланаары аукциоҥҥа турда. "Анаабыр алмаастара" АО "АЛРОСА" АК самалык тэрилтэтэ, онон улахан "АЛРОСА" атыыланнаҕына, саҥа салалта олохтоох каадырдарга сыһыана уларыйыан сөп. Хайа өттүгэр иэҕиллэрин билиҥҥитэ билбэппит.
Егор БОРИСОВ президент дуоһунаһыгар тахсан баран кэлии улахан хампаанньалары кытары каадырынан хааччыйыыга улахан үлэни ыытар диэн буолар. "Газпром" 10 ыччакка сертификат туттарбыта ол үлэ түмүгэ ини диэн этиэххэ сөп.    «Газпром» Саха сиригэр кэлбититтэн үөрбүччэ-көппүччэ  биирдэ эрэ  10 оҕону ылбакка, сылын аайы маннык сертификаттары туттарарын ситиһиэххэ баара. Син үөдэлээн-үөдэлээн, оччоҕо биир уонча сылынан гаас салаатыгар 100 киһилээхпит диэн этиэ этибит (ону даҕаны тулуктаһан хааллахтарына).
Манан диэн эттэххэ, өрүү тумус туттар национальнай республикабыт - Татарстан олохтоох каадыра промышленнай салааларга барытыгар баалларын таһынан, бу  хампаанньалар салайааччылара эмиэ бары татаардар. Бастакы президеннэрэ Минтимер ШАЙМИЕВ ол курдук инникини өтө көрөн, сокуон өттүнэн хайан, тутаах салааларын киин айбардааһыныгар биэрбэккэ, барытыгар бэйэлэрин уолаттарын олордуталаабыта билигин республикаҕа улахан экономическэй кыаҕы-күүһү биэрдэ. Солкуобайынан аахсар кэмҥэ ити сүрүн күүс буолбута саарбаҕа суох.
*** 
"Газпром" салайааччыта Алексей МИЛЛЕР Саха сиригэр  гаас хостооһунун киинин аһар былааннаах. "Бу саҕаланыыта эрэ, республика каадырдарыгар тирэнэн бу киини үлэлэтиэхпит", - диэн эттэ. Истэргэ үчүгэй. Ол гынан баран саҥа салгыҥҥа суураллан хаалбатын курдук, докумуоҥҥа тиһиллиннэ ини диэн эрэниэҕи баҕарыллар. Сылын аайы ХИФУна 10-ча тыһыынча ыччат бүтэрэр. Мантан саатар аҕыйах уона кэлии улахан хампаанньаларга киирэн үлэ булан, хатанан хааллахтарына улахан дьыала буолуох этэ. 
 ***

Аартык.ру