Тыала суохха мас хамсаабат. Ол курдук сурах быһыытынан да буоллар, бэрт бөрүкүтэ суох сонун тарҕанан эрэр.

Билэргит курдук, РФ Үрдүкү суутун уурааҕынан, “МАКСИМОВ дьыалата” 2012 сыл сэтинньи 16 күнүгэр көрүллэн баран, Саха сирин Үрдүкү суутун президиумун дьүүлүгэр ыытыллыбыта.

Холуобунай дьыала Саха республикатын Үрдүкү суутун кэнсэлээрийэтигэр киирбит күнүттэн саҕалаан 15 хонук иһигэр үөрэтиллэн быһаарыы ылыллыахтаах этэ. Ол гынан баран, “президиум суута хаһан дьыаланы көрөрө өссө да биллибэт” диэн СР Үрдуку суутун пресс-сулууспата иһитиннэрэр. Максимовтаах адвокаттара этэллэринэн, дьыала Москваттан сэтинньи 26 күнүгэр Дьокуускайга аадырыстанан почтаҕа туттарыллыбыт. Дьыала билиҥҥитэ СР Үрдүкү  суутугар кэлбитэ-кэлбэтэҕэ чуолкай биллибэт. "Холуобунай дьыала мантан Москваҕа диэри биир ый айаннаабыта, москвалар почталара түргэн буолар ини", - диэн депутат общественнай көмүскэһээччитэ Николай СЕДАЛИЩЕВ этэр. 
Сатахха, Үрдүкү сууппутугар даҕаны, бэрэссэдээтэллэрин талар быыбардарын кирэ-хоҕо бэчээккэ таһымнаан, ханна-ханна суут-сокуон туругуруохтааҕа биллибэт да буолан хаалла. Судьуйалар бэйэ икки ардыгар итинник “кирдээхтик оонньуур" буоллахтарына, кырдьыкпытын хантан булан ылабыт диэн ыйытыы үөскээн тахсар.

***

 Бигэргэтиллибэтэх информация быһыытынан, республика прокуратурата Афанасий МАКСИМОВЫ хаайыыттан эрэ таһаарбат туһугар утуйар ууларын умнубуттар. Бу уорган сорох үлэһиттэрэ депутаты утары аны өссө биир холуобунай дьыаланы “төрөтө” сатыы сылдьалларын кэпсииллэр. Саҥа дьыала ис хоһооно - “Сунтарнефтегаз” САО тула барыахтаах. Афанасий МАКСИМОВ аны, ол тэрилтэни “хоро таһан эспитин” курдук дьыала  оҥоһуллуохтаах. Бу дьыалаҕа, чуолаан, республика сүрүн прокурора интэриэстээҕин ыйаллар.
Санатар эбит буоллахха, "Сунтарнефтегаз" САО депутат бэйэтэ бас билэр тэрилтэтэ этэ, онон бэйэтин тэрилтэтиттэн бэйэтэ  хайдах "хоро таспытын" прокуратура "чулуулара" ханнык сокуону кэһэн "дакаастыылларын" өссө көрүөхпүт турдаҕа.  
Өссө биир түгэни ахтыахха наада: Афанасий МАКСИМОВ өссө 2009 сыллаахха прокуратура чөмчөкөтө  хотугу  надбавканан "үлүһүйэрин" депутат быһыытынан саралаан турардаах.

Саҥа холуобунай дьыаланы тэрийэргэ биир сүрүн мэһэйинэн МАКСИМОВ депутат боломуочуйалааҕа атах маһа буолар. Боломуочуйаны аахсыбакка бастакы холуобунай дьыаланы тэрийбиттэри  РФ Үрдүкү суута “сокуону кэһиинэн” сыаналаан төттөрү көрүүгэ ыыттаҕа. Ол иһин дьэ билигин “ыраастык саҕалаары” депутатыттан уһултара сатыыллар.

Былааска чугас сылдьар дьон кэпсииринэн, прокурор Ил дархаммытыгар кытары ити боппуруоһунан тахса сылдьыбыт.

Ол гынан баран, Ил Түмэн бэрэссэдээтэлэ Виталий БАСЫГЫСОВ төһө да прокурор тус бэйэтэ сүүрдэр-көттөр, ПОДЛАСЕНКО тылын ылымматах, сессия бэбиэскэтигэр Афанасий МАКСИМОВТАН депутат боломуочуйатын устар туһунан боппуруоһу киллэрэртэн кыккыраччы аккаастаммыт.

Дьэ, ситигирдик. Афанасий МАКСИМОВЫ хаайыыттан таһаарбат интэриэстээх күүстэр күнүстэри-түүннэри түбүгүрэ сылдьаллара олус  да сүрдээх-кэптээх. Сокуону тургутуохтаахтар бэйэлэринэн хам баттыы сылдьаллара иэдээнин, эчикийэ!

***
Сарсын, ахсынньы 12 күнүгэр, 12 чааска Афанасий МАКСИМОВ бириигэбэрэ тахсыбыт 1 сылыгар, Россия Конституциятын күнүгэр, биһиги дойдубутугар киһи бырааба төһө күөмчүлэнэрин тула төгүрүк остуол тэриллиэҕэ. Сэргиир дьон 12.00 чааска Республикатааҕы пресс-кииҥҥэ (Бэчээт дьиэтэ, 2-с этээс) кэлэн истиэххитин, санааҕытын атастаһыаххытын сөп. Төгүрүк остуолу "Ситим" общественнай хамсааһын тэрийэр.
***