Бэйэ ураты тылын-өһүн, өйүн-санаатын хам баттыыр судаарыстыбаҕа киһи, норуот бырааба өрө тутуллара кыаллыбат.
Ол да буоллар, история көлүөһэтэ эргийэр, сиэр-майгы уларыйар. 90-с сыллартан бэттэх саха сахатынан киэн туттар майгыта бигэтик олохсуйда диэн этиэххэ наада.
Саха итэҕэлин чыпчаала - ыһыах. Оттон оһуохайа суох ыһыах, амтана суох мин кэриэтэ буоллаҕа.
 Өрөбүл күн, Дьокуускайга, Арчы дьиэтигэр "Оһуохай" түмсүү тэриллибитэ 25 сылын ньиргиэрдээхтик бэлиэтээтэ. Түмсүүнү бастаан тэрийбит дьон аата үтүө тылынан ахтылынна, билиҥҥи салайааччыларга сүбэ-соргу этилиннэ, алгыс баһа сыаланна. Бу дьон  25 сылы супту  мээнэҕэ үлэлээн кэлбэтилэр, кинилэр  оһуохайы пропагандалаан  быйыл сайын Улуу Туймаада ыһыаҕар саамай улахан оһуохайга Гиннес кинигэтин рекордун тэрийсэн олохтоотулар. Онон быыкаай норуот өбүгэтин оонньуута аан дойду таһымыгар тахсан, республика имиджин оҥороругар үтүө кылаатын киллэрдэ.
***
Хас баскыһыанньа ахсын Арчы дьиэтэ оһуохайдьыттарга анаан аана мэлдьи аһаҕас. Дьон, ордук саастаах өттө, сахалыы хомоҕой тылы истэн санаалыын сайҕаран, эттиин-сиинниин эрчимирэн, бараллааларын кытары билсиһэн, үөлээннээхтэрин кытары көрсүһэн аралдьыйан бараллар. Манна сылдьан ыал буолбут да дьон элбэҕэ сөхтөрдө. Ол аата оһуохай олоххо тардыһыыны күүһүрдэн биэрэр эбит буоллаҕа.
Норуот маастара Наталья Ильинична ЕГОРОВА кэпсиир: "Уонча сыллааҕыта 18 үйэтинээҕи таҥалай сонун тигэн норуот маастара аатын ылбытым. Бу кэтэ сылдьар көстүүмүм - эбэҥкилэр таҥастара. Декоративнай. Сукунаҕа түһэрэн ыллым. Бэйэм биир оҕолоохпун, кэргэним биллэр артыыс этэ. Өлөөхтөөбүтэ. Оһуохайга наар сылдьабын, ыарыыбын барытын умнабын, сэниэ киллэринэбин. Бэйэм кииним түспүт сирэ Чокурдаах, оскуолаҕа Усуйаанаҕа үөрэммитим, онтон Дьокуускайга олорбутум 47 сылыгар барда. Сааһым 72", - диэн баран тэбэнэттээх мичээринэн сыдьаайар.  
Наталья Ильинична үйэтин сааһын тухары буҕаалтырынан үлэлээбит. Оһуохайга "биир киһилиин билсэ сылдьарын" этэр. Ол Чурапчы Буор ураһатыттан төрүттээх, 75 саастаах, билигин Педколледжка маастар-учуутал Владимир Иванович И-ГАН эбит (баҕар, аатын сыыһа суруйбутум буолуо диэн эрдэттэн баалаабаккытыгар этэбин). Владимир Иванович билигин да "тэп" курдук көрүҥнээх. Түөрт оҕолоох, огдообо. Биир өрөбүлүгэр оһуохайга кэлэн сэниэ ылан барабын диир. Көтүттэхпинэ эрэйдэнэрин этэр.
Сылтан сыл ахсын оһуохайдыыр баҕалаах дьон ахсаана элбии турар. Онон Арчы дьиэтэ, тастан көрдөххө улахан курдугун иһин, кыараҕас буолсук. Вентиляцията мөлтөһүөр, онон салгын убуурун этэллэр. Уоннааҕыта "барыта олус үчүгэй, сэргэх" диэн кырдьаҕастар кэпсииллэр. 
***
Оттон этээччи Егор Михайлович ОСИПОВ Сунтаартан төрүттээх эбит. 25 сылы быһа оһуохайдаан кэлбит. Кини аатырбыт Кыыл Уола - Сэргэй ЗВЕРЕВ оһуохайдаабытын көрбүт-истибит, үтүктүспүт, үҥкүүлэпсит  киһибин диэн киэн тутта кэпсиир. Култуура коллеһыттан 10-ча уол, 10-ча кыыс кэлэн оһуохайдаан барар диэн Егор Михайлович этэр.
Ыччаты оһуохайга сыһыарыы - улахан дьыала. Көлүөнэ солбуһуга баар эрэ буоллаҕына култуурабыт, итэҕэлбит биир кэрэ көстүүтэ тыыннаах хаалыа турдаҕа.
"Оһуохай" түмсүү чилиэттэрин, оһуохайдьыттары барыларын "Аартык.ру" аатыттан үбүлүөйгүтүнэн эҕэрдэлээтэхпит буоллун!
***
Аартык.ру