Президент Новосибирскай губернаторын Василий ЮРЧЕНКОНЫ кытары көрсүбүт уонна бииргэ үлэлииргэ илии тутуспуттар, федеральнай таһымҥа регион кыһалҕатын туруорсарга бэйэ-бэйэлэрин өйөһөргө кэпсэппиттэр. 
ЮРЧЕНКОЛААХ БОРИСОВ Новосибирскай уобалаһа 75 сааһын туолбутунан уонна Саха сирэ Россия састаабыгар киирбитэ 380 сылынан эҕэрдэлэспиттэр, өйдөбүнньүк бэлэхтэспиттэр.
***
Новосибирскайга барар төрүөт, президент үөрэммит аграрнай университетыгар кини аатынан лаборатория аһыллыбыта буолла. Егор Афанасьевич уонна кини кэргэнэ Прасковья Петровна бу университекка үөрэнэ сылдьан билсэн ыал буолбуттар. Манна улахан кыыстара күн сирин көрбүт. 
 Новосибирскайдааҕы государственнай аграрнай университет былырыын 75 сылын туолбута. Егор БОРИСОВ бу бырааһынньыка Саха сиригэр Дмитрий МЕДВЕДЕВ кэлэринэн сибээстээн кыайан барбатах. Онон сыл буолан баран биирдэ  үөрэммит кыһатыгар тиийэн бииргэ устудьуоннаабыт оҕолорун кытары көрүстэ. Дуоһунастаах дьонтон анаан-минээн Егор БОРИСОВЫ көрсө ГД депутата Николай ХАРИТОНОВ, РФ  ИДьМ Новосибирскай уобаласка кылаабынай управлениетын начальнига Алексей КИРИЛЛОВ кэлбиттэр. НГАУ устудьуоннара БОРИСОВКА анаан кэнсиэр көрдөрдүлэр.  
Президент ону сэргэ Саха сириттэн сылдьар устудьуоннары кытары көрсөн төрөөбүт республикаларын умнубаттарыгар, аатын түһэн биэрбэккэ сылдьалларыгар сүбэ-соргу тылы эттэ.
***