В. Штыров Уһук Илин уонна Байкаллааҕы регион 2025 сылга диэри сайдар программатын федеральнай сокуон таһымыгар таһааран бигэргэтиэххэ, бюджеттан анал строканан үбүлүөххэ наада диэн туруорсар. Ону сэргэ «Уһук Илин уонна Байкаллааҕы регион социальнай-экономическай сайдыытын туһунан» анал сокуону ылынан, бизнес ханнык салаатыгар чэпчэтии көрүллүөхтээҕин, социальнай, демографическай, суол-иис боппуруостарын кэлимсэтик быһаарыы барыта ол сокуоҥҥа чуолкайдык ыйыллыахтаах диир.
В.Штыров:
-- Бу сокуон тастан үп-харчы киирэрин тэтимирдэн биэриэхтээх. Үлэ-хамнас, дьыала-куолу тахсыылаах буоллаҕына, Уһук Илиҥҥэ дьон олохсуйар усулуобуйата үөскүөҕэ. Итини кытары Госпрограмма сокуона ылылыннаҕына, сокуон акталара түмүллэн - Уһук Илин административнай-правовой кодексата тахсан кэлэр. Бу Кодекса дойду илиҥҥи территорията Тиихэй акыйаан регионугар суолтата улаатарын мэктиэлиэҕэ.
Оттон билигин сокуон үчүгэйдик оҥоһулла, ылылла илигинэ, Уһук Илиҥҥэ улахан уларыйыы тахсар кыаҕа суох. Дьон син биир көһөр, экономика онтон сатарыйар, уопсай Азия-Тиихэй акыйаан геополитикатыгар Россия бэйэтин интэриэһин көмүскүүр кыаҕа түһэ турар.
Онон, В. Штыров Уһук Илини дойдубут “витринатыгар” кубулутуохха, олохтоохтор киэн тутуннуннар, ыалдьыттар ымсыырдыннар диэн этиилээх.
Санатар эбит буоллахха, Штыров Федерация Сүбэтигэр хотугу уонна илиҥҥи территориялары таарыйар боппуруостары иилиир-саҕалыыр үлэлээх.
Иван СЕРГИН.
Комментарии