Республика туох баар үрдүк сололоох хотуна-тойоно, ааттаах-суоллаах дьоно, Михаил НИКОЛАЕВЫ кытары бииргэ үлэлээбит, үлэлиир дьоно-сэргэтэ төрөөбүт күннээх киһини айхаллаатылар. 
Дьокуускай саамай улахан театра биир да олбоҕо кураанах хаалбата.  Дьон сүһүөхтэригэр туран эрэ Бастакы президени көрүстүлэр. Гимннэр тыаһаабыттарын кэннэ, бастакы тыл, сиэр быһыытынан, билиҥҥи президент Егор БОРИСОВКА бэрилиннэ. Кини Михаил Ефимович Саха сиригэр, Россияҕа, аан дойдуга биллэр политик, деятель буоларын бэлиэтээтэ. Кини кэнниттэн тылы Ил Түмэн председателэ Виталий БАСЫГЫСОВ, ХИФУ ректора Евгения МИХАЙЛОВА эттилэр. 
Егор БОРИСОВ Бастакы президент бэйэтэ олохтообут Максим АММОСОВ аатынан государственнай премия лауреатын аатын иҥэрдэ. 
БАСЫГЫСОВ, Михаил Ефимович Саха президенинэн үлэлии сылдьан, Россия аатыттан  тас дойдулары кытары кэпсэтиигэ сылдьара диэн аҕынна. Субъект президенэ дойду аатыттан дипломатическэй көрсүһүүлэри ыытара бэрт сэдэххэ буолааччы  диэн Ил Түмэн председателэ эттэ.
Михаил НИКОЛАЕВ кэлэр сылга тыа сирин олохтоохторун араҥаччылыыр сокуон ылыллыан наадатын эттэ. Үөрэҕи өрө туппут киһи быһыытынан, республикаҕа 100 аныгы технологиянан үөрэтэр, сайдыылаах оскуоланы аһыахха, 100 медицинэ киинин тутуохха, чөл олоҕу пропагандалыахха, Дьокуускайы марафонецтары эрчийэр биир улахан түһүлгэҕэ кубулутуохха диэн эттэ. Ону таһынан тыа сиригэр ураты ыраас үүнээйини үүннэрэн, кыылы-сүөлү төлөһүтэн аан дойдуну кытары эргиниэххэ диэн сүбэлээтэ.
Мунньах кэнниттэн концерт  буолла. Сарсын биирдиилээн дьон, тэрилтэлэр, ситэриилээх былаас уорганнара Михаил НИКОЛАЕВЫ үлэлиир сиригэр баран эҕэрдэлиэхтэрэ.

Аартык.ру.