***

«Турдарбын халлааҥҥа тиийиэм этэ диир баар үһү!» - диэн таабырын таайыыта -депутаакка кандидат диэн күлүү-элэк гынан кэпсиир буоллулар.

Саҥа ырыынак сыһыаннаһыыларыгар киирбиппит сүүрбэттэн тахса сыл ааста даҕаны урукку өйдөбүлбүт уларыйа илигиттэн саҥа үйэ сайдыылаах нано технологиятын, инновацияны баһылаабыт бэйэлэрэ инициативалаах эдэр көлүөнэ салалтаҕа кэлэрин утарса олоробут. Дьэ, бу биһиги ыарыыбыт. Эмиэ үөһэттэн эрэ кэлэр ыйыыны толорбута буолан аргыый наллаан хамнас ыла ыла олоро түспүт киһи диэн баҕалаахпыт.

Ордук кэлиҥҥи сылларга тыа сирин кытары быһаччы үлэлиир СР тыатын хаһаайыстыбатын уонна аска-үөлгэ политикатын министрдэрин сылтах көрдүү-көрдүү харса суох уларыта олордубут. Оттон дьон санаатын өйдөөн иһиттэххэ министрдэри субу-субу уларытары нэһилиэнньэ улаханнык бырачыастыыр эбит. Ол директордар корпустарын сүбэ мунньаҕар эмиэ иһиллибитэ. «Тыа хаһаайыстыбатын үлэтэ аһара ыарахан салаа, министр уһуннук дьарыктаннаҕына эрэ тугу эмэ ситиһиэн сөп», - диэн санааны иһитиннэрбиттэрэ.

***

Аны Саха Республикатын тыатын хаһаайыстыбатын табаарын оҥорооччулар сойуустарын тэрийиигэ тахсыбыт алҕаспытын кэпсиим. Манна сойуус бэрэссэдээтэлин талыыга улахан мэккиэр тура сылдьыбыта. Бэрт элбэх кандидатураны туруоран баран сүүмэрдээн-сүүмэрдээн баран, БОМР -  ол аата үлэтэ-хамнаһа суох сылдьар А.А.Софронеевы сойууспутугар бэрэссэдээтэлинэн талбыппыт. Киһибитин тыа сирин өйөтөөрү сорох өйөөбөт, сөбүлэспэт дьону, биир дойдулаахтарын ыһыытаппытынан ЕР ПП партийнай испииһэгэр киллэртэрэн, Ил Түмэҥҥэ депутат оҥотторбуппут. Мантан тугу барыыһырдыбыт-ночоотурдубут.

***

Афанасий Афанасьевич эмискэ көрүүгэ үлэтин бэркэ саҕалаабыта. Били коммунистар: «Коммунизмы тутуохпут», - диэбиттэрин курдук мин: «Промышленностан фонда тэрийэн тыа хаһаайыстыбатыгар үлэлиир фондата тэрийиэххэ», - диэн хаһыаттарга суруйбут этиилэрбин тупсаран  «Интеграция сельского хозяйства с промышленностью» диэн промышленноһы аһынан-үөлүнэн хааччыйыыга идея киллэрэн, үбү-харчыны промышленностан тоҕо тардан киллэриэх буолан, аҥаардас кыһыл тылынан эрэннэрэн үлэлээн-хамсаан барбыта. Ил Түмэҥҥэ тутаах сис кэмитиэт бэрэссэдээтэлинэн анаммыта. Чааһынайыгар саҥа квартира, массыына ылбыта, үрдүк хамнастаах дуоһунастаммыта. Үрдүк пенсиянан хааччыллар кыахтаммыта. Хас хардыытын аайы Л.И.Брежнев курдук наҕараада бөҕөнөн хатаҕаланар. Сөп-сөп балыыһаланан доруобуйатын бөҕөргөтүнэр. Нэдиэлэ аайы идеялаах депутаппытын арбаан мин хаһыаттар сирэйдэрин анаан-минээн хаһыат редактордарын кытары кэпсэтэ-кэпсэтэ кини аптарытыатын көтөҕөөрү аҥаар кырыы марайдыыбын. Баай-тот олох. Быс да сыа, бас да арыы диэбит курдук. Былдьаһыктаах бытта сыата депутат олоҕор, омоллоон олоҕор, дьэргэстэй ыһыаҕар киһибитин олордон кэбистибит.

Бары баҕа санаата туолан, тус олоҕо тупсан, уота-күөһэ уостан, хаппырыыстанара элбээн били эппит-тыыммыт, эрэннэрбит этиилэриигэр аат эрэ харата сыһыаннаһар. 2012 саҕаланыытыгар кинини эрэнэн өйөбүл буолан өрө анньан таһаарбыт СР тыатын хаһаайыстыбатын табаарын оҥорооччуларын сойуустарын салайыыттан олох да аны кыккыраччы аккаастанар. Дьонун-норуотун интэриэһин умнар. Истиин-тастыын сыаламмыт сыһыыга сылдьар хаҥыл сылгылыы: «Сойуускутунан бэйэҕит дьарыктаныҥ. Мин улахан аптарытыаттаах, кыахтаах, депутат буоллум, онон депутатскай үлэбинэн эрэ дьарыктаныам. Кэлэр быыбарга өссө депутат буолуом», - диэн бэрт суостаахтык иҥэрсийэр буолан барбыта. Эбиитин кини тула мунньан биэрбит дьоммутун, табаар оҥорооччулары бэйэ-бэйэлэригэр утары туруоран, депутат быһыытынан норуот итэҕэлин ылар электората да суох буолла.

Саҥа дьыллааҕы дьуолка маһыныы эргиччи силигэ сиппит, депутат А.А.Софронеевка эстэн суккуруур тыыммыт эрэ олорор тыа сирин дьоно туохха наада буолуохпутуй? Биһиги өс киирбэх, судургу дьон сойууспут күүһүнэн кини уочараттаах кураанах куолутун, эрэннэриилэрин кырдьыктанан, аҥаардас кини олоҕун уйгута тупсарын туһугар кэлтэй буор босхо үлэлээн биэрдибит.

***

25.10.12 сыл «Туймаада» хаһыакка тахсыбыт: «Салалтаҕа – эдэр көлүөнэни!» диэн ыстатыйабын ааҕан баран сол күн А.А.Софронеев суотабайынан миэхэ эрийдэ: «Кириитикэлии оонньообуккун сууттаһыам. Бэйэҕэр дьыала тэриттэриэм. Кигэр дьоҥҥун кэһэтэлиэм», – уо.д.а. элбэҕи кутта-симтэ. Мин кинини үөхпэтэҕим, холуннарбатаҕым, күннээҕи олоххо, үлэҕэ баар депутаат үлэтигэр итэҕэһин уонна депутатскай үлэни тупсарыыга общественнай тэрилтэлэри туһаныахха, эдэр көлүөнэни депутаакка, салалта үлэтигэр тардыыга үлэни тэрийиэххэ диэн тус бэйэм санаабынан эппитим.

***

08.10.12 чыыһылаҕа телефонунан кэпсэтиигэ: «Аны мин итэҕэспин төһө баҕарар кириитикэлээ, депутат буоларга ЕР ПП испииһэгэр киллэрбэтилэр. Онон олох кыһаммаппын», – диэн илэ бэйэтинэн бэйэтин балаһыанньатын быһааран киритиичэскэй ыстатыйа суруйарбар көҥүл биэрбитэ, итиэннэ олох да бу кириитикэҕэ сыһыана суох, дуоһунастаах дьоннорго: «Арамаанынан миигин тоҕо кириитикэлэттигит», – диэн депутат киһи быһыытынан суоһурҕанан телефоннаабыт сураҕа иһиллэр.

***

 

Атын судаарыстыбаларга оннооҕор президени түөрт сылга биирдэ талан, үчүгэй эрэ буоллахтарына иккилии эрэ болдьоххо үлэлэтэллэр. Онон көлүөнэлэр солбуллууллара түргэн. Биһиэхэ буоллаҕына депутат буолбут киһи иккилии, үстүү, түөртүү болдьоххо талыллан, УАЗ-ик масыына уларыйбатын курдук үлэлиин-хамнастыын кур бэйэлэрэ кубулуйбакка уус тылларынан, кураанах куолунан дьарыгырбыта буолаллар. Аны ол дьоннорбут кэнникинэн уларыйдар уларыйан киһи кыайан кэпсэппэт, кыайан чугаһаабат бардырҕас бардам, тордурҕас тойон тэппини көрбөт толоос, киһини сэниир, киэбиримсэх майгыланар. Ол туһуттан бу суруйабын. үстүү-түөртүү болдьоххо Ил Түмэҥҥэ кими да олордумаҥ!