"Бу кыһын, олунньу ыйга, Дьокуускай куоракка, ааһан иһэр эдэр киһи хаарга аҕыйах ыйдаах кыһыл оҕо сытарын булбута, бу кырачаан эрэйдээҕи түннүгүнэн бырахпыттара биллибитэ. «Саха сирэ» хаһыат атырдьах ыйын 16 күнүнээҕи нүөмэригэр бу дьыаланы сиһилии сырдатан турар.
Суут мунньаҕын биири да көтүппэккэ, саҕаланыаҕыттан бүтүөр диэри сылдьыбытым түмүгэр «Кыһыл оҕо сытара... маҥан хаар үрдүгэр» диэн ыстатыйам суруллубута. Дьыала ис хоһоонуттан кылгастык санатар буоллахха, силиэстийэ уорганнара Александр Спиридоновы РФ Холуобунай кодексатын 105-с ыст. 2-с чааһын «в» пуунунан, ол эбэтэр, бэйэтин көмүскэнэр кыаҕа суоҕа көстөн турар кыра саастаах оҕону соруйан өлөрүүгэ буруйдаабыттара. Ол эрэн, сууттанааччы көрдөһүүтүнэн, кини дьыалатын бирисээгэлээх сэтээтэллэр көрөннөр, Спиридоновы РФ ХК 109-с ыстатыйатын 1 чааһынан, ол эбэтэр, сэрэҕэ суохтан өлүүгэ тиэрдиигэ буруйдааҕынан билиммиттэрэ. Итиэннэ кинини аһынар сатаммат диэн быһаарбыттара.
Судаарыстыбаннай буруйдааччы Татьяна Николаева А.Спиридоновы ити 109-с ыстатыйанан 1 сыл 4 ыйга уопсай режимнээх холуонньаҕа көҥүлүн быһарга, оттон сууттанааччы адвоката Полина Парфенова усулуобунай миэрэни аныырга көрдөспүттэрэ. СР Үрдүкү суутун судьуйата Алексей Кулагин Александр Спиридоновка накаастабыл миэрэ быһыытынан көс-холуонньаҕа 1 сыл 4 ыйга көҥүлүн быһарга уурбута. Манна Спиридонов бу дьыл олунньу ыйын 26 күнүттэн хаайыллан олорбута учуоттаммыта. Сымнатар өрүт быһыытынан, буруйун бэйэтэ билинэн кэлбитэ ааттаммыта.
Прокуратура бу бириигэбэргэ сөпсөспөккө, РФ Үрдүкү суутугар ааһыммыта. СР Үрдүкү суутун бириигэбэрин көтүрэргэ, дьыаланы саҥаттан көрүүгэ ыытарга көрдөспүтэ. Онуоха РФ Үрдүкү суутун холуобунай дьыалаларга судебнай коллегията бу дьыл алтынньы 18 күнүгэр дьыала матырыйаалларын үөрэтэн, ааһыммыт өрүт санаатын истэн баран, бириигэбэри уларытарга диэн быһаарда: өскөтүн А.Спиридонов 1 сыл 4 ыйга көҥүлэ быһыллыбыт эбит буоллаҕына, РФ Үрдүкү суута кинини сити болдьоххо көҥүлүн хаарчахтыырга уурда.
Итиннэ кэккэ хаарчахтааһыннар эбиллибиттэр, ол эбэтэр: Спиридонов надзордуур уорганнары сэрэппэккэ эрэ, Дьокуускай куораттан ханна да барыа, олорор сирин уларытыа суохтаах уонна ыйга биирдэ кэлэн бэлиэтэниэхтээх. Маныаха РФ Холуобунай кодексатын 72-с ыст. 3-с чааһынан, хаарчахтаммыт көҥүл икки күнэ хаайыллан олоруу биир күнүгэр тэҥнэһэринэн, Александр Спиридонов алтынньы 19 күнүгэр хаайыыттан босхолонон, көҥүлгэ таҕыста (силиэстийэ кэмигэр хаайыллан олорбутуттан ааҕыллар).
… Тахсарын таҕыста эрээри, бу киһи дьон-сэргэ дьүүлүгэр түбэһиэ суоҕа дуо диэн сэрэхэдийии үөскээтэ. Дьон бирисээгэлээх сэтээтэллэр «сэрэҕэ суохтан өлүүгэ тиэрдибит» диэн вердиктэрин ылыммата, буруйдааҕы «оҕону өлөрүөхсүттэн» атыннык ааттаабаттар. Интернет «оргуйан» олорор: Спиридонов дьиэтин ааныгар «детоубийца» диэн суруйуох да буолаллар, хаартыскатын куораты биир гына ыйыах да буолаллар, бэл диэтэр, тиийэн кэһэтэн биэриэх баҕалаахтар кытары бааллар. Үөҕэллэр, кырыыллар буруйдааҕы эрэ буолбакка, – бу дьыалаҕа кыттыбыт бирисээгэлээх сэтээтэллэри, судьуйаны, оҕо ийэтин, бүтүн дойдуну...
Ити үөһэ ахтыллыбыт ыстатыйабар бу курдук суруйбут эбиппин: «Бу дьыаланы көрөр бирисээгэлээх сэтээтэллэр баһыйар ахсааннара саастаах дьахталлар (үс эрэ эр киһи, олортон биирдэстэрэ – саппааска) буолалларын көрөн баран, арааһа, соруйан ийэлэри-эбэлэри талан ыҥырбыттар дуу дии санаабытым. Дьахтар аймах оҕоҕо ордук чугаспытынан, сууттанааччыны хара ааныттан соруйан өлөрүүгэ буруйдуурдуу оҥостон кэлбиттэригэр саарбахтаабатаҕым даҕаны. Онтон уонна бу буруй уопсастыбаҕа улахан аймалҕаны, буруйдаахтары абааһы көрүүнү таһаарбытынан, бирисээгэлээх сэтээтэллэр ол сабыдыалыгар бас бэринэллэрэ буолуо диэн бигэ эрэллээх этим.
Ол иһин кинилэр вердиктэрэ соһуччу буолбута. Сууттанааччы буруйдааҕа-буруйа суоҕа куоластааһынынан быһаарыллар. Куолас ахсаана тэҥнэһэр түгэнигэр, ол сууттанааччы туһатыгар ааҕыллар. Оттон бу дьыалаҕа бирисээгэлээх сэтээтэллэр туох да хайдыһыыта, мөккүөрэ суох биир санаанан Александр Спиридоновы оҕону соруйан буолбакка, сэрэҕэ суохтан өлүүгэ тиэрдиигэ буруйдааҕынан билиммиттэрэ чахчыта даҕаны сөхтөрдө.
...Буруйдуур өрүт дакаастабыллара чуолкайдар этэ буолан баран, оҕо алҕас түспүт буоллаҕына, тоҕо дьиэттэн быдан тэйиччи, 9,4 миэтэрэ ыраах сиргэ сытарый диэн боппуруос суут саалатыгар олорооччулары барыбытын үүйэ-хаайа туппута. Суут мунньаҕын кэмигэр бирисээгэлээх сэтээтэллэргэ барыллааһын силиэстийэ видеонан эксперименин көрдөрбүттэрэ. Онно силиэдэбэтэл уорбаланааччы Спиридоновка оҕо манекенын уонна уулаах бытыылка муляһын икки төгүллээн бырахтарбыта, көрдөххө – дьиэ эркиниттэн олох чугас түһэллэр, оҕо булуллубут сиригэр ырааҕынан тиийбэт. Итиннэ олоҕуран, прокурор күүһү туттан, соруйан быраҕыы диэн позицияны тутуспута.
Оттон адвокат Полина Парфенова ити манекен уонна муляж тас көстүүлэринэн сөп түбэспэттэрин итиэннэ оҕо эрэйдээх ол бэһис этээстэн түһэн иһэн, кирилиэс тутуһарыгар охсуллан, ыраах эһиллиэн сөбүн эппитэ. Ол туоһутунан судмедэкспертиза оҕо атахтарыгар көҕөрүүлэри булбутун аҕалбыта. Бирисээгэлээх сэтээтэллэр уураахтарыттан сиэттэрдэххэ, кинилэргэ адвокат бу дакаастабыла ордук итэҕэтиилээх буолбут бадахтаах».
Ол эбэтэр, прокурор бирисээгэлээх сэтээтэллэри «бу киһи оҕону соруйан өлөрбүт» диэн итэҕэппэтэҕин ааһан, бириигэбэри РФ Үрдүкү суутугар ааһынан, көстөрүн курдук, дьыала хаттаан көрүллүөхтээҕэр, төттөрүтүн, бириигэбэрэ өссө сымнаата – буруйдаах көҥүлгэ таҕыста.
Вера МАКАРОВА, "Саха сирэ" хаьыат анал.корр."
--
Комментарии