"Аартык.ру" интернет-хаһыакка былааска чугас киһи иһитиннэрбитинэн, правительство бэрэссэдээтэлин солбуйааччытын Анатолий СКРЫБЫКИНЫ атын үлэ көрдүүрүгэр "көрдөспүттэр". 

СКРЫБЫКИН былаас араас хаттаҕаһыгар өр сыл үлэлээн кэлбит киһи итинник "көрдөһүүттэн" ууга-уокка түспэккэ, өссө үчүгэй сылаас сири (акционернай хампаанньа гендириэктэрин дуоһунаһын) көрдүү сылдьарын кэпсиир.  

Анатолий Николаевич вице-премьеринэн 2008 сылтан үлэлиир. Ол иннинэ, Илья Михальчук Дьокуускайга мээрдээн олордоҕуна  (1998-2000 сс.) солбуйааччынан сылдьыбыта, Урбаан, туризм сайдыытыгар уонна дьарыктаах буолуу миниистиринэн үлэлээбитэ (2000-2006 сс.), Уһук Илиҥҥэ постпредствоны салайбыта ( 2006-2008), быстах кэмҥэ Штыров саҕана  АПиП салайар солбуйааччытынан үлэлээбитэ, онтон вице-премьердиир.

СКРЫБЫКИН билигин 53-гэр сылдьар.

Кэпсэтэр киһибит этэринэн, вице-премьер СКРЫБЫКИН үлэтиттэн барар тиһэх төрүөтүнэн - "Якутия" авиахампаанньаны  кытары сибээстээх айдаан иҥнэр бэрэбинэ буолбут. Ол айдааҥҥа вице-премьери кытары транспорт миниистирэ Семен ВИНОКУРОВ аата эмиэ ахтыллара.