Сааһыары, сайын хаайыылаахтар Саха сылгытын, Дьыл оҕуһун уонна Сэлии кыылы сиэмэнтэн кутан оҥорбуттар диэн сурах тарҕаммыта. Буруйдаахтар бу скульптураларын атыылаан харчы киллэрэн Арчы дьиэтин тутуутугар ыытыахпыт диэн былааннаабыттар. Хаайыылаахтар былааннаабыттар эрээри, зона салалтата уларыйан-тэлэрийэн, итэҕэл дьиэтэ тутуллара күчүмэҕэйдэнэн хаалбыта. Онуоха  ыксаан депутаттарга, салайааччыларга Аһаҕас сурук суруйарга күһэллибиттэрэ.  

Эрдэ колонияҕа православнай храм уонна мечеть тутуллубут эбит. Олор тастарыгар Арчы дьиэтэ тутуллуохтааҕа үһү да, оннук быһаарыыны ылбыт  начальник уурайан пенсияҕа баран хаалбыт. Колония быстах кэмҥэ баһа-салалтата суох буолан балаһыанньа иннэ-кэннэ биллибэт буолан хаалбыт.

Онтон, бу бүгүн, алтынньы 11-гэр ИК №7 начальнигынан Сергей СИТНИКОВ ананна. СИТНИКОВ эрдэ ИК №5-һи (сэлликтээхтэр хаайыылара) салайан олорбута. Полковник Сергей Александрович Арчы дьиэтин тутарга сөбүлэһэн олорор. Арай, докумуону хомуйарга Көҕүлүүр бөлөҕү көмөлөһөргө көрдөстө. "Кистэлэҥ күүс" редактора Марина ПЛАТОНОВА бу бөлөх салайааччыта, онон кини наадалаах кумааҕыны хомуйсарга бэлэмин эттэ.

СИТНИКОВ хаайыылаахтар оҥорбут скульптураларын даҕаны атыылыырга көҥүллээбит. Бу иннинэ зонаны быстах кэмҥэ салайан олорбут УЗЛОВ, оҥоһуктары атыылыыры бобон турардаах. Кини "бигэргэммит начальник бэйэтэ кэлэн быһаарыаҕа" диэн матыыптаан бу дьыалаттан илиитин соттуммутун туһунан "Аартык.ру" суруйан турар.

"Сиэри-туому убаастыыбын. Бэйэм Саха сиригэр өр сыл үлэлээбит-хамсаабыт киһибин, элбэх саха, эбээн, эбэҥки доҕоттордоохпун, - диир Сергей СИТНИКОВ. - Кинилэр да этэллэринэн, хаайыыга Сылгы - күрүөйэҕи, Оҕус - баһаары түүйэр. Онон түргэнник бу скульптуралары зонаттан таһаара охсуохха наадаа", - диэн күлэр.

Күлүү күлүүнэн хаалбатыгар эрэниэҕиҥ уонна оттон, Арчы дьиэтэ тутулларын өйүүр кыахтаах дьон скульптураны атыылаһан тэрилтэҕит аттыгар дуу, ханна эмэ куорат муннугар дуу туруорарга көмөлөһөргүтүгэр ыҥырабыт. Биирдиилээн дьон аллараа бэчээттэнэр счекка харчынан көмөлөһүөххүт диэн эмиэ бүөм санаалаахпыт.
Холуонньаҕа улахан аҥаардара саха ыччата сытар. Үксүлэрэ  акаарыларыгар, быһымахха  быһыыланан түбэһэн олороллор. Обществобыт куттала суох буоларыгар баҕарар буоллахпытына, ыччаты итэҕэлинэн көнөр суолга үктэннэриэҕиҥ - Арчы дьиэтэ тутулларыгар көмө-тирэх буолуоҕуҥ, доҕоттор.

ААРТЫК.ру.
Вера МАКАРОВА ("Саха сирэ" хаһыат анал корреспондена) хаартыскаҕа түһэриитэ.