Бэҕэһээ, атырдьах ыйын 7 күнүгэр, үлэ күнүн бүтүүтэ Дьокуускай куорат дьаһалтатын дьиэтэ иһэ-таһа бэркэ сэргэхсийдэ. Суол нөҥүө “Долой Бершовку!”, “Президент! Останови моральное преступление!”, “Мэр, мы хотим гордиться своей столицей!” диэн транспораннаах эдэр дьон кэккэлэстилэр. Ааһар массыыналар бытааран суруктары ааҕаллар, сатыы дьон улаханнык туох буола турарын өйдөөбөккө килиэр-малаар көрөллөр. Оттон бу айдааҥҥа тус сыһыаннаах дьон чуо-бааччы мээрийэ иккис этээһин улахан мунньахтыыр саалатыгар дьулуһар.Арааһа, мээрийэ саалата бырааһынньыкка буолбакка, мунньахха бачча элбэх киһи кэлбитин умнубута быданнаабыт буолуохтаах. 17.00 чаастан саҕалаан киһи харыыта суох анньан кэллэ. Чаас иһинэн дьон элбэҕиттэн салгын кытары убаата. Ким олоппоско тиксибэтэх быыс-хайаҕас булан эркиннэри “өйөөтүлэр”, ааҥҥа анньан турдулар. Төһө да “публичнай” дэммитин аанньа, бачча элбэх “көхтөөх общественник” биһиги куоракка баара буолуо дуо?
Биллэн турар, 203 кыбаартал тутуутугар анаммыт сценканы 2 чаастан ордук көрдүбүт. Сүрүн сценаристарынан - “ДСК” аһаҕас акционернай хампаанньа салалтата буолла. “Быстах оруолларга”, “массовкаҕа” Александр Берш тэрилтэлэрин коллективын дьоно оонньоотулар. Наймыланан үлэлиир дьон хайыахтарай, үлэ миэстэтин билиҥҥи үйэҕэ ким илэ өйүнэн сүтэриэн баҕарыай, тойон-хотон түүрэйин тулуйан “шоуга” күһэлэҥинэн да буоллар кытыннахтара...
Оттон “сценка” биир кыттыылаахтара – куорат олохтоохторо, экологтар, архитектордар, худуоһунньуктар уонна олору түмпүт Көҕүлүүр бөлөх чилиэттэрэ. Кинилэр ахсааннарынан баһыйтардылар да буоллар, салгыны син хамсата сатаатылар.
“РДР-Групп” ХЭТ генеральнай дириэктэрэ Татьяна Антипкина, кини солбуйааччыта Сергей Новгородов, “Сахапроект” ААО генеральнай дириэктэрэ Прокопий Романов, проектировщиктар бөлөхтөрүн салайааччыта Михаил Баишев буолан, дурда-хахха оҥостон “ДСК” ААО “аллар атаһын” тутуу миниистирин Сергей Дереповскайы кытыннардылар.
Публичнай истиигэ “РДР-Групп” ХЭТ, биллэн турар, 18 млрд солкуобай инвестиционнай суумалаах бырайыактарын түөстэрин нэлэтэн туран көмүскэстилэр. “Барыта үүт-тураан үчүгэйин, архитектура эҥкилэ суоҕун” үлэһиттэрэ “ураатыылларын” быыһыгар дакаастаан көрдүлэр.
Общественниктар аҕыйах ахсааннаах да буоллаллар, “РДР-Групп” 203-с түөлбэни аныгылыы архитектуралаан, ыччакка анаан тутун диэн туруорустулар. Афанасий Федоров Көҕүлүүр бөлөх чилиэнэ: “Хас да бырайыактан биир уһулуччутун талыахтаах, ол таларга куорат олохтоохторо кыттыахтаах этилэр”, - диэн санаатын эттэ.
Ил Түмэн дьокутаата Владимир Федоров, сорохтор быыбарга бэлэмнэнэн пиарданар да диэбиттэрин иһин, общественноһы кытары санаата биир буолла. Кини ааспыт төгүрүк остуолга эппитин курдук, “РДР-Групп” 203-с кыбаартал сирин олус чэпчэкигэ – 5 төгүл чэпчэки сыанаҕа ылбытын эттэ. Инньэ гынан, куорат бюджета 1,5 млрд итэҕэстэммитин ыйда. “203 кыбаарталга бизнес, култуура, ыччат, дьон сынньанар сирин – харчы хамсыыр сирин тутуоҕуҥ, КПДны Сайсарыга, Аппа уҥуор, 17-с кыбаарталга баһаалыста тутуҥ” диэн дскаларга этэр.
Бу айдаан сүрүн төрүөтэ – харчы. Берш тэрилтэтэ түргэнник уонна элбэх харчыны биирдэ сомсон ылаары саҥа кыбаарталга КПДтын сыҥалыыр. Оттон общественниктар - аныгы, национальнай архитектуралаах кыраһыабай куорат муннугун тутарга туруорсаллар. Ким да туттун, баҕар БЕРШ, баҕар ЕФИМОВ, баҕар миниистирдэр ДЕРЕПОВСКАЙ уонна ЖОНДОРОВ! Ол гынан баран, бука диэн биһиэхэ АНЫГЫ КУОРАТЫ тутуҥ!..
Уопсайынан, публичнай истиини туораттан көрдөххө - ДСК өттүттэн ахсаанынан сабырыйан общественнай өйү-санааны хам баттыы сатааһын таҕыста. “Ким күүстээх - ол быраапсай” диэн бириинсибинэн. Төһө да биир мунньахтыыр саала иһигэр эрдэ бэлэмнэниллибит “оонньуу” оонньоммутун иһин, куорат салалтата, республика президенэ (хайыыр да кыах суох, кинилэр эрэ быһаччы ороостохторуна быһаарыллар дьыала буолла) күттүөннээх дьаһал ылаллар ини диэн эрэнэбит.