Пресс-конференция кэмигэр биллибитинэн, дириэктэр Г.В.АММОСОВА дуоһунаһыттан уурайарын туһунан сайабылыанньа биэрбит. Уопсайынан, бу дириэктэри былырыын эмиэ "уурай, атын үлэҕэ көс" диэн Алексей ПЕТРОВ этэ сылдьыбытын сөбүлэммэтэх. Начальнай кылаас оҕолорун төрөппүттэрин кытары айдаан тахса сылдьыбыт.
Куорат оскуолаларыгар иитии чааһыгар эппиэтинэстээх киһи - Егор ОХЛОПКОВ 1,5 ый анараа өттүгэр анаммыт. Урут кини Дьүлэй оҕолор оскуола-интернаттарыгар, кадеттар оскуолаларыгар дириэктэрдээбитэ. ОХЛОПКОВ мантан антах харытын ньыппарынан туран иитии өттүгэр үлэлиэх тустаах. Аны тахсар быһылааннарга быһаччы кини үлэтин түмүгэ көстөрө саарбахтаммат.
ЕВСИКОВА эппитинэн, 18-с оскуолаҕа тахсыбыт быһылааны көрөр хамыыһыйа үлэтэ бу чэппиэргэ түмүктэниэҕэ. "Буруйдаахтар, кыттыгастаахтар бары накаастаныахтара. Билигин төрөппүт оҕото буруйу кэстэҕинэ ыстарааба 500 солкуобай, онон бүтэр. Учуутал, оскуола бырааба улаханнык күөмчүлэнэн турар" - диэн кини этэр. Күөмчүлэммит быраабы туруорсуу, бэйэни салайыныы сокуонунан биһирэнэр кэмигэр, үөрэх министиэристибэтэ көҕүлээн сокуоҥҥа уларытыы, эбэтэр муниципальнай таһымҥа быраабыла, бэрээдэк олохтоноро сатаммата буолуо дуо? Ил Түмэҥҥэ үөрэхтээһин эйгэтиттэн уонтан тахса депутат олорор, үөрэххэ туспа парламент кэмитиэтэ үлэлиир - барытын федералларга сигэнэн баран олорон биэрии ордук судургу курдук... Киһи, оттон "ээх" хоту сырыттаҕына туохха тиийэр, кыратык туруорса сатыыр, салгыны сатарытар тоҕо сатамматый?
***
Социальнай ситимнэ араас сурах-садьык тарҕанара дьиксиннэрэр. Ордук омугунан атааннаһыыны күөртээһин дэлэй. Оттон 18-с оскуола учууталлара бары кэриэтэ сахалыы саҥарар-өйдүүр дьон. Педколлектив 31 үлэһиттээҕиттэн 23-э саха, 7-тэ нуучча, 1 атын омук. Оҕолортон 55 бырыһыана нуучча, 30-а саха, 15-э атын омук. Онон, омугунан көрөн атааннаһыы диэн сурах олох төрдүттэн сымыйа. Манан диэн эттэххэ, эчэйбит кыыс сахалыы букатын саҥарбат оҕо. Ону "сахалыы саҥарбытын иһин" диэн этии олорчу үктэннэрии.
Евдокия ЕВСИКОВА бу быһылаан биир кыттыгастааҕа баҕар көҥүлэ хаарчахтанан атын сиргэ сабыылаах училищеҕа кытары барыан сөп диэтэ. Оттон Ушакова - буруйдаах кыыс билигин социальнай ситиминэн харыыта суох элбэхтик саҥарыллан, үөҕүллэн олорор. Кыыс билигин быстах кэмҥэ приемник-распределительгэ олорор, суут өссө хас хонукка кыыһы онно тутуоҕун быһаарыахтаах диэн эттилэр. Бу - бастатан туран, кини олоҕор суоһуур кутталтан харыстаан дьаһалынна дэннэ. Евдокия Ивановна бу быһылааны көрөн турбут оҕоттон биир да оҕо Лизаны көмүскэспэтэҕин сөҕөр. Дьэ, ким билэр... үөр утары соҕотоҕун барбыты бэйэтин тэпсэллэрин оҕо билэр буоллаҕа. Буолаары буолан итинник сааска.
Лиза үтүөрэн таҕыстаҕына ханнык оскуолаҕа барарын бэйэтэ быһаарыахтаах, бэйэтэ 18-ска төннүбэппин диэн этэрин киһи өйдүүр бөҕө буоллаҕа.
***
Дьэ, билигин сиэмэх киин ханааллар сылтанан тугу-тугу эриэхибэйдээн таһаарыахтарын айбыт таҥара бэйэтэ билэр.
Оттон олохтоох дьон, ордук ыччат бу быһылаантан сылтаан, омугунан киирсиигэ киирбэккитигэр көрдөһөбүт. Араас хобу-сиби тарҕатар "репостары" салгыы ыытымаҥ, доҕоттор.
***
Аартык.ру
Комментарии