Бүүс аһыллыытыгар Гавриил Романович төрүт нэһилиэгин билиҥҥи баһылыга Иннокентий Птицын, аймахтара, олор ортолоругар «Тумул» кэпэрэтиип бырабылыапнньатын бэрэссэдээтэлэ Таисия Десяткина, ис дьыала отделын бэтэрээннэрэ, улуус баһылыгын социальнай боппуруостарга солбуйааччы Иван Птицын, ис дьыала отделын начаалынньыга Василий Пономарев кытыннылар.
Бу күн полиция үлэһиттэрэ өрөгөйдөөх линиэйкэҕэ тураннар, Гавриил Десяткин бүүһүн иннигэр салюттаатылар. Аллараа Бэстээх 2-с нүөмэрдээх оскуолатыгар байыаннай үөрэх төрүттэригэр энтузиаст Андрей Нестерев уһуйар уолаттара параадтаан турдулар, чиккэҥнэтэ хааман кэлэннэр Гавриил Десяткин бүүһүгэр венок уурдулар. Бүүс аһыллыытынан полиция үлэһиттэригэр, улуус олохтоохторугар эҕэрдэ тылларын биология наукатын дуоктара, өрөспүүбүлүкэ наукатын үтүөлээх үлэһитэ Роман Десяткин, ис дьыала сулууспатын бэтэрээнэ Семен Санников, отдел начаалынньыга Василий Пономарев уо.д.а. тыл эттилэр. Ырыаларын-тойуктарын Аллараа Бэстээх оскуолатын үөрэнээччилэрэ, мелодист Владимир Кузьмин, атын да ырыаһыттар бэлэхтээтилэр.
Гавриил Десяткини улуус дьоно-сэргэтэ саха успуорда сайдыытыгар улахан кылаатын киллэрбит дьоһун киһинэн билэллэр. Мас тардыһыытыгар, хапсаҕайга өрөспүүбүлүкэ бастакы спартакиадаларын чөмпүйүөнэ, мас тардыһыытын аныгы быраабылаларын олохтообута, успуорка саха төрүт көрүҥнэрин сырдатан кинигэ оҥорон таһаарбыта билиҥҥэ диэри туһанылла сылдьар. Бүүһүн аттыгар, Күүстээх Дэһээккин дуо дэппитин саната, 1935 сыллаахха тобугар диэри көтөхпүт 387 киилэлээх тааһа ууруллан сытар. Кини эндирдээх эҥкилэ суох сулууспатын туһунан «Хара Мааска» диэн киинэ уһуллубутун билэбит. Өрөспүүбүлүкэҕэ сокуон сүрүннүүр олоҕо-дьаһаҕа олохтонуутугар элбэх сыратын уурбута. Үтүө суобастаах үлэтэ сыаналанан «Кыһыл Сулус», , «Бойобуой Кыһыл Знамя», «Үлэ Кыһыл Знамята» уордьаннарынан, Саха АССР Үрдүкү Сэбиэтин Президиумун Бочуотунай грамотатынан, ССКП Киин Ситэриилээх Кэмитиэтин Президиумун Бочуотунай грамотатынан, элбэх мэтээллэринэн наҕараадаламмыта. Ол да иһин Ис Дьыала сулууспатын билиҥҥи үлэһиттэригэр, ордук сахаларга, чаҕылхай холобур буола сылдьар.

****
Аркадий ИННОКЕНТЬЕВ
Мэҥэ Хаҥалас