Биир мандааттаах уокурукка сүрүн киирсээччилэр - Сөдүөт Тумууһап уонна Олег Тарааһап  илин-кэлин бырахсан иһэллэр. Бу икки кандидат ыстаабын дьоно бу түүн долгуйан сүрэхтэрэ толугураан  утуйбат буолуохтаахтар. Ким эрэ кыайыы эҥэрдэниэ, ким эрэ сир-буор сирэйдэниэ. Ол эрээри кыайыылаах кандидат олус хаардыы хаампакка иккиһиттэн бэрт кыранан чорбойуоҕа диэн быыбары кэтээн көрөөччүлэр сылыктыыллар.

Буоларын курдук, куорат сирдэр олохтоохторо быыбарга кыттыылара тыа улуустарынааҕар аҕыйах.  Ол да буоллар холбоон-илбээн Саха сирэ,  18.00 чаастааҕы туругунан, 42%-на куоластаата диэн КБХ биллэрдэ. Ону таһынан, Уһук Илиҥҥэ эмиэ дьон кэлиитинэн бастаан таҕыстыбыт - онно киһи соһуйара суох. 

Бэлиэр быыбар уопсай хартыыната тахсыах курдук. Онон бастакы “Путиннаах ОНФ атаһа” Сөдүөт Тумууһап чорбойуохча диэн куолас ааҕааччылар биллэрэллэр. Олег Тарааһап хотторон сир-буор сирэйдэниэх курдук дэнэн эрэр. Онон этэҥҥэ 3,5 мөлүйүөн хамнаһыгар төттөрү түһэрэ дуу, олох да Силиэстийэлиир кэмитиэт доппуруоһугар үргүлдьү ыытыллара дуу... Хоккей көмөлөспөтөҕүнэ көмөлөспөт эбит дьэ.

Икки сүрүн киирсээччилэр куолас үрүмэтин-сүөгэйин  улахан хамыйаҕынан халбыйан ылбыттарын кэннэ, арыый амтаннаах соҕуһугар, бытархайдаһан-кымаахтаһан  хомуньуус бэрдэ  Бүөтүр Оммуоһап саппай уопсан тахсар куолуланна.  Тыҥ хатыытыгар диэри түмүк улаханнык уларыйбата буолуо диэн сэрэйиэххэ сөп.  

Оттон партиялар киирсиилэригэр, биллэн турар, “Биир ньыгыл Арассыыйа” кыайбыт, иккис “Сиэрдээх Арассыыйа” батыаккалаһан иһэр, үһүс хомуньуустар, төрдүс “жириновскайдар”.

Быыбар этэҥҥэ түмүктэннэ, аныгыс быыбарга диэри сынньалаҥ биллэриллэр.

***

Бүөтүр АРЫЫЛААХАП,

“Аартыкка” анаан.