РАСО  60 политологтан ыйыппытынан, Госдумаҕа “Биир ньыгыл Россия”, ЛДПР уонна КПРФ эрэ бигэтик ааһар кыахтаахтар.  Оттон “Сиэрдээх Россия” партия балаһыанньата иэрэҥ-саараҥ, 5%-ны ааһара саарбах диэн  опроска кыттыбыт эксперт 45%-на хоруйдаабыт.

Бу иннинэ, Сергей МИРОНОВ партията мөлтөх туруктааҕын туһунан дойду социологтарын үлэлэрин  РБК эмиэ ахтан аһарар.

Билигин Госдумаҕа баар партиялартан саамай куһаҕан баазалааҕынан “Сиэрдээх Россия” буолар диэн экспертэр эппиттэр. Бастатан туран, партияны өйүүр электорат аҕыйах, ол дьону өссө “сиэрдээхтэртэн” атын хаҥас  партиялар уонна кинилэртэн барбыт политиктар былдьаһыахтара. Холобур, “Сиэрдээх Россия” партияттан биллэр политиктар Оксана Дмитриева уонна  Дмитрий Гудков тахсан тураллар – ол партияҕа охсуулаах, чаҕылхай лидердэрэ  суох буоллулар.  Итини таһынан, бу партия чопчу идеологията суоҕа  эмиэ туорай мас буоларын  экспертэр бэлиэтээбиттэр.

“Биир ньыгыл Россия “ партия сүүйүүтэ - туох баар регионнарга барытыгар саамай элбэх киһилээх партия буолар. Ону таһынан, былаас партията буолан  үп-харчы өттүнэн эмиэ кыахтаах, медиа ресурсата күүстээх, “Путин партията” дэнэр үһүйээнэ эбии өйөөччүлэри тардар диэн түмүктээбиттэр.

Оттон ЛДПР коммунистары биир кыайар өрүтэ – кинилэр лидердэрэ “олус ураты” харизмалааҕын ааттыыллар. Ону таһынан – идеологиялара  чуолкай, медиаҕа өрүү көстөллөр диэн политологтар түмүк оҥорбуттар.

КПРФ  “үтүөтэ” – аҕыйах да буоллар регионнарга барыларыгар чиҥ электораттаах  диэн РАСО экспертэрэ сыана быспыттар.

Саха сиригэр “сиэрдээхтэр” кэккэлэрин урут былааһы утарар оппозиция өйөөн кэлбит эбит буоллаҕына, билиҥҥи быыбарга, ол оппозиция уоҕун атын утарааччы политиктар киирсэн суурайан кэбиһиэхтэрин сөп диэн экспертэр сылыктаабыттар.

2000-2001 сс. Саха Республикатын Президенин быыбарыгар  Федот Тумусов “саха-нуучча” диэнинэн сирэйдэнэн үөһэ дагдайбыт эбит буоллаҕына, билигин омугунан киирсии суох – элбэх саха быыбарга кыттан эрэр. Онон омугунан куоһур киниэхэ билигин  оонньообот диэбиттэр.  

ВЦИОМ (Всероссийский центр изучения общественного мнения) социологтара чинчийбиттэринэн, дьон санаатыгар  Тумууһап урукку САПИны кытары сирэйдэнэн өйдөнүллэр мөлтөх  уобарастаах эбит уонна кэлин  “Ил Түмэҥҥэ, Госдумаҕа депутаттаан тус аймахтарыгар эрэ туһалаата” диэн өйдөбүлгэ тиийбиттэр.

“Отучча сыл тухары былааска, далбарга сылдьар – ол аата син биир былааһы кытары биир баайыылаах, сымыйа оппозиционер” диэн оппозиционнай санаалаах дьон  Тумусовы эппиттэр.  

 

***

Майя ДМИТРИЕВА,

Интернет –хаһыат матырыйаалларыттан.