Арассаадаларынан хааччыллыы, күһүн сибиэһэй туох да эбиитэ-кутуута, атын тас дойдулартан тиэйиллэн аҕалыллар, иһигэр туох-туох кутуллубута биллибит астардаах, уустук уоҕурдуута суох оҕуруот астарын атыылаһан сиир астык буолааччы.
Сааһын чаҕылхай күнэ аҕыйах, тымныы тыаллаах дьыл үүнэн «Ороссолуода» ТХПК үлэһиттэрэ арассаадаларын муус устартан бэйэлэрин дьиэлэригэр-уоттарыгар олордору саҕалаабыттар.
Күн-бүгүн итии тэпилииссэҕэ үлэ-хамнас күөстүү оргуйар. Кээпэрэтиипкэ Маргарита Александрова биригэдьиирдээх үс киһи: агроном Матрена Федорова, үлэһиттэр Матрена Сивцева, Ольга Федорова арассаадалары көрөллөр-истэллэр, буорун үлэтигэр Руслан Игнатьев, Степан Федотов көмөлөспүттэр.
Быйыл оҕурсуга түөрт, хаппыыстаҕа биэс уон, помидуорга балтараа тыһыынчалыы арассаадалары олордубуттар.
‒ Күн көрбөт буолан, үүнээйилэр тымныырҕаталлар, улаатыылара-ситиилэрэ урукку сыллардааҕар бытаан, ‒ дииллэр үлэһиттэр. Олордуллубут оҕуруот астарын суортара эмиэ араастар. Ол курдук, тэпилииссэ иһигэр, аһаҕас халлааҥҥа үүннэриллэр арассаадалар бааллар. Анал тиэхиньикэлээх буоланнар, үгэс быһыытынан ыам ыйын бүтүүтэ Аллараа Бэстээҕинэн, Майанан уонна да атын нэһилиэктэринэн сакааска арассаадалары хото атыылыахтара.
Манна арассаада арааһын бүөбэйдииллэр
Ороссолуодатааҕы суортуур учаастакка бу күннэргэ үлэһиттэр ахсыа буолан тиритэ-хорута үлэлииллэр.
Кылаабынай агроном Маргарита Антонова салайыытынан үлэһиттэр: Эдуард Антонов, Сардаана Федорова, Афросинья Борисова, Евдокия Старостина, Маргарита Федорова, Елена Антонова, Любовь Владимирова уонна Альбина Аргунова буоланнар арассаадалары эргим-ургум бэрийэллэр, харах харатын курдук харыстаан «бүөбэйдииллэр»: сыыстарын ыраастыыллар, буордарын көбүтэллэр, арыый да улааппыттарын улахан иһиттэргэ көһөртүүллэр.
Быйыл суортуур учаастак оҕуруотчуттара идэлэринэн оҕуруот араас көрүҥнэрин астарын суордуттан кулун тутарын ортотуттан саҕалаан олордубуттар. Минньигэс биэрэһи түөрт, помидуору биэс, оҕурсуну үс, хаппыыстаны, хортуоппуйу сүүрбэлии, моркуобу уонтан тахсалыы суорду итиэннэ сибэкки эҥин эгэлгэтиттэн үүннэрбиттэр. Күннэтэ хас биирдии угу кэтээн көрөннөр, анал тэтэрээккэ сурунан, агрономҥа отчуоттууллар эбит.
Үлэһиттэр быйылгы саас айылҕа ураты тымныы, былыттаах күннэр тураннар оҕуруот астарын олордууга уустуктардаах буолла дэһэллэр. Сотору Майаҕа ыам ыйын 24 кү нүгэр кэлэннэр арассаадаларын ортотунан 30‒35-тии солкуобайдыыга атыылыахтара. Оттон бэс ыйын саҕаланыытыгар арассаадалары аны учаастактарга көһөрөн олордуу күрүгүөмнээх үлэтэ саҕаланыаҕа.
Виктория Белолюбская
Майа.