Саҥа сүүрэннэри сайдыыны тобулар дьыалабыай оонньуу бастакы түһүмэҕин киирии чааһын улуус баһылыгын бастакы солбуйааччы, «Министр» оонньуу актыыбынай кыттыылааҕа Павел Сазонов, СӨ экономикаҕа миниистирин солбуйааччы Данил Саввинов уонна оройуон Сэбиэтин бэрэссэдээтэлэ Андрей Находкин салайан ыыттылар.

Улуус ыччаттарын, ыччат дьыалалыгар нэһилиэк исписэлиистэрин, саҥа саҕалыыр пиэрмэрдэри кытта Саха өрөспүүбүлүкэтин уонна бырабыытылыстыбатын айылҕа харыстабылын уонна агро-бырамыысыланнай комплексын департаменын кылаабынай исписэлииһэ Василий Макаров, Ирбэт тоҥу үөрэтэр институт үөрэтэр-чинчийэр сотрудника Александр Жирков, СӨ ыччакка уонна дьиэ кэргэҥҥэ бэлиитикэтин министиэристибэтин бастакы солбуйааччы Василина Лукина, Сыана бэлиитикэтин электроэнергетика, оттук уонна тырааныспар салаатын салайааччытын солбуйааччы Александра Колесова, Инвестбырайыактары оҥорор уонна бэрэбиэркэлиир отдел начаалынньыга Елена Павлова, М.К.Аммосов аатынан ХИФУ инженернэй-техническэй факультетын кафедратын, тутуу тэрилтэтин салайааччы Егор Слободчиков, СӨ Дьиэ-уот коммунальнай энергетикаҕа департаменын кылаабынай исписэлииһэ Валентин Чан, Дьокуускайдааҕы доруобуйа харыстабылын киинин кылаабынай бырааһын солбуйааччы Иван Луцкан, Сиргэ сыһыаннаһыы департаменын кылаабынай исписэлииһэ Мария Александрова көрүстүлэр.

    Кыттааччылар икки хамаандаҕа хайдыһаннар, улуус социальнай-экономическай сайдыытын тыа хаһаайыстыбатын уонна тутууга салаатыгар барыллаан бырайыактары оҥордулар. Улуус баһылыгын тутуу салаатыгар солбуйааччы Александр Куличкин улууска Аллараа Бэстээх сиригэр-уотугар индустриальнай парк бырайыагын сиһилии билиһиннэрдэ, Дьркуускайтан кэлбит ыалдьыттар баараҕай тутуу төһө көдьүүстээх буолуутун ырыҥалаан көрөргө сүбэлээтилэр, ол эрээри Илин эҥэр киинэ буолбут уонна федеральнай суоллар силбэһэр, кэлии-барыы саамай чыпчаала буолбут сиригэр индустриальнай парк тутуллара наадалааҕын ыйдылар. Уопсайынан, өрөспүүбүлүкэ тутаах тэрилтэлэрин исписэлиистэрэ Аллараа Бэстээх сайдар кэскиллээҕин элбэхтэ эттилэр итиэннэ саҥа бырайыактар олоххо киириилэрэ хас биирдии улуус олохтооҕуттан, ыччатыттан, кини хайдах тэриллэн үлэлиириттэн-хамсыырыттан тутулуктаах диэтилэр. Индустриальнай пракаҕа билиҥҥитэ «Монолитстрой» тимиртэн оҥорор тутуу тэрилтэтэ дуогабардаһар баҕалаах эбит. Ону сэргэ Кытай народнай өрөспүүбүлүкэтин Муданьцзян, Хэлуньцзян кудук оройуоннар үлэлэһэр былааннаахтар. Бырайыак быһыытынан кумааҕыга барыта тиһиллэн, дьыаланы-куолуну эккирэтиһии, үлэлиэн баҕалаахтары булуу-талыы, үп-харчы боппуруостара тураллар. 

Улууспут биир сүрүн салаата тыа хаһаайыстыбата буоларынан сибээстээн сүрүн олук ити салааҕа уурулунна. Тыа хаһаайыстыбатын управлениетын салайааччы иван Аргунов тыа хаһаайыстыбата улууска күн-бүгүн хайдах туруктаах үлэлии-хамсыы олоророун сырдатта. Бу салааҕа биир кэскиллээх боппуруоһунан кыһыннары үүнэр тэпилииссэлэри үлэлэтии, оҕуруот аһын кэнсиэрбэлээһин, Хаптаҕайдааҕы комбикормовай собуот үлэтин хайдах гынан атаҕар туруоруу итиэннэ биллэн турар, эт, үүт астары оҥорон таһаарыы, батарыы кыһалҕаларын көрдүлэр. Өрөспүүбүлүкэ бастыҥ эдэр ыччата улууспутун тыа хаһаайыстыбатыгар биир инники күөҥҥэ сылдьар салаалаах улуус быһыытынан ылыналларын эттилэр уонна саҥалыы аныгылыы ныьмаларынан сайдыыга үлэлиэххэ наада диэн сүбэлээтилэр. Оҕуруот аһын тута күүстээхтик тоҥоруу ньыматын туһанарга, хас биирдии тыа хаһаайыстыбатынан дьарыктанар киһи барыс киириитин ааҕа-суоттуу үөрэнэр үөрүйэҕин тарҕатыыга сүрүн болҕомтону ууруохха сөп диэтилэр. Үүтү-эти оҥорон таһаарыыга хас кыра-кыра хас даҕаны түмсүүлэр бааллара оруннааҕын эттилэр. Биир суолталаах хайысханан Абалаах кирээһинэн эмтиир санаторийы көрөн-истэн, инникитин эмтээх бадараан туһатын хайдах дьоҥҥо-сэргэҕэ тарҕатыахха сөбүн туһунан эмиэ кэпсэттилэр. Хара нэһилиэгиттэн саҥа саҕалаан эрэр эдэр пиэрмэрдэр Павел Адамов уонна Владимир Марков уо.д.а. кэлэннэр санааларын атастаһан барбыттара үөртэ.

«Министр» дьыалабыай оонньуу актыыбынай кыттыылаахтара улуустарга тахсаннар оройуоннар сайдыыларын былаанныыр бырайыактары оҥорууга бастакы холонуулара буолар эбит. Өссө бу күн атын хамаандалар Горнай, Хаҥалас уонна Нам улуустарыгар үлэлээбиттэр.

Тохсус сылын тохтобула суох тэрээһиннээхтик ыытыллар өрөспүүбүлүкэтээҕи «Министр» дьыалабыай оонньууга биһиги улууспутуттан биэс киһи: улуус баһылыгын бастакы солбуйааччы Павел Сазонов, «Сири, баайы-дуолу бас билии агентствота» тэрилтэ салайааччыта Дмитрий Тихонов, улуус баһылыгын көмөлөһөөччүтэ Алексей Неустроев, Аллараа Бэстээхтээҕи Тырааныспар техникумун дириэктэрин солбуйааччы Владислав Хабаров уонна улуустааҕы ыччат уонна дьиэ кэргэн управлениетын тутаах исписэлииһэ Зоя Сергучева кыттыыны ыланнар, улууспут сайдарын туһугар сыраларын биэрэннэр үлэлии-хамсыы сылдьаллар.

       

Виктория БЕЛОЛЮБСКАЯ.