Бэстибээлгэ дойду бары муннугуттан 140 кинигэ кыһата, олор истэригэр «Наука», «Молодая гвардия», «Белый город», «Вече», «Росмэн», «Рипол-классик», «Дмитрий Буланин» курдук улахан кыһалар, Украинаттан, Белоруссияттан, Эстонияттан, Киргизияттан, Израильтан уонна Польшаттан бэрэстэбиитэллэр кытыннылар. Бу улахан тэрээһиҥҥэ РФ Бырабыыталыстыбатын бэрэссэдээтэлэ Дмитрий Медведев арыалдьыттарын кытары регионнартан кэлбит кинигэ кыһаларын эрээтигэр анаан-минээн сырытта, көрдө-иһиттэ.

Тэрээһин саамай долгутуулаах түгэнинэн «Кинигэ таһаарыытыгар уһулуччу кылаатын иһин» мэтээли биэс киһиэхэ, олор истэригэр «Бичик» кинигэ кыһатын дириэктэригэр Август Васильевич Егоровка, туттардылар.

2015 сыл түмүгүнэн, 500 тахса араас омук тылынан Арассыыйа иһигэр тахсыбыт кинигэлэртэн 73 кинигэ «Сыл бастыҥ кинигэтэ» куонкурус финалыгар киирдэ. Олор истэригэр биһиги «Бичикпит» икки кинигэтэ ааттанна: Б.Ф. Неустроев - Мандар Уус «Моҕол ураһа» уонна   Г.В., К.Ф. Хатылаевтар «Төрүт дорҕоон» кинигэлэрэ куонкурус дипломаннара буоллулар.  Ону таһынан «Төрүт дорҕоон»  кинигэ РФ Федеральнай Мунньаҕын Судаарыстыбаннай Дууматын Регионнааҕы Бэлиитикэҕэ уонна Хоту дойду, итиэннэ Уһук Илин проблемаларыгар кэмитиэтин Бочуотунай грамотатынан наҕараадаланна.

«Бичик» кинигэ кыһата куонкурус быыстапкатыгар уонна атыыга анаан бородууксуйатын арааһын бар дьоҥҥо таһаарда. Үгүс кинигэбит кинигэни таптааччылар уонна оҥорон таһаарааччылар сэҥээриилэрин ылла. «Любимые сказки народов России» оҕолорго аналлаах кинигэбитин атын эрэгийиэннэртэн сылдьар биир идэлээхтэрбит олус биһирээтилэр, холобур, татаардар 200 кинигэни, чеченнэр 100 кинигэни, тувинецтар 50 кинигэни үлэлэригэр туттаары, холобур оҥостоору тута атыылаһан ыллылар.  Быыстапкабытын ааҕааччы киэҥ араҥатыгар туһуламмыт таһаарыылар эрэдээксийэлэрин эдэр үлэһитэ Вера Макарова сахалыы, нууччалыы, английскайдыы, кытайдыы тылынан ыытан сөхтөрдө. Сахалыы таҥастаах, элбэх омук тылынан иҥнибэккэ саҥарар кыыһы дьон олус сэргээтилэр, көрөөрү тоҕуорустулар, федеральнай ханаал суруналыыстара кытта устан сонуннарга элбэхтик таһаардылар.

Маны тэҥэ бэстибээл кэмигэр биир дойдулаахпыт, билиҥҥи кэм биллиилээх суруйааччыта Владимир Николаевич Федоров саҥа кинигэлэрин сүрэхтэниитэ буолла. Дойду киин куоратыгар бу тэрээһини СӨ Суруйааччыларын сойууһун бэрэссэдээтэлэ Иван Мигалкин салайан ыытта, ааптарга саха быһаҕын бэлэх туттарда.

   

***