Оонньууга барыта 4000-тан тахса (ол иһигэр 2500 спорстмен 38 тас дойдуттан) кыттааччы кэлиэхтээх. Билиҥҥи туругунан, 2616 кыттааччы, ол иһигэр 1863 спортсмен, чопчу кэлэллэрин туһунан биллэрбит. Оонньууларга киирэр көҥүлү 19 хамаанда ылбыт, ол иһигэр 15 тас дойду хамаандалара. Билигин тас дойдулар Оонньууларга уонна Россияҕа киирэргэ көҥүлү ылыылара өссө да бара турар.
Оттон Россия туһунан эттэххэ, барыта аҕыс хамаанда кыттыыны ылыаҕа. Саха сирин икки хамаандатын таһынан Москваттан, Башкортостантан, Татарстантан, Уһук Илин, Сибиир уонна Урал федеральнай уокуруктартан спортсменнар кэлиэхтэрэ.
Алтыс төгүлүн ыытыллар “Азия оҕолоругар” анаан-минээн ЮНЕСКО социальнай эйгэни уларыта тутуу уонна култууралар ситимнэһиилэрин отделын дириэктэрэ Дендев Бадарч, Болгарияттан ЮНЕСКО национальнай кэмитиэтин генеральнай сэкирэтээрэ Мария Донска, ону таһынан Россияҕа Монголия уонна Катар посоллара, о.д.а. кэлэллэрэ былааннанар. Манна сыһыаран эттэххэ, от ыйын 5-6 күннэригэр Дьокуускайга Норуот фронун улахан мунньаҕа буоларынан, Саха сиригэр үгүс ыалдьыт кэлэрин күүтэбит. Ол иһигэр РФ президенэ Владимир Путин кэлэн “Азия оҕолоро” оонньууларга кыттарын кэтэһэбит.
Онон бастакы уочарат бэрээдэги көрүү-истии күүскэ ыытыллыаҕа. “Азия оҕолоро” норуоттар икки ардыларынааҕы оонньуу дирекциятын салайааччыта Владимир Максимов пресс-конференцияҕа иһитин­нэрбитинэн, билиҥҥи туругунан, полиция 500-тэн тахса үлэһитэ спортивнай эбийиэктэргэ турара былааннаммыт. Ону таһынан 300-тэн тахса киһи “контролер-распорядитель” эбээһинэһин толоруохтаах. “Дьиҥэр, араас тэрээһиҥҥэ, эбийиэк иһин көрүүгэ тэрийээччилэр бэйэлэрэ наймылаһан харабыллары туруортуохтаахтар. Ол эрээри билиҥҥитэ биһиги полиция үлэһиттэрин көмөтө суох табыллыбаппыт. Онон Россияҕа “контролер-распорядитель” диэн саҥа хайысха тэрилиннэ. Анал дастабырыанньа ылбыт “контролер-распределителлэр” Москваҕа буолан ааспыт хоккей күрэҕэр бастакыларын үлэлээн көрдөрдүлэр. “Азия оҕолоругар” эбийиэк аайы эмиэ итинник анал үөрэҕи ааспыт үлэһиттэр туруохтара”, — диэн бэлиэтиир Владимир Владимирович. Билигин бу хайысханан ким үлэлиэн баҕалааҕы хомуйа сылдьаллар. Владимир Максимов бэлиэтииринэн, номнуо 500-чэкэ сайаапка киирбит.
Сарсын, ол эбэтэр бэс ыйын 2 күнүгэр, Москваҕа РФ президенин Уһук Илиҥҥи федеральнай уокурукка боломуочуйалаах бэрэстэбиитэлэ, вице-премьер Юрий Трутнев салалтатынан “Азия оҕолоругар” бэлэмнэниигэ улахан мунньах ыытыллыаҕа. Манна тэрээһин бары боппуруостара сиһилии ырытыллыахтара.

***
ИСТОЧНИК - Аграфена КУЗЬМИНА,
"Саха сирэ" хаһыат.