Мантан аллараа кинилэр суруктарын бэчээттиибит:

"Саха Өрөспүүбүлүкэтин Үрдүкү суутугар Уус-Алдан улууһун Лөгөй нэһилиэгин олохтоохторуттан

Көрдөһүү сурук

Иккис төгүлүн талыллан, үрдүк таһаарыылаахтык үлэлии олорор баһылыкпытыгар, Егорова Наталья Васильевнаҕа араас күлүгү түһэриэн, үлэтин атахтыан баҕалаахтар бааллара, биһигини, нэһилиэк  олохтоохторун хомотор уонна долгутар.

            Наталья Васильевна аҕата, Егоров Василий Поликарпович 1965 сыллаахха, партия сорудаҕынан, Уус-Алдан оройуонун Бартыһаан Заболоцкай аатынан колхуоска председателинэн ананан, сатабыллаах, өйдөөх  салайааччы буолан, 3 сыл иһинэн колхуос сүөһү көрүүтүгэр, сир оҥоруутугар үрдүк көрдөрүүлэри көрдөрөн, миллионер колхуос аатын ылан, “Үлэ Кыһыл знамята” орденынан наҕараадаламмыта. Үлэ геройа баар буолбута, элбэх киһи орденнарынан наҕараадаламмыттара, боростуой үлэһиттэр дохуоттанан, олохтон дьолломмуттара. Бөһүөлэкпит улахан тутуулара бу кэмҥэ тутуллубуттара. Ити кэмҥэ Наташа, 12-лээх эрэ кыысчаан этэ, оскуоланы бүтэриэр диэри манна үөрэммитэ. Олоҕун саамай эдэр, кэрэ сыллара ааспыт сирин, иккис дойдутун курдук истиҥник саныыра, сибээһин хаһан даҕаны быспатаҕа.

            Пенсияҕа тахсан баран, хаһан эрэ аҕата өрө таһаарбыт хаһаайыстыбата,  буккуурдаах ыарахан кэмнэргэ, баһылыга суох хаалбыт кэммитигэр, муммут оҕолуу олорорбутун ыарыылаахтык ылынан, чугас дьонун кытта сүбэлэһэн баран, бэйэтин билиитин-көрүүтүн, үлэҕэ баай опытын, саҥа олоххо аныгылыы дьаһанан олороругар көмөлөһөр сыалтан, 2009 сылга нэһилиэк баһылыгар кандидатуратын туруоруммута. Соһуйуу да баара, аҕата үлэлиирин саҕаттан баар кырдьаҕастар, сэмээр үөрбүттэрэ, уруккуларын санаан, сирэйдэригэр сырдьык сыдьаай оонньообута. Бииргэ үөрэммиттэрэ, кини иннинэ, кэннинэ үөрэммиттэр, оскуола саҕаттан лидер хаачыстыбалаах кыыһы билэллэрэ, кэнники араас үлэлэргэ үлэлээбитин истэллэрэ, тэрилтэлэри кэрийэн билсибитин, чуолкай программатын билсэн, дебакка атын кандидаттартан билиитинэн-көрүүтүнэн, культуратынан таһыччы үрдүгүн бэлиэтии көрөн, бу быыбарга кыайан тахсыбыта.

            Наталья Васильевнаны биһиги, олохтоохтор, инникини өтө көрөн үлэлиир, киэҥ билиилээх, сайдыылаах салайааччы быһыытынан билинэбит. Кини үлэҕэ киирээтин, детсад дьиэтэ реконструкцияланан үлэҕэ киирэр. Кулууп дьиэтэ сабыллан, көһөрүллэн, эмиэ реконструкцияланар, республикаҕа соҕотох кэриэтэ благоустроеннай кулууп буоларынан киэн туттабыт. Саҥа модульнай балыыһа, библиотека, почта тупсарыллан киирэллэр. Хомустаахха, Кэптэнигэ сайыҥҥы уу системата үлэҕэ киирэр. Хомустаахха кулууп иһэ-таһа саҥардыллар, Даалыга кулууп дьиэтэ өрөмүөннэнэн үлэҕэ киирэллэр. Хомустаахха саҥа ыһыахтыыр сир, Кэптэнигэ ыһыахтыыр сир бырайыак быһыытынан сыл аайы эбии тутуллар. Үс нэһилиэнньэлээх пууннарга Кыайыы болуоссаттара, Кэптэнигэ эдэр ыччат, тапталлаахтар сквердэрэ оҥоһулуннулар. Кэптэни, Хомустаах генпланнара оҥоһулуннулар, элбэх оҕолоохторго уһаайба бэриллэн, Хомустаахха «Бэстээх», Кэптэнигэ “Кээттийэ” ыччаттар кварталлара баар буолла. Свалкалар, кладбищелар күрүөлэннилэр, бэрээдэктэннилэр. Быйыл «Школа музыки» үлэҕэ киирэн оҕолорбут кэрэ эйгэтигэр үөрэнэн эрэллэр. Хомустаахпыт республикаҕа биир бастакынан ТОС буолан, бэйэтин бэйэтэ  салайынан эрэр. 9 общественнай түмсүүлэрбит хомуллан, НКО Фонд «Соргу» диэн тэринэн, бэйэлэрэ юридическэй сирэй буолан үлэлииргэ былааннана сылдьаллар. Маны таһынан нэһилиэк историятын үөрэтиигэ, ыччаты патриотическай тыыҥҥа иитиигэ улахан болҕомтотун уурар, кулууппут иннигэр нэһилиэкпит аатын сүгэр Лөгөй тойоҥҥо Стела, Кыайыы болуоссатыгар герой ийэлэргэ, орденнаахтарга стендэлэр турбуттара. 2-с төгүлүн «Лөгөй ааҕыыларын» тэрийэн ыыттарда, нэһилиэкпит былааҕа, гербэтэ, гимнэ оҥоһулунна, “Үлэ – чиэс, албан аат” геройбут, орденнаахтар ааттарын үйэтитиигэ сылын аайы сыл бастыҥнара чиэстэнэр буоллулар. Бу барыта кып-кыра, дьарамай баһылыкпыт, Наталья Васильевна аҕыйах сыллаах сорох үлэлэриттэн аахтахха. Өссө хаалбыт болдьоҕор благоустройствоҕа күүскэ үлэлэһэр уонна да атын элбэх былааннардаах. 

Нэһилиэнньэ  Наталья Васильевнаны саҕалаабыт үлэлэрин, ол иһигэр  саҥа таас оскуола,  таас спортзал,  детсад саҥа обьега,  таас квартальнай котельнай, онно олоҕуран бөһүөлэги ититэр систиэмэҕэ  киллэрии  курдук улахан үлэлэри олоххо киллэриэ диэн кинини итэҕэйэн  иккистээн быыбардаабыта.



Онон, нэһилиэк олохтоохторо баһылыкпыт, Наталья Васильевна ыраас аатын харыстыыр, нэһилиэкпит сайдарын туһугар түмсүүлээх буоларбыт туһуттан бу суругу суруйарга күһэлиннибит. Наталья Васильевнаны биһиги дьолбутугар үлэлии кэлбит киһинэн ааҕабыт, история хатыланар диэн мээнэҕэ эппэттэр, аҕата оҥорбутун хатылыыр, өссө сайыннарар кыахтаах киһини бохсумуоҕуҥ, кыахта биэриэҕиҥ, өйүөҕүҥ, көмөлөһүөҕүҥ!!!

30.05.2016с."

***

Aartyk.Ru