Биллэн турар, соһуччута бэрт буолан араллааны таһаарда.

Ньурба улууһун баһылыгын тутарга Дьокуускайтан сөмөлүөтүнэн анал хамаанда тэриллэн тиийбит.

Холуобунай дьыала тэриллээтин кытары, Россия федеральнай ханааллара, агентстволара суһаллык “итии” сонуну тарҕата оҕустулар.  ПОПОВУ утары холуобунай дьыала прокуратура уонна Экономическай куттала суох буолуу уонна коррупцияны утары охсуһар ИДьМ Саха Республикатынааҕы управлениетын бэрэбиэркэтин түмүгүнэн тэрилиннэ диэн, официальнай сайтар иһитиннэрдилэр.

ПОПОВЫ таһынан кини икки солбуйааччыта – ВАСИЛЬЕВ И.А. (экономикаҕа, үпкэ уонна инвестиционнай политикаҕа солбуйааччы) уонна НИКОЛАЕВ Ю.А. (тутууга солбуйааччы) тутуллубуттар. Үлэлиир сири таһынан дьиэлэргэ эмиэ дьэҥдьиир ыытылынна диэн быраабы араҥаччылыыр уоргаҥҥа үлэлиир киһи быктаран аһарда.

Билигин,  бу дьону доппуруостааһын буола турар диэтилэр. “Хайыы-сах дьыала оннуттан хамсыах курдук” буолбут.  

Билигин биллэринэн, ПОПОВУ уонна баһылык солбуйааччыларын утары үс сүрүн холуобунай буруйга уорбалааһын бара турар.  “Тутууга сыһыаннаах үп-харчы хамсааһыныгар олоҕурар”, - диэн уорган киһитэ этэр.

Интернет-форумнарга суруйалларынан,  тутулла илик объектарга мөлүйүөнүнэн сууманы төлүүр туһунан официальнай дьаһалга ПОПОВ илии баттааһына суох эбит. “Ол кэмҥэ суох этим, солбуйааччым ВАСИЛЬЕВ бэйэтэ мин билбэппинэн дьаһал таһаарбыта” - диэн куотунуон сөп диэн “сүбэлээччилэр” бааллар. Оттон ПОПОВ адвоката көмүскэлин 44-с ФЗ ыстатыйатыгар олоҕуран ыытыахтаах дииллэр: “Ол сокуон уһук хоту сир усулуобуйатын уратыта государственнай сакаас оҥоһулларыгар учуоттаныахтаах диэн ирдиир”.   

***  

Санатар эбит буоллахха, сыл саҕаланыытыгар тохсунньуга эмиэ улуус дьаһалтатын дьиэтигэр дьэҥдьиир барбыта. Ол кэмҥэ ПОПОВ Ньурбаҕа суох этэ. Ити итинэн бүппүтэ дии санаабыппыт, сиэлэ-кутуруга бу билигин эмиэ силлиэрэр диэн усках сурах баар.  

Итини таһынан, сайын Ньурбатааҕы культуура управлениетын салайааччыта ИВАНОВА баһылык юбилейыгар 200 тыһ. солкуобайы  бараан эппиэтинэскэ тардыллыбыта диэн баара да, түмүгэ дьон-сэргэ истиитигэр биллибэккэ сүтэн-иҥэн хаалбыта.  

Ньурба оруйуоннааҕы суутун ахсынньы 29 чыыһылатынааҕы уурааҕынан, ПОПОВ Б.Н. дьыала силиэстийэлэнэр кэмигэр СИЗОҕа хараллыахтаах. Ахсынньы 31 күнүгэр сөмөлүөтүнэн Дьокуускайга аҕалыллыахтаах.

“Бастаан, тутуллубут баһылык суукка диэри ханна харалларын быһаарар сууту бэрэстээтэл Дмитрий ИВАНОВ көрөр диэн сэкиритээр биллэрбитэ, онтон киэһэлик Борис АЛЕКСЕЕВ көрөр диэн буолбута, сарсыҥҥытар олох да СЕМЕНОВА судьуйа көрдө”, - диэн ПОПОВУ өйөөччүлэр, буоларын курдук, сааҕыбарга уорбалыыр санаалаах кэпсэтиһэллэр.



Суут күн ПОПОВУ өйөөччүлэр уонна эсердэр миитиҥҥэ тахса сырыттылар. Евгений МАКАРОВ-Өрөкүй Бигэ “миитини көҥүллээбэтилэр – күүспүнэн тахсан эрэбит, сарсын хаайаллара буолуо” диэн “бар дьонун кытары бырастыыласпыт” суруга мессенджеринэн тарҕаммыта. Олус  хаайбатылар ини диэн Бигэҕэ бигэ эрэллээхпит. Ол эрээри ыстараапка түбэһиэн сөп.

***

Aartyk.Ru