***

Хараҥа Куйаар хайа муннугар
Хаайтаран сылдьаҕыан мин Тапталым?
Сындыыстыы субуллар сулус ардаҕар
Мунан сылдьаҕыан мин Сэгэриэм?

Эн биһиккини Айыы таҥара
Бииргит диэн айбытын билэҕиэн,
Сүтэрсэн баран көрсүөхтээх үйэбит
Субурус гынаат сүппүтүн таайаҕыан...

Олоҕум тухары эйиигин күүтэбин
Ол иһин бу сиргэ кэллэҕим
Ыраах баар эн тыыҥҥын таайаары
Салгыҥҥын саатар тутан ылаары...

Параскей.
2015 сыл, балаҕан ыйа - ахсынньы.

***

Табалар куруутун бааллара...
Хотугу сулус халлааҥҥа хам хараҕаланыаҕыттан
Муус Кудулу байҕал маҥнайгы мууһа тоҥуоҕуттан
Дьүкээбил сиргэ таммалыыр сырдырҕас ардаҕыттан
Туундара нэлэмэн истиэбэ халлаанныын уруурҕаһыаҕыттан

Табалар куруук да бааллара
Маҥнайгы лабыкта үнүгэһэ үүнүөҕүттэн
Силлиэлээх буурҕа сиэттиһэ көтүөхтэриттэн
Үтүмэн үйэлэр дьапталҕа буордарыттан
Хайалар сотолоро кылбаҥнаан дьоройуохтарыттан

Табалар куруутун бааллара...
Күн ыйдыын Куйаарга булса иликтэриттэн
Дэриэспэ таастар таҥнары саккырыахтарыттан
Өй-мэйдээх тулуйбат иччилээх тылларыттан
Инчэҕэй эттээх Икки атах төрөөн ырылыйбытыттан

Табалар куруутун баар буолуохтара
Орто дойду олоҕун тутулун тыыннаары...

Параскей.
10.12.15.