- Сокуоҥҥа этиллэринэн, дьокутааттар быһаарыылара - "субъект баһылыгын санаатын учуоттаан туран" ылыллыахтаах, - диэн кини тоһоҕолоон бэлиэтиир.
Ахсынньы 7 күнүгэр диэри Борис ПОПОВ бэйэтин көмүскэнэригэр бириэмэ бэриллэр, ол кини сокуонунан мэктиэлэммит бырааба. Ону таһынан, аны биир ыйынан, ол аата эмиэ аныгыскы ый 7 чыыһылатыгар диэри, республика   Ил Дархана прокурор представлениетыгар уонна дьокутааттар туһаайыыларыгар бэйэтин санаатын хайаан да этиэхтээх. 
Прокурор дьокутааттар мунньахтарыгар бэйэтэ кэлэн быыбарданар сирэй - "А" категориялаах чунуобунньук хаһаайыстыбаннай субъектар Дириэктэрдэрин сүбэтигэр киирэрэ сокуонунан бобулларын, ол сокуону Борис ПОПОВ кэспитин дьокутааттарга  иһитиннэрбит.  ПОПОВ төһө да быһаас Дириэктэрдэр сүбэлэриттэн тахсыбыт да буоллар,  сокуоҥҥа "факт необратимости" диэн өйдөбүлүнэн сибээстээн, сокуону кэһэ сылдьыбыт чахчыта баар буолан - син биир сокуон иннигэр булгуччу эппиэттиэхтээх эбит. Мунньахха кэлбит 17 дьокутааттан 12 дьокутаат Борис ПОПОВКА иһитиннэрии (уведомление) уонна республика  Ил Дарханын аатыгар туһаайыы (обращение) ылыахха диэн быһааран илии баттаабыттар.
- Ама да буолтун иһин 12 дьокутааты хайдах куттаан, күһэйэн илии баттатыахха сөбүй?! Евсеев бэйэтин туһатыгар айдааны тардар диэнтэн мин өһүргэнэбин. Ол иһин прокурору мунньахха кэлэн бэйэҥ дьокутааттарга представлениеҕын эт диэн эппитим. Сокуону оҥорор уорган сокуону тутуһуохтаах, сокуон туоларын хааччыйыахтаах, - диэн Сергей Иванович этэр. 
Оттон суруналыыстар эрдэ-сылла "ПОПОВКА импичмент биллэрбиттэр" диэн этиилэрин олоҕо суоҕунан аахта. "Муниципальнай тэриллии баһылыгын дуоһунаһыттан уһулар бэйэтэ туспа бэрээдэктээх, этэргит курдук "импичмент" ылбычча биллэриллибэт. Барыта суутунан-сокуонан барар", - диэн райсовет спикерэ быһаарар.
***
Борис ПОПОВ "сэтинньи сэттистиир күүрээннээх күнүттэн" саҕалаан ахсынньы ый саҥатыгар диэри сүүрэн-көтөн, тиритэн-хорутан, үҥэн-сүктэн, элэ-была тылын этэн дуоһунаһыгар төннөр быыс-хайаҕас була сатыан сөп. Эбэтэр, саатар эрэ диэн баран сис туттан баран Сибиир ийэ куоратыгар сылаатын таһаара айанныан сөп. Барыта бэйэтин дьыалата. 
Оттон Ил Дархан сынньалаҥыттан кэлэн, үлэтигэр тахсан баран, ааһан иһэн ахсынньы 7 күнүгэр, бу дьыалаҕа бэйэтин санаатын этэн этэрин күүтэбит. "Барыта сокуон быһыытынан" диир буоллахтарына, Ил Дархан сокуону утары ама барыа дуу? Госдума да быыбара чугаһаатар чугаһаан, ыган-анньан, үтэн  иһэр... 
***
Аартык.ру