Бу иннинэ дьоҕус тутуунан дьарыктанар олохтоох дьон 60-ча буолан хомуллан, Ипподром айаҕар көрсүһэргэ болдьоһон мунньуста сатаабыттарын полициялар кэлэн ыһаттаабыттар, тутаттаабыттар диэн сурах баара. Бу түбэлтэ  кыттыылааҕын предприниматель, "Тиэргэн" диэн тутуу тэрилтэлээх, эмиэ итинник ааттаах сурунаал таһаарааччытын - Иван АЛЕКСАНДРОВУ кытары төлөппүөнүнэн кэпсэтэ сырыттыбыт. 
Онуоха АЛЕКСАНДРОВ туох буолбутун маннык быһаарар:
- Соторутааҕыта "Тиэргэн" диэн кинигэ таһаарбытым. Биир кинигэни президеҥҥэ бэлэхтээбитим. Ону Егор Афанасьевич улаханнык сэргээбит  уонна дьоҕус тутуунан дьарыктанар биригээдэлэр салайааччыларын кытары көрсүөн баҕарар диэн эппиттэригэр улаханнык үөрбүтүм. Инньэ гынан, тутуунан дьарыктанар билэр дьоммун кытары "Ватсабынан" кэпсэтэн группа тэриммиппит. Уопсайынан, тутааччылар профсоюзтарын тэрийиэххэ наада, түмсүү баар буолуохтаах диэн санааҕа кэлбиппит. "Ватсапка" группабытыгар сүүһүнэн киһи хото анньан киирбитэ. Сүүһүнэн киһи суругун-бичигин барытын ситэн ааҕарым уустук этэ, онон хантан эрэ туора дьон кыттыһан "харалары утары турунуоҕуҥ" эҥин диэн ыҥырбыттарын хараҕым таһынан аһарбыппын. Онтубут баара бу "Ватсабы" уорганнар кыраҕы харахтарынан кэтии-маныы олороллор эбит. Туох да араапар бөҕө түспүт. Аны, омук общиналара бу группа суруйсуутун саха кэргэттэригэр тылбаастатан баран "сахалар биһигини утары түмсүү тэрийэн эрэллэр" диэн ИДьМҥа эмиэ үҥсүбүттэр. Онон үлэҕэ-хамнаска биир идэлээх дьон профсоюз тэрийээри гыммыппыт маннык айдаанынан эргийэн таҕыста. Анаан-минээн провокатордар диэн бааллар эбит. Олор группаларга киирэн омугу омукка тиксиһиннэрэр ыҥырыылары суруйаллар эбит. Дьэ, олоххо араас буолар диэтэҕиҥ...
Оттон Ипподром таһыгар түмсүүбүтүн полициялар ыспыттара диэн, устудьуоннар уопсайдара, үөрэнэр сирдэрэ чугас баар, онон ити - общественнай сир дэнэр эбит. Биһиги ол кэпсэтии ыытар сирбит "общественнай миэстэ" диэн ааттанарын хантан билиэхпитий. Оттон сокуон хараҕынан общественнай сиргэ элбэх дьону мунньар буоллаххына былаастарга, уорганнарга эрдэ биллэрэн көҥүл ылыахтааххын эбит. Ону ити бэҕэһээҥҥи көрсүүгэ полициялар үчүгэй баҕайытык быһааран биэрдилэр. Уонна общественнай түмсүү тэрийллэр бэрээдэгин чопчулаатылар. Онон арааска сөрөнө сыспыппытын хата өйдөөн сүбэ-ама биэрэн быыһаатылар. 
***
...Манна тугу этиэххэ сөбүй... Бастатан туран, сууту-сокуону, быраабы билэрбит таһыма быстар мөлтөх. Ситэриилээх былааска даҕаны араас департаменнар, кэмитиэттэр, общественнай диэн ааттанар тэрилтэлэргэ даҕаны юридическай өҥөнү көрөллөр аҕай дэниллэр. Ол гынан баран, дьон сокуону билиитин таһыма син биир үрдээбэт.  Иккиһинэн, боростуой дьон "үрдүк сололоох" диэни иһиттэ эрээри Таҥараҕа тиксибит кэриэтэ сананан иннин-кэннин билбэт буола үөрэн хаалан дуу, бэл "экстремизмҥэ"  кытары күтүрэниэр диэри "долгуйар". Үсүһүнэн, ТУТУУ диэн - УЛАХАН ХАРЧЫ. Оттон улахан харчы эргийэр сиригэр элбэх интэриэстээх дьон, бөлөхтөр бааллар. Биллэн турар, ол дьон араас эгэлгэ "профсоюзтар" тэриллэн олохтоммут систиэмэлэригэр орооһоллорун хаһан баҕарар бопсо сатыыллар, сатыахтар даҕаны. Төрдүһүнэн, хас биирдии гражданин социальнай ситимҥэ тугу суруйара (буолаары буолан, сүүһүнэн кыттааччылаах группаларга) тустаах уорганнар кэтэбиллэригэр түбэһэр диэн билэрбит ордук. 
***
Санатар эбит буоллахха, былырыын Ил Түмэн быыбарыгар предприниматель Иван АЛЕКСАНДРОВ Сунтаарга кандидатуратын туруоруна сылдьыбыта. Партията суох кыттар диэн этиллибитэ даҕаны, кинини сунтаардар бэйэлэрэ "сиэрдээхтэр" өйүүллэр диэн суруйа сылдьыбыттара. 
***
Аартык.ру