Хас да сыллааҕыта "саха туһугар муннукка ытыыр" ааттаах политиктыын интервьюлаһан турардаахпын. Ол сахха кырдьык кинини мин эмиэ оннук киһи диэн бүк эрэнэрим.  
Сыллар-хонуктар аастылар. Араас барыта буолла, араас барыта таҕыста. Политиктар солбуллаллар, ким эрэ күөрэйэр, ким эрэ симэлийэр, ким эрэ көһөр-кэлэр. Арай, били киһибит "саха норуотун туһугар ыалдьааччы" кыратык да энчирээбэт. Хата үүнэн-үрдээн иһэр, кинини кытары оппозицияҕа сылдьыбыт дьон бары кэриэтэ политикаттан туорууллар - кини баарын курдук баар. Улуустарга  кини туһа диэн идейнэй өйөөччүлэр кэккэлэрэ бары кэриэтэ төбөлөрө өрө көтөҕүллүбэт курдук дьарыллаллар. Хата, ол дьону олус харыһыйыахпын баҕарабын. Көнөтүнэн сылдьар сордоохтор тумус туттар политиктарын ис дьиҥин билбэккэ былаахыҕа бастарын ууран биэрдэхтэрэ...  
Аан дойду алмаас бизнеһин адьырҕалара кыттыылаах Израильга улахан тэрээһин буолбута. Биһиги республикабытыттан - алмаастаах түөлбэ аатыран бэрэстэбиитэллэр барбыттара. Төннөн кэлэллэригэр дэлэгээссийэ биир киһитэ бүөм кэпсээннээх кэлбитэ: 
- Тель-Авивка биһиги өйдүүрбүтүнэн судаарыстыбаннастарын музейа баар. Онно сырытыннардылар. Ол мунньахха аан дойду түөрт улахан дьиэтин бэрэстэбиитэллэрэ бааллара. Ол иһин эрэ буоллаҕа, биһигини, туора кими да киллэрбэт саалаларын аһан киллэрэ сырыттылар. Улахан эркиҥҥэ ивриттии сурук турар. Кэлин кэпсээбиттэринэн, "Израиль судаарыстыбата атаҕар турарыгар, сайдарыгар өҥөлөөх дьон" диэн эбитэ үһү. Араас дьон мэтириэттэрэ ыйанан тураллар, аһара тилэри буолбатах. Арай... олор быыстарыгар **** мэтириэтэ турар эбит! Наһаа соһуйдум уонна... - баһын быһа илгиһиннэ сиргэ силлээтэ...
... Саныыгын ээ, ити эркиҥҥэ мэтириэтэ ыйаныар диэри төһөлөөх "таптыыр норуотун", Сахатын сирин баайын-дуолун туран биэрбитэ буолуой! Ама атыыланар да баарын да иһин, бэйэтин төрөппүт ийэтин-аҕатын, оҕотун, сиэнин, чугас дьонун төрөөбүт төрүт дойдутун... Дойдута суох дьоҥҥо дойдутун атыылаатаҕа ол...
Ол иһин кини күнэ-күөнэҕэ куруук толору сырыттаҕа...
***
Аартык.ру