НИКОЛАЕВ 1972 сыллаахха Ленинградка төрөөбүт, ийэтэ, дьоно - төрүт үөһээ бүлүүлэр. Ломоносов аатынан Москватааҕы университеты 1994 сыллаахха бүтэрбит, ити сыл РФ Правительствотын иһинэн Норуот хаһаайыстыбатын академиятын дипломун эмиэ ылбыт.  
Үрдүк үөрэхтээх эдэр киһини биир дойдулааҕа Федот ТУМУСОВ аатырбыт "САПИ" фондаҕа үлэҕэ ылар. 1995 сылтан 1998 сылга диэри "Алмаасэргиэнбааҥҥа" бастаан правление чилиэнинэн, кэлин правление председателинэн үлэлиир. Тэҥҥэ "САПИ" ФК вице-президенинэн сылдьар. 
Айсен НИКОЛАЕВ 25 сааһыгар Өлөөнтөн Ил Түмэҥҥэ депутатынан талыллар. Оччолорго ааттаах-суоллаах улахан дьону, уопуттаах политиктары сабырыйан депутат мандатыгар тиксэр. Туһугар туспа сенсацияны таһаарар. 
1997-2002 сс. уонна 2002-2004 сс. икки болдьоххо депутаттаан баран 32 сааһыгар үп миниистирин дуоһунаһыгар ананар. 
2001 сыллааҕы айдааннаах быыбарга, Федот ТУМУСОВ президеҥҥэ талаһар быыбарын штабын салайбыта. Ол да буоллар, "ШТЫРОВ былааһыгар" бастаан миниистирдиир, онтон 2007 сылга  Президент уонна Правительство дьаһалтатын (АПиП) салайааччытынан ананар. АПиП салайааччытын дуоһунаһын суолтатын туһунан тэнийэ барбаппыт - бу киһиттэн республика политическай, экономическай олоҕо быһаччы тутулуктаах, туох баар республикаҕа киирэр-тахсар информация барыта бу дуоһунастаах киһи көҥүлүнэн барар-кэлэр.
ШТЫРОВ республикаттан "соһуччу" тэскилээбитин кэннэ, муҥур дуоһунаска икки сүрүн кандидат аата ааттанар: Егор БОРИСОВ уонна Айсен НИКОЛАЕВ. Кимэ анаммытын билэбит. Ол эрээри   38 сааска президент дуоһунаһыгар чуут-чаат анана сыһыы - улахан ситиһии.
Айсен НИКОЛАЕВ 2011 сылга вице-премьердиир, онтон 2012 сыл кулун тутарыгар Дьокуускай куорат баһылыгынан талыллар. Сүрүн утарылаһааччытынан Владимир ФЕДОРОВ (Ил Түмэн депутата) буолбута. Үһүс миэстэни НИКОЛАЕВ биир дойдулааҕа, билигин коллегата - Анатолий КЫРДЖАГАСОВ ылбыта.
Мээрбит "ЕР" чилиэнэ, өтөрдөөҕүтэ Илья МИХАЛЬЧУК, Михаил ЭВЕРСТОВ кэнниттэн партия региональнай Политсүбэтин сэкиритээрэ буола сылдьыбыта. Кини кэнниттэн вице-премьер Дмитрий ГЛУШКО маннааҕы "ЕР" салайааччытынан анаммыта. 
***
Айсен НИКОЛАЕВ (Сэбиэскэй кэм Горисполкомнарын аахпатахха) бастакы саха мээр. Баһылыкпыт төрөөбүт күнүнэн эҕэрдэлиибит, аартыгыҥ аһаҕас, суолун көнө уонна соргулаах буоллун!
***
Аартык.ру