***
202-с түөлбэни кыйа көтөр оллур-боллур суолунан айаннаан иһэн, массыына ыытааччым суолтан туора ыстаннаран үрдүк кумахха хорус гына түстэ. 
Хап-сабар кууркатын тас сиэбин хастан төлөппүөнүн ылла уонна тарбаҕынан өрө-таҥнары экранын хатайдаан наадалаах нүөмэри булан эрийдэ. Миэхэ эргиллэн баран:
- Көрөөр эрэ билигин, - диэн баран утары сатыы иһэр киһини ыйда, имнэннэ.
Суол кытыытынан киһи иһэр эбит. Кэтэһэбин. Төлөппүөн улахан сибээскэ турар. Абоненыны ыҥырар. Утары сатыы иһэр киһи тохтоон ыстаанын сиэбиттэн төлөппүөнүн хостоото, ким төлөппүөннээбитин билээри экранын кыҥастаста чочумча саараан баран ылла:
- Да!
- Үтүө күнүнэн, N N-ич!
- Дорообо!
- Хайа туох сонун баар? Депутат буолбут үһүгүн дии, эҕэрдэ!
- Махтал... Кимий бу?
- Хайа, доҕор тойон буолан доҕотторгун умнан кэбистиҥ дуу?
- Аа! Димаҕын (холобурга - аапт.) дуо? Олох саҥаҥ куһаҕан баҕайытык иһиллэр. Хайа тугу кэпсээтиҥ, Питергэ туох сонун баар?
- Сонун диэн баһаам буоллаҕа эбээт! Хайа, доҕор иэскин хаһан биэрэҕин? Суут уурааҕын толоруохтаах этиҥ буоллаҕа, приставтартан исполнительнай лиис туппутуҥ ыраатта ини?
- Аллууо, аллуо... - көрөн олорор киһибит төлөппүөнүн кулгааҕыттан арааран ыраатыннарда уонна хаһыытыыр - Аллуо, Дима сибээс дьаабы! Туох диигин?! Аа? - уонна арааран кэбистэ. 
Мин харахпын тиэрэ көрөн кэбистим. Аргыһым:
- Хас сырыы аайы итинник гынар, - уонна утары иһэр киһи массыынаҕа чугаһаабытын кэннэ массыынаттан аа-дьуо утары таҕыста. 
...
Билигин, саҥа таллыллыбыт депутат хайдах балаһыанньаттан тахсар эбит диэн кулгаах-харах иччитэ буолан олордум, түннүк тааһын сэгэттим. 
Сөҕүөх иһин N бэл кыратык эрэ мулук-халык буолла, онтон: 
- Оо, дьоппуон киһини дьээбэлээн! - улаханнык алларастаан күллэ, улахан сууманы иэстээн баран биэрбэккэ сылдьар  өр сыллаах доҕорун (?) кууһан ылла, күллэ-салла уонна быыбарга эрэйдэммитин, киһи бөҕө төлөппүөннүүрүн, улахан иэскэ киирбитин, аһара сылайбытын, массыынатыгар уматык куттарар да харчыта суоҕун, "по нолям" сылдьарын туһунан элбэх-элбэхтик кутан-симэн кэбистэ, харчыланнаҕына хайаан да биэриэм диэн тылыттан саҕалаан, тииһин-уоһун барытын солуок уурда уонна:
- Чэ, пока, солото суохпун, бу дьон кэтэһэн турар, -  диэн баран суолтан туораан дьиэлэр быыстарыгар киирэн  сүтэн хаалла.  
Аргыһым мин диэки хайыһан баран илиитин нэлэттэ. Массыынаҕа киирдэ:
- Дьэ салыҥнаах балык диэн ити баар! Хайдах да туттарбат!
- Сууттаһан кыайан приставтанар буоллаҕыҥ?
- Кыайан. Бу кэлэ сылдьан приставтарга бара сылдьыбытым, иэһин тоҕо ирдээбэккит диэн. Онуоха инспектор кыыс: "Хайа туох да претензиям суох диэн заявление биэрбиккит дии!"- диэн баран мин ааппыттан куһаҕан подделка сайабылыанньаны көрдөрбүтэ.
- Ону?!
- Бэйэм аахсар инибин...
- Аата сүрүн!
***
Кэлин истибитим бу N элбэх киһини итинник "умнуталаан" кэбиспит диэн буолла. Бэл, кыра да сууманы ыллаҕына эргийэн кэбиһэр дьикти майгылаах киһи эбит. Ити мин аргыстаспыт киһибин улахан суумаҕа тэбэн кэбиспит. Суут буолбут - харчыны төнүннэриэхтээх диэн судьуйа уураах таһаарбыт. Ол гынан баран быыбар иннинэ туох баар аньыытын-харатын, иэһин-күүһүн сымыйа сайабылыанньаларынан саптынан кэбиспит. Ол барыта тоҕо эрэ табыллыбыт... Ону таһынан, хас эрэ сыллааҕыта N бастакы кэргэниттэн оҕотун Питерга табаарыһыгар ыыппыт уонна эмиэ УМНАН кэбиспит. Ол оҕо билиҥҥэ диэри "кидайдаммыт" табаарыһыгар олорор диэн кэпсииллэр. 
Дьикти-дьээбэ майгылаах-сигилилээх дьон мандакка тиксэллэр диэтэҕиҥ...
***
Аартык.ру