А.А.НОГОВИЦЫН Кэбээйи-Дьааҥы биир мандаттаах уокуругуттан альтернативата суох кэриэтэ  депутатынан талыллыбытыта. Эрдэ бу уокурукка "Кэбээйи пенсионера" Ылдьыыс саантыы сылдьыбыта эрээри, коммунальщик А.НОГОВИЦЫН өйөбүлэ улаханын көрөн саллыбыт бадахтаах, онон Мииринэй биир мандаттаах уокуругар тиийэн депутакка кандидатынан регистрацияламмыта. Ону НОГОВИЦЫН быыбар иннинээҕи штабын салайбыт, бэчээккэ "политкиллер" диэн ааттаммыт Владимир МАКСИМОВ сырсан тиийэн быыбар хампаанньатыттан сууттаһан ньылбы тардан түһэрбитэ. 
***
"Аартык.ру" редакцията Александр НОГОВИЦЫН фракция салайааччытынан талыллыбытын кэннэ төлөпүөнүнэн кэпсэтэ сырытта:
- Фракция салайааччыта хамнаһа суох общественнай үлэ.
- Оннук.
- Эрдэ депутаттаабыт уопутуҥ суох. Саҥа депутатынан таллыллаат да, фракция салайааччыта буоллуҥ. Кыайыаҥ дуо?
- Туох барыта хаһан эрэ саҕаланар, бастакы үктэллээх, кэмнээх-кэрдиистээх. Бастакы кылааска киирии, бастаан институкка үөрэнии. Киһи сатыырын киһи сатыахтаах диэн өйдөбүллээхпин, онон кыайыам дии саныыбын.
- Ааспыт Ил Түмэн мунньаҕар фракцияны А.МОРОЗКИН салайбыта. Уопсайынан, эн бу иннинэ Ил Түмэн үлэтин, депутаттары кэтээн көрөр этиҥ дуо?
- Мин икки сыллааҕыта Ил Түмэн депутата буолуом да дии санаабат этим. Онон даҕаны уонна бэйэбит да үлэбит элбэх буолан, билинэбин - кэтээн көрбөт этим. Бу парламент 5-с мунньаҕар депутаттаабыт элбэх уопуттаах дьон бааллар. Бэҕэһээ фракция мунньаҕар депутаттар бэйэлэрин көрүүлэрин эттилэр. Егор ЖИРКОВ да буоллун, атыттар даҕаны фракция салайааччыта хайдах буолуохтааҕын, хайдах буолуо суохтааҕын туһунан санаа, сүбэ-соргу курдук тиэртилэр. Дьон санаатын түмэн, сүбэлэһэн үлэлиэхпит дии саныыбын. Ыллым да мин булгуччу "маннык-маннык" үлэлиибин диэн быһа-бааччы эппэппин, барыта кэмигэр көстөн иһиэҕэ.
- Александр Александрович, политическэй олоххор ситиһиини баҕарабыт!
- Махтал.
***
Санатар эбит буоллахха, бэҕэһээҥҥи "ЕР" фракциятын мунньаҕар салайааччы дуоһунаһыгар 35 депутаттан В.ДОБРЯНЦЕВ 8 куолаһы, оттон А.НОГОВИЦЫН 27 куолаһы ылбыта.
***
Аартык.ру