"Аартык.ру" интернет-хаһыакка киирбит информациянан, Бэчээт дьиэтин  "Сахамедиа" холдиҥҥа (генеральнай дириэктэр Кирилл АЛЕКСЕЕВ) бүтүннүү биэрээри соруналлар. Соторутааҕыта ити дьаһалы таһаараары СР правительствотын бэрэссэдээтэлэ Галина ДАНЧИКОВА илэ бэйэтинэн Бэчээт дьиэтин кэлэн көрө сылдьыбыт. ДАНЧИКОВА премьердаабытын тухары бу дьиэни өҥөйө илигэ. Улаханнык туруммут буолан даххаһыйан эрдэҕэ. 
Иккис информация кэпсииринэн, ЯСИА редакцията (салайааччы Петр ВАСИЛЬЕВ) Бэчээт дьиэтигэр көһөн кэлиэхтээх, кинилэр оннуларыгар ДП-2 дьиэтигэр СР Бэчээтин департамена (салайааччы Филипп ПЕСТРЯКОВ) көһүөхтээх. 
Бэчээт департаменын суох оҥороллор үһү диэн сурах бытыгын соспута ыраатта. Бу тэрилтэ суруналыыстыкаҕа, бэчээтинэй бородууксуйаҕа аналлаах тэрээһиннэри иилиирин-көҕүлүүрүн таһынан, сонуну киэҥник тарҕатар тэрилтэлэргэ - улуус хаһыаттарыгар диэн өйдүөххэ наада - бюджеттан көрүллэр үбү тыырар үлэлээх. Ону таһынан, "Саха" НКИК хааһынаттан үбүлэнэр механизмын хааччыйар. Бэчээт департаменын кириитикэлээччилэр чуолаан бу бюджеттан бэчээккэ уонна телевидениеҕэ көрүллэр харчыга өрүү иҥнэллэр. Иирсээн төрдө - харчы буоларын хаһан да умнубаппыт. Ким үптээх-астаах - ол ханна баҕарар хардарсар кыахтаах, бэйэтин политикатын ыытар күүстээх. Ол иһин департамен үбү тыырар функциятын ылыан баҕарар баҕалаахтар харыыта суох элбии-үксүү тураллар. Кирилл АЛЕКСЕЕВ тэрилтэтэ департамент харчытыгар ымсыырарын өйдүөххэ сөп, тута лөглөс гына түһэрэ биллэр. Чааһынай хаһыаттара "Наше время", "Жизнь Якутска", "Криминальный Якутск"  даҕаны туругураллара күүттэриэ суоҕа. 
ДАНЧИКОВА "Штыров киһитэ" диэн ааттанар буоллаҕына, "Сахамедиаҕа" Бэчээт дьиэтин эрэ буолбакка, бэчээккэ, тедевидениеҕэ көрүллэр харчыны Кирилл АЛЕКСЕЕВ тэрилтэтинэн ыытар дьаһалы эмиэ таһаарыаҕа дии саныыбыт.
Тус интэриэстээх дьон Саха сирин сонуну тарҕатар тэрилтэлэрин илиилэрин иһигэр ыллахтарына, олохтоох дьон өйүн-санаатын талбытынан буккуйуохтара. Кими баҕарар быыбардыахпыт, туохха барытыгар сөбүлэһиэхпит. 
***
Аартык.ру