Оттон докумуоннарга тиһиллибэт сонун быһыытынан, президент чөмөх-чөмөх быыбарга сыһыаннаах дьону кытары көрсө сылдьыбыта иһиллэр. Партиянан киирсиигэ, биллэн турар, бэйэтэ баһылаан-көһүлээн сылдьар "ньыгыл" партиятын туһугар кыһаллыбыта иһиллэр, оттон биир мандааттаахха норуот быһаарыытыгар санаатын соҥнооботун эппит, ньурбалар бэйэлэрэ быһаарыстыннар диэн санаалаах диэтилэр. 
Ньурбаҕа санатар эбит буоллахха, бир мандааты 5 киһи былдьаһар. Сүрүн киирсии "ньыгыл" испииһэгинэн билигин Ил Түмэҥҥэ депутаттыы сылдьар, ХИФУ пединститутун дириэктэрэ  Антонина ГРИГОРЬЕВА уонна тутулуга суох депутакка кандидат "Сир" хампаанньалар бөлөхтөрүн генеральнай дириэктэрэ, бизнесмен Анатолий НИКОЛАЕВ икки ардыгар барар. Бу икки улахан кандидат киирсэр уотун быыһылаан Иван АКИМОВ кандидат тахсыам диэн сэрэбиэйдэнэ сылдьара иһиллэр. 
***
Бүгүн күн президент Аммаҕа сылдьыбытын туһунан  кини бэйэтин электроннай портала кэпсиир. Аммалар бу сайын суоллара быстан улаханнык эрэйдэннилэр. Егор БОРИСОВ ууттан эмсэҕэлээбит сирдэри көрдө, 165 миэстэлээх оскуола тутуутугар сырытта уонна Алтан, Сатаҕай нэһилиэк олохтоохторун кытары көрүстэ диэн биллэрэллэр. Ити күн бастакы аҥаарыгар, оттон эбиэт кэннэ Аммаҕа бэйэтигэр сылдьыбыт. Тутулла сылдьар объектары, оскуолалары кэрийбит. Киэһэ нэһилиэнньэни кытары көрсүбүт.
Аммалар быйыл улуустарын баһылыгын талаллар. Сүрүн кандидаттар билиҥҥи улуус баһылыга Александр АРТЕМЬЕВ (икки болдьоххо олорбута) уонна "Аммазернопродукт" генеральнай дириэктэрэ Дмитрий ЛЕВИН. АРТЕМЬЕВ күүһэ "адмресурс" эбит буоллаҕына,  ЛЕВИНЫ дьон эдэр, аныгы толкуйдаах киһи диэн талыахтарын баҕараллар эбит.
***
Аартык.ру