"Патриотизм - убежище негодяев" диэн этии баар. Патриотизымынан сирэйдэнэн бэйэ тус интэриэһин ситиһии, омугу омукка тиксиһиннэрэн биэрии, күөртээһин - политикаҕа даҕаны, олоххо да саамай ньэгэй ньыма. Бу буолаары турар балаҕан ыйын 8 күнүнээҕи араас таһымнаах быыбарга национальнай боппуруоһунан куоһурданан куолас хомуйааччылар элбээтилэр. Холобур, "Биир ньыгыл Арассыыйа" миллиардер Прохоров партиятын утары "национальнай республикалары суох оҥоро сатыыр" диэн дьону утары агитациялыыллар. Прохоровы көмүскүүр да, харыһыйар да санаабыт суох. Баай киһи төбөтүгэр туох киирэрин-киирбэтин айбыт таҥара бэйэтэ билэр. СМИ сымыйалаабат буоллаҕына, Прохоров "регионнары бөдөҥсүтэр процесс  эмискэ буолбакка, кырата  30-чча сыл иһигэр сыыйа оҥоһуллуохтаах, хайаан да олохтоохтор санааларын референдум ыытан билиэхтээхпит" диэн өссө биһиги туспутугар  "кыһаллыбыта" буолбута. Манан диэн эттэххэ, Прохоров олигарх айдааннарга - скандалларга олоҕуран политикаҕа пиарданар ньымалаах. Харчыны ааҕар эрэт политиканы эмиэ бизнес курдук оҥосторо сэрэйиллэр. Урут партия чилиэннэрин спонсордыыр буоллаҕына, билигин төттөрү кини аатынан, кини логотибынан туһанарга чилиэн бэйэтин хармааныттан төлүөхтээх. Бу көстүү бары партияларга барытыгар тарҕанна.
***
Былаас партията  ньүдьү-балайдык дьону албынныыра өһүргэтиилээх. Бөдөҥсүтүү туһунан аан бастаан "ньыгыллар" үҥэр таҥаралара -  Владимир ПУТИН, "кремлевскай кукловод" Владислав СУРКОВ, РФ президенин дьаһалтатын аппаратын салайааччыта, билигин Москва мээрин эбээһинэһин толорооччу Сергей СОБЯНИН уоһуттан төлөрүйэн тахсыбыта. Сэттэ федеральнай уокуруктары тэрийии - бөдөҥсүтүү буолбакка туох буолуой. Эвенкия, Таймырскай, Корякскай, Усть-Ордынскай Бурятскай, Агино-Бурятскай автономнай уокуруктар Пермскэй, Красноярскай, Читинскэй, Камчатскай  кыраайдарга киирбиттэрэ бөдөҥсүтүү буолбатах дуо? Бу национальнай субъектары симэлитэргэ былааска ханнык партия олорбутай? "Ньыгыллары" кытары коммунистар, лдпрдар, аатыгар эрэ "сиэрдээхтэр" Госдумаҕа олорон бөдөҥсүтэр иһин куоластаабатахтара этэ дуо? Аны бу холбонуллар сордоох национальнай уокуруктарга референдум ыытыллыбыта эрээри, тутулуга суох кэтээн көрөөччүлэр даннайдарынан, референдумҥа букатын аҕыйах киһи кыттыбыт. Экспертэр суруйалларынан, национальнай субъектар элиталара быһа Кириэмили кытары дуогабардаһан  норуоттарын дьылҕатын бэйэлэрэ аҕыйах буолан  быһааран кэбиспиттэр. Аны туран, бөдөҥсүтүү экономическай өттүнэн барыстаах диэн этиллибитэ эрээри, хас сыл ааста да бу холбоспут саҥа субъектарга инвестиция "көмүс ардаҕа" түспэтэ Эмиэ эргийэн кэлэн норуоту албыннааһын тахсыбыт. 
Саха сирин экономическэй өттүнэн бөдөҥсүтүү эмиэ бара турар. Харахпытынан илэ көрбөппүт буолан баран, аатырар "Уһук Илин уонна Забайкалье кыраайын социальнай-экономическэй сайдыытын" Госпрограммата - бөдөҥсүтүү биир көрүҥэ. Экономическай өттүнэн инвестиция кэлиэ, олохпут тупсуо диэн үөрэбит-көтөбүт. Оттон национальнай бэйэни дьаһаныы өттүнэн хайдаҕый? Туох баар харчы тыырыллыыта, көрүллүүтэ барыта Хабаровскайга быһаарыллар буоллаҕына, Дьокуускай туохха нааданый? Харчыта суох тугу да кыайан быһаарбат үйэҕэ дьадаҥы республика туохтаах буолан тугун туруулаһыай! "Национальнай элитэбит" биир үтүө күн  Кириэмили кытары "дуогабардаһан" турдаҕына тугу булан ылабыт? Ыйытыы элбэх, харда аҕыйах...
***
Национальнай куоһуру урукку-саҥа "Родина" партия туттан эрэр. ЛАПТЕВ диэн тоҥ-нууччалыы араспаанньалаах  маннаҕы лидер мусульманныы таҥнар саха дьахталларын сүөргүлээн, саха эр дьонун  туһугар өһүргэммитэ буолбутун, "эдьийбит" Тамара Шамшурина портала үөрэ-көтө бэчээттиир. ЛАПТЕВ бастаан бэйэтин дьиэ кэргэнин омугунан састаабын көрүнүөх этэ.
РОГОЗИН диэн "Родина" лидерэ хаһан эрэ биир хара омугу төбөҕө бэстилиэтинэн тирээн турар хаартыскатын интернет ситмигэр быраҕан айдаан бөҕөтө тахса сылдьыбыта. Өссө "Националисты России, объединяйтесь!" диэн ыҥырыытын истэн биһиги Сөдүөт ТУМУУҺАППЫТ "Родинаҕа" киирэн "омугумсуйа" сылдьыбыттааҕа. Хата, ол партията холбоһон-холбоһон билигин саамай "сиэрдээх" Сөдүөт буола сылдьар. 
***
Туох да диэбит иһин, партияларынан арахсыы биһиэхэ сахаларга наада дуо? Тоҕо айдаана, бэйэ-бэйэни сэймэктэспэккэ эрэ, күөн туттар татаардарбыт курдук эйэ-дэмнээхтик  куолаһы үллэстэн кэбиһэр кыахпыт суоҕуй? Ол прохоровтар, рогозиннар, путиннар, мироновтар саха туһугар сэттэтэ да кыһаллыахтара суоҕа. Ону бары билэ-билэ "биһиги партиябыт эгэ эрэ" дии-дии сэриилэһэн оонньуур, мин саныахпар далбаа быһыы. Кириэмил барахсан сарсын ханнык ырыаны ыллаан туруоҕа биллибэт, кими "лидеринэн" аныаҕын таба таайарбыт эмиэ биллибэт. Бары политическэй күүстэри кытары тэҥинэн үлэлэһэрбит, онно дьоммутун киллэрэрбит - хайыҥ охсунуу буолуох этэ. Саха республикатыгар биир эрэ интэриэс туруулаһыллыахтаах -  РЕСПУБЛИКА, САХА НОРУОТУН интэриэһэ. 
***
Аартык.ру