ЭЭБИРИСТЭП "тиритиитэ-хорутуута" суолтата суох буолбут, РФ Үрдүкү Суута Саха сирин суута бу кандидат Мииринэй 21-с №-дээх уокуругун быыбарыттан сөпкө уһулбут диэн быһаарбыт.
Санатар эбит буоллахха, Ылдьыыһы политтехнолог Владимир МАКСИМОВ Мииринэйгэ тиийэ тилэх баттаһан тиийэн быыбар биэтэгиттэн ньылбы тардан түһэрбитэ.
МАКСИМОВ Кэбээйи-Дьааҥы уокуругар Ил Түмэн быыбарыгар кыттар Александр НОГОВИЦЫН штабыгар үлэлиир киһи. НОГОВИЦЫН бэйэтэ "ЖКХ РС(Я)" ГУТ генеральнай дириэктэрэ. Сангаартан төрүттээх коммунальщик Ил Дархан өйөбүлүнэн быыбарга кыттан эрэрэ биллэр. Төрөөбүт улууһугар аныгы хочуолунай бөҕөтүн салайан туттарбыт киһи (дьиҥинэн, судаарыстыба суотугар туттарылыннаҕа дии, кини бэйэтин үбүгэр буолбатах) Кэбээйигэ да, Дьааҥыга да депутатынан талыллар кыахтаах диэн этэллэр. 
Оттон ЭЭБИРИСТЭП быыбарга бастакы сааныытынан төрөөбүт улууһуттан кыттыахтааҕа. Ол гынан баран, тиһэх түгэҥҥэ Ылдьыыс санаата уларыйан  хаалар уонна Мииринэй диэки тэбинэр. Мииринэйгэ тиийэн баран  түҥ-таҥ докумуон туттарбытын политтехнолог МАКСИМОВ тэһэ көрөн суукка үҥсэр. 
МАКСИМОВ анаан-минээн Мииринэй улууһугар тиийбит сыала-соруга - Ылдьыыһы быыбартан туоратыы. Ол иһин да, бастаан Кэбээйи-Дьааҥы уокуругар Ил Түмэҥҥэ кандидатынан турар, онтон ЭЭБИРИСТЭП Мииринэй диэки түһүммүтүгэр онно сырсан баран кандидатуратын туруорунар уонна суукка үҥсэр буоллаҕа. Ол аайы биһиги "саха чаҕылхай уолун" - Ылдьыыспытын харыһыйан сары-ору түһэриэхтээхпит.  
НОГОВИЦЫН анаан-минээн Ылдьыыһы суоһараары политтехнологун ускайдыыр диэҕи, НОГОВИЦЫН политикаҕа саҥардыы атыллыы сатыыр киһи, олус күрдьэҕэни өссө сатыы илик буолуохтаах. Онон букатын "үөһээ хаттаҕастан" суруллубут политическэй оонньуу бара турар диэн сэрэйиэххэ сөп. 
***
Бастакытынан, ТОҔО  Москубаҕа нус-бааччы олорбут, дьыала-куолу буола сылдьыбыт ЭЭБИРИСТЭП соһуччу быыбарынан сүрэхтэттэ, Саха сиригэр кэллэ? Кэллэ кэлээт республика салалтатын туох да баһа-баттаҕа суох үөҕүтэлээн, куллурҕаталаан, бэйэ-бэйэлэригэр тиксиһиннэртээн барар. Быһатын "смута" олохтуур. Ааһан иһэн президеммитин онно-манна барытыгар үҥсэр. Тыастаах баҕайытык "ньыгыллар" ааннарын хайа быраҕар, соннук тыастаахтык хардырҕаччы үктээн аны биир МАКСИМОВЫ - Афанасийы булар, "Гражданскай платформаҕа" сыстар. Ол аайы "гражданскайдар"  быыпсай "ньыгылы"  үөрэ-көтө сыанаҕа таһаара-таһаара ыллат да, ыллат... Быһатын "шоуларыгар" сыһыаран кэбиһэллэр. Ити тухары ЭЭБИРИСТЭП Москубаҕа нэдиэлэҕэ хаста да тиэһин да, тиэһин. Кимиэхэ? Отчуоттуу?

Ылдьыыс урут-уруккуттан - "Бээчэ киһитэ". Оттон чуолаан ол киһи кигиитинэн "Максимов дьыалата" саҕаламмыта. Афанасий МАКСИМОВ уонна Мэхээлэ ЭЭБИРИСТЭП биирдэ туран куомуннаһа түспүттэрин дьон өйдөөбөтөҕө, өйдөөбөт даҕаны: "Бээчэ охсор-тэбэр илиитэ тоҕо, туохтан кэлэн Манчаарыга сыһынна?!" Иккиэн пресс-конференция биэрэллэр, салалтаны үөҕэн куугунаталлар уонна иккиэн тэбис-тэҥҥэ "Ил Дархан буолабыт!" дииллэр. Муҥур дуоһунас хаһааҥҥыттан ылата икки миэстэлээх олбохтоммута буолла? 
Аны, ол быыһыгар "ШТЫРОВ миллиардер ПРОХОРОВТАН "ГП" Дьокуускайдааҕы региональнай отделениетын атыылаһа сатыы сылдьар үһү" диэн сурах тиийэн кэлэр.  ПРОХОРОВ бизнесмен. Онон толкуйа, төбөтүн олоруута хайа барыстаах өттүгэр охтуон сөп. Билигин политика - бизнескэ кубулуйда. Урут, партия киин кэмитиэтэ  регионнардааҕы салааларын спонсордыыр буолара. Биир үксүн партия харчытыгар ымсыыран кандидаттар быыбарга кытталлара. Билигин төттөрү буолла: региональнай отделениелар "москубалар" ааттарын, логотиптарын туһаналларын иһин бэйэлэрэ харчы төлүөхтээхтэр. Ити көстүү бары партияларга барытыгар баар буолла. 
***
Инньэ гынан, биһиги көрдөхпүтүнэ - Ылдьыыс хара маҥнайгыттан Саха сиригэр анаан-минээн "шоулуур" сорудахтаах Москубаттан кэлбит. "ГП" -ҕа даҕаны киириитэ, Мииринэйтэн баран депутаттыы сатыыра, онтон "алҕас" таһааран быыбартан уһуллуута - эрдэ былааннаммыт оонньуу. Госдума депутатыгар диэри үүммүт киһи хайдах докумуон толорору сатаабат буолуоҕай?
 
2015 сыл - Ил Дарханы талар сылбыт. Былдьаһыктаах соло. Баҕалаах киһи кырыы кырыытынан. Кэнники информациянан, баҕалаахтар испииһэктэригэр өссө биир киһи эбиллибит - А.ФЕДОТОВ - Сандаминыч.
Хомсомуол эрдэҕинэ сахалыы саҥарбат бэйэтэ уу сахалыы саҥаран-иҥэрэн туох баар партиялары, общественнай хамсааһыннары бэйэтин былааҕын анныгар түмтэ. "ОНФ РС(Я)" киириэн баҕалаах дьон уочараттаан субуһан тураллар. Сары-саарбах лидердээх Ким-Кимэн "Народнай фронугар" ким киириэҕэй? Урукку "ОНФ"-ны дьаакырдаары, аатын ыытаары москубалар соруйан Ким-Кимэни салайааччынан туруоттарбыттар диэн эмиэ информация баар.
Быыбар хампаанньата саҕаланыытыгар Санадаминыч симик-сэмэй эбит буоллаҕына, билигин атын Сандаминыч көстөр: тото Тойон, кэнэҕэс Дархан курдук сананан кириэһилэҕэ баппат үлүгэрэ. Били маннааҕы дьон бэйэ икки ардыларыгар булумахтаһа сырыттахтарына, 2015 сылга "Москубаттан силистээх-мутуктаах Сандаминыч уолу" сиэтэн аҕалан олордон кэбиһэллэрэ дуу... 

*** 
Аартык.ру