От ыйын 6-гар Туймаадаҕа Ньурба улууһун ыһыаҕа
Вторник, 02 Июля 2013 12:40
Күөх Ньурбаттан төрүттээх, Ньурба улууһугар үлэлии-хамсыы сылдьыбыт дьоһун дьону барыгытын от ыйын 6 күнүгэр, Улуу Туймаада хочотун киэҥ налыы сыһыытыгар - Үс Хатыҥтан барбах тэйиччи (20 км) үрүҥ тунах ыһыаҕы ыһарга биир дойдулаахтаргыт ыҥыраллар.
Бу күн сарсыарда 10 чаастан Опера уонна балет театрын болуоссатын инниттэн түһүлгэҕэ киирэр автобустар эһигини кэтэһиэхтэрэ.
Ньурба улууһун ыһыаҕар нэһилиэктэринэн түһүлгэ тэриллиэҕэ, саха мааны аһын амсайардыы уонна амсатардыы тэринэн-бэринэн кэлэргитигэр сүбэлиибит. Элбэх араас күрэхтэһиилэр, быыстапкалар тэриллиэхтэрэ. Онно кыттыан баҕалаах уруһуйдьуттар, оһуор анньааччылар, талааннаах көмүс тарбахтар үлэҕитин кыбынан кэлэргитин күүтэбит. Үҥкүү тылын этээччилэри, чобуо куоластаах чабырҕахсыттары, көмүс күөмэйдээх тойуксуттары, талааннаах дьоммутун түһүлгэни кэлэн киэргэтэргитигэр ыҥырабыт.
Кэлиҥ, төрүт дойду ахтылҕанын таһаарыҥ, ирэ-хоро кэпсэтиҥ, үүттээх чэйдэ иһиҥ, саламааттаах алаадьытай амсайыҥ, сыалаах мүһэтэ ылыҥ!
***
Тэрийэр кэмитиэт.