"Харбалаахтар быһыттара харан ууга бардыбыт"-  диэн дьон сабаҕалыыр эрээри, МЧС официальнай иһитиннэриитигэр ол туһунан туох да иһитиннэрии суох. Арай, бэс ыйын 9 күнүгэр,  ардах уута киирэн Таатта уонна Баайаҕа өрүстэр ууларын халааннатта диэн сайтарыгар суруйбуттар. Уолбаҕа 15, Ытык Күөлгэ  11, Томторго 20  кэтэх дьиэ ууга барар кутталлаахтар диэбиттэр. Ууга барар дьиэлээхтэри көһөрөр үлэ бара сылдьар диэн буолбут. 
***
Ону таһынан, Амма суола икки сиринэн улаханнык алдьаммытын, Ытык Күөл - Томтор федеральнай аартык эмиэ хас да сиринэн ууга суураллыбыт. Суол оҥоһуллуор диэри дьон куорат диэки айаннаабаттарыгар эппиттэр.
Алдан өрүһү туораабыт дьон кыайан үөс сиргэ кэлбэккэ Томпо улууһугар бадарааны уккуйа сыталлар. Туох да элбэх массыына харан турар диэн онтон редакцияҕа биллэрдилэр.
Аммалар (аҥалах аннараатыгар турар микрорайон) "уоппут барбыта иккис суукката, трансформаторбыт алдьаммыт, суолбут суох, эргиччи уу, дьиэттэн тахсар кыахпыт суох, иэдээн" диэтилэр.  
Бу маннык алдьархай тахсыбытын сыаналыы зампред Анатолий СКРЫБЫКИН, МЧС генерал-майора А.ГОРКУН буоланнар Ми-8 вертолетунан кэрийэ көппүттэр. Ону таһынан Тааттаҕа быыһыыр сулууспа байыастара көппүттэр диэн биллэрдилэр.
...Бачча тымныыга ууга барар, дьиэни-уоту, малы-салы сиик ылара иэдээн да буолар эбит. "Эрэннэрбит" хас да сыллааҕы уот кураан оннугар уу сута буолла диэн дьон айманар. 

***
Оттон Дьокуускай куоракка өр кэмнээх өһүөн эмиэ куһаҕаннык дьайда. Бүгүн мээр солбуйааччыта Дмитрий САДОВНИКОВ тустаах сулууспалары мунньан тэрээһин үлэтин дьүүллэстэ.