***
Чохпутун атыылаан баран, "РИК" ААО тэрийэн, ол нөҥүө социальнай хайысхалаах тимир суол, нэһилиэктэри гаастааһын барда. Тимир суол өссө да балансаҕа ылылла илик, гааспыт ситимнэрэ эмиэ баай-дуол быһыытынан ааҕылла иликтэр. Онон "РИК" ААО ити улахан тутууларга бараабыт харчытын докумуонунан бигэргэтэ илик.  "РИК" ААО үлэтигэр-хамнаһыгар элбэх бутуурдаах боппуруостар бааллар. 40-ча миллиард кэриҥэ харчы төһө көдьүүстээхтик бараммытын билигин федеральнай ревизордар бэрэбиэркэлии сылдьаллар. Элбэх "уу-хаар" тахсыа диэн элбэх киһи сэрэйэр. Билиҥҥитэ "РИК" ААО РФ Национальнай бааныгар 1,5 млрд солкуобай истээх диэн этэллэр.
***
"Фонд будущих поколения РС(Я)" уонна "РИК" ААО бюджеты таһынан тэрилтэлэр. "АЛРОСА" АК сабыылаахтан аһаҕас акйионернай общество буолбут "буруйун саптынаары"  сылын аайы үүнэр көлүөнэ фондатыгар 500 мөл. солк. ыытар. Ол ханна баран сүтэн-иҥэн иһэрин  бэрэбиэркэлиэххэ наада диэн Ил Түмэн депутаттара туруорсаллар. Ревизия бүттэҕинэ, итини билэ сыһарбыт буолуо да, харчыны тыырсыы бастакы саамай барыстаах түһүмэҕэр турбут дьон билигин республикаҕа суохтар. Сүөгэйин холбуйан ылан баран тэскилээбит дьыалалара, оттон билигин эппиэттиир саҕана атын дьон дуоһунаска ананан олороллор. Этэҥҥэ "харчы сиэбит" аатыран, кууһунан "хоруупсуйа хоруоллара" буолан ыстатыйаларга ыйаннахтарына да көҥүлэ.   Сэрэхтээх.
***
Билигин "АЛРОСА" АК 14% (7-лии РФ уонна РС акциялара)  атыытын харчытын ханна барыыбыт диэн боппуруос турар. СР Баайга-дуолга уонна сир сыһыаннаһыыларыгар миниистирэ Евгения ГРИГОРЬЕВА этэринэн, алмаас атыытын харчытын ханна гынарбытын быһаарар хамыыһыйа тэриллиэхтээх. Билигин өлөрүллэ илик эһэ тириитин сүлэри былдьаһар дьон үтүмэннэр. Мииринэй депутата "биһиги оруйуоммут тэрилтэтэ, онон биһиэхэ булгуччу өлүүлүүгүт, чох харчытыттан матарбыккыт" диэн улахан аймалҕаны күөртээтэ. Билигин нерюнгрилар "чохпутун атыылаан баран матардыгыт, илин эҥээрдэргэ биэрдигит" диэн турдулар. Ким төһө күнүүлэһэн туруоҕа биллибэт.
***
Миниистир ГРИГОРЬЕВА этэр хамыыһыйатыгар кимнээх киирэллэриттэн эмиэ тутулуктаах, харчы ханна барарын быһаарарга. "Хамыыһыйа састаабын СР правительствота уонна Ил Түмэн салалтата быһаарар" диэн кини "Саханьюс" порталга этэр. Оттон "АЛРОСА" АК акциятын биир киһи структурата атыылаһар кыаҕын кини уустук диир: " Если вдруг один инвестор решится купить федеральные и республиканские акции «АЛРОСА», размещенные на бирже, для него это будет очень сложный и трудоемкий процесс. Потому что сама по себе процедура и техника их размещения достаточно скрупулезно прописана".
Бүтэһик 30 сылга барыстаахтык эрэ үлэлии олорбут хампаанньаны бас билэр туһугар дуоллар миллиардера батарея быыһынан да киирэн тахсыахтара.
Оттон алмаас хампаанньатын саҥа хаһаайыттара социальнай эппиэтинэһин, урукку "АЛРОСА" курдук тутуохтара диэн эрэнэрбитигэр эрэ тиийэбит.  
***
Инна МАКАРОВА,
Аартык.ру