Ашхабадка маҥан итальянскай мраморынан хаймыыламмыт килэрийбит-халарыйбыт кыраһыабай дыбарыастар, хастыы да минареттаах мечеттэр, фруктовай мастар быыстарыгар ыраас уунан ыһыахтана оонньуур фонтаннар, аныгы моһуоннаах тутуулар, араас дьоһун пааматынньыктар элбэхтэрэ бу дойду кыахтаахтык олорорун ырылхайдык туоһулуур. Кинилэр гааһы, ньиэби тас дойдуларга атыылаан, дохуоттарын улахан аҥаарын киллэрэн олороллор.
Олохтоох төрүт омук олоҕун уйгутун улаатыннарар туһугар бэрисидьиэн Гурбангулы́ Бердымухаме́дов ыйааҕынан, туркменнар электроэнергияҕа, гааска, ууга субсидиянан уонна ый ахсын 200л. бензини босхо туһаналлар!

Сыаналаах мрамор бүрүөһүннээх дыбарыас ахсаана элбэҕинэн Туркменистан киин куората Гиннесс кинигэтигэр киирэн турар. Маннык сайдыылаах дойду сиэр-майгы өртүнэн олус сэмэй. Кэрэ аҥаардар бары быһыыларын-таһааларын сабар уһун былааччыйалаахтар, кэргэн тахса илик эдэр кыргыттар тюбетейка, ыал ийэлэрэ былаат баана сылдьаллар. Ким даҕаны аһаҕас түөһүнэн, кылбайар буутунан куоһур оҥостубат. Сиэр-майгы сатарыйбатын, арҕааҥы дойдулар ыччат өйүн-санаатын буккуйбатыннар диэн Туркменистан үрдүнэн Интернет хааччахтанан, «Facebook», «YouTube» бобуллан, суотабай баар эрээри, «Opera-mini» арахсан турар. Оҕолор кыра саастарыттан сиэрдээх быһыыга-майгыга, үлэҕэ сыстаҕас буола иитиллэн тахсаллар. Илиинэн хас эмит сыл тухары көбүөр ойуутун-мандарын өрөллөр, хлопоктан таҥас таҥан таһаараллар.                     

Манна балаҕан ыйын 23-26 күннэригэр VIII Аан дойдутааҕы кинигэ быыстапката буолан ааста. 80 омук сириттэн 200 кыттааччы кинигэ арааһын тэлгэтэн, биир идэлээхтэрин кытта уопут атастаһан, конференцияҕа санааларын үллэстэн кэллилэр. Бу киэҥ түһүлгэлээх тэрээһиҥҥэ Сахабыт сириттэн «Бичик» кинигэ кыһатын дириэктэрэ Август Егоров,  сүрүннүүр эрэдээктэр Валерий Луковцев, эрэдээктэр Моника Колесова сиһиилээхтик кыттан кэллилэр.

Быыстапка иһинэн ыытыллыбыт научнай-практическай конференцияҕа «Бичик» салайааччыта Август Егоров тыйыс усулуобуйалаах, киэҥ-куоҥ иэннээх Саха сиригэр кинигэни таһаарыы, тарҕатыы туһунан кэпсээнин олус сэргээн, сөҕө-махтайа иһиттилэр. Манна Америка, Европа, Азия дойдуларыттан, ол иһигэр Венгрияттан, Турцияттан, Кореяттан кинигэни таһаарааччылар сирэй көрсөн, атах тэпсэн олорон, үлэҕэ уопуттарын үллэһиннилэр. Быыстапка кыттыылаахтара уонна ыалдьыттара «Бичик» таһаарар кинигэлэрин сэргии-сэҥээрэ көрдүлэр, сахалар кинигэлэрэ элбэҕин, дьэрэкээнин сөхтүлэр. «Бичиктэр» Германия, Кыргызтан, Кытай, Россия кинигэ таһаарар кыһаларын кытта инникитин бииргэ үлэлэһиэх, саҥа-сонун бырайыактары олоххо киллэриэх буолан, кэскиллээх кэпсэтиини ыытан кэллилэр. Ол аата инникитин саха кинигэтин тас көстүүтэ, ис мандара, уопсай оҥоһуута өссө тупсан, өссө үрдүк чыпчаалы дабайар чинчилээх.   

«Кинигэ – сайдыы уонна бииргэ үлэлэһии тосхоло» диэн VIII Аан дойдутааҕы кинигэ быыстапкатыгар «Саха сирин иллюстрированнай атлаһа» научнай-популярнай түһүмэххэ кыайан, I степеннээх дипломунан наҕараадаланна. Үөрүүлээх түгэҥҥэ Валерий Николаевич «Түүр омук үлтүркэйэбин» диэн Наталья Харлампьева хоһоонун дорҕоонноохтук аахпытын, түүр тыллаах аймахтарбыт сэргии истэн, дохсун ытыс тыаһынан көрүстүлэр.

Туркменнар кинигэлэрин илиигэ ылан көрдөххө, илиҥҥи дойду буоларын быһыытынан, оһуору-мандары дэлэгэйдик тутталлар эбит. Бэрисидьиэннэрин үҥэр таҥара оҥостоллоро тута көстөр: хас тэрээһин көстүүлээх миэстэтигэр, кинигэ сүрүн сирэйигэр, бэл диплом шкатулка курдук хаатыгар Гурбангулы́ Бердымухаме́дов хойуу хара хаас быыһынан арылхай истиҥ мичээрэ киэргэтэр.  

5 мөлүйүөнтэн тахса нэһилиэнньэлээх Туркменистан сылга 300 кинигэни бэчээттээн таһаарар эбит буоллаҕына, 1 мөлүйүөн нэһилиэнньэлээх Сахабыт сиригэр «Бичик» сылга 400 кинигэни бэчээттиир. Тымныы кыһыннаах тыйыс айылҕалаах дьон аан дойду таһымыгар үрдүк полиграфическэй хаачыстыбалаах бородууксуйаны омуктартан итэҕэһэ суох, атыттары куоһара даҕаны кинигэ бастыҥын оҥорон таһаарарбытын сөхтүлэр. «Бичиктэри» батыһа сылдьан 3D карталаах атлаһы хайдах оҥорбуппутун иҥэн-тоҥон туран ыйыталастылар.    

Туркменистан сылын аайы бэйэтэ үбүлээн, суолларын-иистэрин төлөөн, кинигэ таһаарааччылары биир түһүлгэҕэ мунньар. Орто Азияҕа олохтоох түүр амахтарбытыгар «Бичиктэр» биһирэнэн, үрдүктүк сыаналанан, аны сылын аайы ити быыстапкаҕа кыттар санаалаах төрөөбүт дойдуларыгар эргилиннилэр. 

  ***

Марианна Тыртыкова.