«Эм» бааһынай хаһаайыстыбата республика агрооскуолаларын тирэх базаларынан буолуон сөп

Суббота, 14 Апреля 2012 21:59
Оцените материал
(0 голосов)

1H2R9247Ил Түмэн вице-спикерэ, Саха сирин агрооскуолаларын Холбоһугун сүбэтин президенэ Александр Жирков муус устар 12 күнүгэр «Эм» диэн республикаҕа биллиилээх бааһынай хаһаайыстыба салайааччыларын кытта көрсүстэ.

Эм Григорий Федорович уонна Мария Николаевна бааһынай хаһаайыстыбаларын 2004 сыллаахха тэрийбиттэрэ. Бу хаһаайыстыба бүгүн Дьокуускай куорат таһынааҕы биир саамай туруктаахтык уонна ситиһиилээхтик үлэлиир аграрнай тэрилтэнэн буолар.

Кэргэннии бааһынайдар депутакка кэпсээбиттэринэн, кинилэр тэрилтэлэрэ оҕуруот аһын (оҕурсуну, помидору, баклажаны, сүбүөкүлэни, моркуобу, переһи, редьканы), хортуоппуйу, хаппыыстаны, бахча культураларын (арбуһу, дыняны) теплицаҕа да, аһаҕас да буорга үүннэриинэн дьарыктанар. Аны кукурузаны үүннэриигэ боруобаламмыттар. 2009 сыллаахха Эм хаһаайыстыбата 1 гаттан 5000 центнер хортуоппуйу ылан, уһулуччу ситиһиилэммит. 2010 сыл түмүгүнэн АПК үлэһиттэрин республикатааҕы күрэхтэһиилэригэр «Бастыҥ оҕуруот аһын үүннэрэр бааһынай хаһаайыстыбата» номинацияҕа кыайбыттар. 2011 сыллаах үлэ түмүгэ эмиэ үчүгэй: 66 га сиртэн 3019 тонна оҕуруот аһа хомуллубут, гаттан 457,4 центнер ылыллыбыт. Хаһаайыстыба 700 тонна киирэр аныгылыы оҥоһуулаах овощехранилищелаах, быйыл өссө биир оннук объегы тутан үлэҕэ киллэрэр былааннаахтар. Маны таһынан, оҕуруот аһын переработкалыыр сыаҕы тутар санаалаахтар. Дьокуускай куорат ырыынагар атыыланар оҕуруот аһын 60%-на бу тэрилтэҕэ тиксэр.

Көрсүһүү кэмигэр Ил Түмэн вице-спикерэ Александр Жирков бородууксуйаны батарыы хайдах ыытылларын ыйытта. Григорий Эм кэпсээбитинэн, тэрилтэлэригэр 30 киһи үлэлии сылдьар, оҕуруот аһын «Туймаада-Агроснаб» ААО, «Агротекс» ААО нөҥүө, Дьокуускай маҕаһыыннарыгар, ырыынактарыгар атыылыыр эбиттэр. «¥лэни сатаан тэрийиэххэ наада, биһиги бородууктаны оҥорон таһаарыынан эрэ буолбакка, батарыынан эмиэ сатаан даьрыктаныахтаахпыт», - диэтэ бааһынай хаһаайыстыба салайааччыта. Бүгүҥҥү туругунан, 1,5 мөл. устуука оҕуруот аһын рассадата бэлэмнэниллибит: арбуз, хаппыыста, баклажан, оҕурсу, помидор уо.д.а. Рассадалара 1 гектар сири ылар, барыта 30 киһи үлэлиир. Ыам ыйын 10 күнүгэр хортуоппуйу олордор былааннаахтар, бэс ыйын 1 күнүгэр – арбуһу.

Александр Жирков кэргэнниилэргэ республика агропрофилированнай оскуолаларын үлэтин туһунан кэпсээтэ. Кини бэлиэтээбитинэн, холбоһук үөрэх, тыа хайаайыстыбатын уонна ас-үөл политикатын, урбаан дьыалаларыгар уонна туризм сайдыытыгар министерстволары кытта ыкса сибээстээх үлэлиир. «Агрооскуолалар үлэ тэрилтэтэ буолбатахтар, кинилэр үлэлэрин түмүгэ төһө ыһар сирдээхтэринэн, үүнүү, ыам көрдөрүүлэринэн сыаналаммат. – диэн тоһоҕолоон эттэ агрооскуолалар Холбоһуктарын президенэ. – Ол гынан баран, оскуола учаастактарыгар, бааһыналарыгар дьарык оҕоттон тустаах үөрүйэҕи, сатабылы ирдиир. Агрооскуола бастыҥ, инники күөҥҥэ иһэр технологиялары баһылыырга, эксперименнэри, бизнес бырайыактарын олоххо киллэрэргэ дьулуһар». Кини этэринэн, маныаха республика бастыҥ бааһынай хаһаайыстыбатын үлэтин опыта, сиргэ, үүнээйигэ, үлэҕэ сыһыана, кыһамньыта холобур буолуон, улаханнык көмөлөһүөн сөп. Александр Жирков «Эм» бааһынай хаһаайыстыба салайааччытыгар Григорий Федоровичка республика агропрофилированнай хайысхалаах оскуолалаларын базовай тэрилтэтинэн буоларга этиини киллэрдэ. «Биһиги эһиги хаһаайыстыбаҕыт таһыгар сайыҥҥы үлэ уонна сынньалаҥ лааҕырын тэрийэн, онно 1-2 сезоҥҥа улуустааҕы агрооскуолалар үөрэнээччилэрин ыҥырдахпытына, туһалаах буолуо этэ», - диэтэ Александр Николаевич.

Ил Түмэн вице-спикерин бу идеятын хаһаайыстыба салайааччылара бэркэ сэҥээрдилэр. Республика агропрофилированнай оскуолаларын Холбоһугун президенэ уонна бааһынай хаһаайыстыба салалтата бииргэ үлэлээһин туһунан дуогабар барылын бэлэмнээн агрооскуолалар Холбоһуктарын көрүүтүгэр киллэрэргэ быһаардылар.

Ил Түмэн пресс-сулууспата.


Добавить комментарий

Защитный код
Обновить

Aartyk.ru