Ахсынньытааҕы Госдума быыбарыгар бэлэмнэнэн «ньыгыллар» «праймериз» диэн ааттаан дьоҕус быыбардары ыыппыттара. Төһө да,  «норуот талар» диэн хаһыатынан, телевизорынан этилиннэр, чуолаан ханнык норуот кимнээҕи талара эрдэттэн бэлэмнэммит сценарийа суруллубутун туһунан интернет сайтар суруйан тураллар. Ол курдук, Госдума дьокутаатыгар кандидаттарынан Юлия Песковскаяны, Георгий Балакшины «кулгаахтарыттан» тардан өрө таһаардылар. Нерюнгритааҕы праймеризка харабыллара суох аанынан дьиҥнээхтик боростуой дьон киирэн хаалан улахан мучумаан тахсыбыт. Дьиҥнээх норуот туруорсуута суоһуттан саллан, атын праймеризтарга үс бүк харабыл туруорбуттара биллэр. Ол да үрдүнэн, Покровскайга Ил Түмэн спикерин Виталий Басыгысовы «тугу да оҥорботуҥ» диэн сирэй-харах анньан улаханнык өһүргэппиттэр.
Праймериз түмүгүн көрөн кыйахаммыт дьон элбэхтэр. Көннөрү киһиэхэ ити тэрээһин ыытыллар суугуна, сүпсүлгэнэ, түмүгэ көннөрү тыал тыаһын эрэ курдук иһиллэр. «Ким эрэ, туохха эрэ кыттар». Оттон «ньыгылларга» -- бэйэлэрин истэригэр ити праймериз улахан айдаан төрдүн төлө тарта. Госдума депутатынан буолуон баҕарбатах да дьон «намыһах рейтиннэрин» көрөн бэрт былдьаһыылара күөртэннэ. Эбиитин президент «политик норуокка дьиҥнээх рейтинэ көһүннэ» диэн этиитэ уокка арыы кутан биэрбиккэ тэҥнэннэ. Былаас баартыйатыгар былаастаах дьон сырыттахтара, оттон былаастаах дьон үтүөмсүйэр, сананар майгылара былыр-былыргыттан баар көстүү. Ким эрэ кини иннин быһа түһэрин ыарыылаахтык ылыналлар.
Госдума билиҥҥи ыҥырыылаах мунньаҕын депутата Михаил Эверстов иккистээн депутат дуоһунаһыгар дураһыйарын туһунан билэбит. Михаил Ильич ол санаатын кистии сатаабат, ыһа-тоҕо суруналыыстарга кэпсиир-ипсиир, интервью биэрэр. Уол оҕо одьунааһа праймеризкэ бэйэтинэн кэлэн кыттан, рейтинин үрдэтэн «10 чулуу политик» ахсааныгар күүһүнэн соҥнонон киирбитэ. Ол да буоллар 10 иһигэр киирбитиҥ да иһин, Госдума депутата буоларыҥ өссө сир саарбах. Ол иһин Эверстов Кириэмил аанын хайа сылдьара иһиллэр.
Биир өттүнэн, Дмитрий Глушко бэҕэһээ тэрийэ сатаабыт политсүбэтин мунньаҕа, быыбарга киирсэр баартыйа испииһэгин бырачыастааһынтан тахсыбыт буолуон сөп. Бу айылаах улахан быыбар ыы муннуга анньан кэлбит кэмигэр дьон «уоппускалана» оонньуу сылдьара киһини итэҕэппэт. Эбэтэр «ньыгыллар» тугу да улахаҥҥа уурбат буолан, мунньахтарыгар кэлбэтэхтэр диэҕи эмиэ да бары, дьиҥинэн, дьиппиэн, дьоһуннаах дьон. Араас төрүөтү эргитиэххэ сөп эрээри, «Биир ньыгыл Арассыыйа» олохтоох салаатын салайааччыта, политсүбэтин сэкиритээрэ Дмитрий Глушко тэрийэр, итэҕэтэр, көҕүлүүр кыаҕа тутах соҕус эбит. Ону тустаах салалтата даҕаны, бүгүн, Д.Глушкону уонна А.Андрееваны сөмүйэтинэн ыйан көрдөрбүтэ да туоһулуур.