Дьокутааттарга спортивнай таҥас барсар дуо?

Воскресенье, 08 Апреля 2012 08:33
Оцените материал
(0 голосов)

IMG_2974Дьокуускай дьокутааттарын хамаандатын хаппытаана Александр Саввинов уҥуоҕунан да, ыйааһынынан да барыларын лаппа баһыйталыыр. Саввинов волейболист аатырар. Онон волейболга тэҥнээҕин булбата. Мээчигин эрийэн-буруйан биэрэн, быһан утарылаһааччыларын салыннарар. Эчи улахана-хаара, утары сүүрэн кэллэҕинэ киһи да сүрэҕэ хайдыах...

Муус устар 7 күнүгэр,  Кыайыы 50 сыла спорт дыбарыаһыгар 12 улуус мунньахтарын уонна Дьокуускай куорат Думатын дьокутааттара спорт 5 көрүҥэр күөн былдьастылар.

Күннэтэ көстүүм кэппит, хаалтыс бааммыт дьокутааттарбытын бу күн спортивнай таҥастаах көрөттөөтүбүт. Манан диэн эттэххэ, дьоммутугар шортик, футболка сорохторугар син барсар эбит. Хамаандалары спикердэр салайдылар.

Хамаандалар спартакиада аһыллар сиэригэр-туомугар параадтаан кэчигирэһэн турдахтарына, суруналыыстар бэйэбит испитигэр туспа күрэхтэһии ыыттыбыт. "Саамай спортивнай көрүҥнээх хамаанда" диэн номинацияны Горнай уонна Ньурба дьокутааттарыгар биэрдибит. "Саамай "ыйааһыннаах" састааптаах хамаандаҕа" - бүлүүлэри уонна таатталары (баҕар, араҕас өҥнөөх футболкалара соноппута оччо  дуу) киллэрдибит. Таатта хамаандатыгар дьахталлар элбэхтэрэ харахха быраҕылынна. "Саамай дьоһуннаах хамаанда" номинацияҕа чурапчылар киирдилэр. "Барыыһаптар" параад кэмигэр даҕаны, суолталарын билинэн кыратык даҕаны мичик гынан ааспатылар. Сурах быһыытынан, Чурапчы дьокутааттара формаларын Москубаҕа сакаастаан тиктэрбиттэр. Онон таҥастара-саптара - комплект: куурка, ыстаан, футболка, шортик, сэлиэччик, киэпкэ, наскы, маайка, кроссовка - барыта биир стииллээх диэтэҕиҥ.

"Саамай сэмэй, симик хамаанда" аатын суруналыыстар Хаҥалас дьокутааттарыгар иҥэрдибит. Муора долгуна өҥнөөх футболкалаах, интеллигентнэй көрүҥнээх бытыгырас уолаттартан биир улахан уҥуохтаахтара - саахымакка кыттар диэн буолла. "Якутия" холдинг генеральнай дириэктэрэ Афанасий Ноев бу хамаандаҕа саамай көхтөөх кыттааччы буола сылдьар эбит.

Үөһээ Бүлүү хамаандата аҕыйах да буоллаллар,  биэс көрүҥ түмүгүнэн  иккис миэстэҕэ тахсыбыттара. Кинилэр ортолоругар биир идэлээхпит Муттуххай Бороҥ баар. Валерий Васильев төрөөбүт дойдутугар тиийэн дьокутааттыы сылдьарын  көрөн үөрдүбүт.

***

Дьокуускай дьокутааттарын хамаандатын хаппытаана Александр Саввинов уҥуоҕунан да, ыйааһынынан да барыларын лаппа баһыйталыыр. Саввинов волейболист аатырар. Онон волейболга тэҥнээҕин булбата. Мээчигин эрийэн-буруйан биэрэн, быһан утарылаһааччыларын салыннарар. Эчи улахана-хаара, утары сүүрэн кэллэҕинэ киһи да сүрэҕэ хайдыах... Саввинов Михальчук саҕаттан дьокутааттыыр, онон биилигэр "үлэтин чэрэ" коллегаларынааҕар көстөр.

Дьокутааттар былаах тутааччылара вице-спикер - Алексей Гусев ("Акварель" эргиэн киинэ). Дьыралдьайын спорт площадкатыгар аһара барсар көрүҥнээх. Гусев Думаҕа да улаханнык саҥата иһиллибэт буолааччы, бу да сырыыга бэйэтин майгытыгар сөп түбэһэр спорт көрүҥэр элбэх саҥата суох - буулдьанан ытыыга кииристэ.

Антонина Эверстова кыраһаабысса-дьокутаат спортивнай көстүүмҥэ сөрү-сөп эмиэ киирэн хаалбыт. Волейболлаан эр дьонтон хаалсыбат.

Александр Данилов ("Центральнай" к/т) былырыын теннистээн 5-с миэстэ буолбут, быйыл "өйгүнэн үлэлээ" диэбиттэр быһыылаах саахымакка туруорбуттар. Джурович спартакиада быыһыгар Афанасий Максимовы көмүскүүр миитиҥҥэ баран Ойуунускай памятнигын иннигэр тыл этэ охсон кэлэр-хайыыр. Быһатын, активнай дьокутаат.

Остуол тенниһигэр бу сырыыга Семен Филиппов (Гипрозем, политик Василий Филиппов быраата)  дьокутаат дьокуускайдар чиэстэрин көмүскээбит. Хайдах оонньообутун сиһилии билиэххитин баҕарар буоллаххытына, Гордума сайтыгар киирэн көрүөххүтүн сөп.

Футболист-дьокутаат Константин Федоров волейболлуу сылдьан футбол элеменнэрин киллэрэн оонньууну биллэ сэргэхситтэ, көрөөччүлэри күллэртээтэ. "Мээчик ханна түһэрин көрөөрү төҥкөйбүтүн баара... төбөбөр кэлэн түспүт эбит", - диир.

Биир спортивнай көрүҥнээх иҥиир-ситии дьокутаат - Анатолий Кырдьаҕааһап волейболлаан, уһуну, ырааҕы ыстанан элэгэлдьийэн олорор. Коммунальнай эйгэҕэ бытаан киһи тугу ситиһиэй, онон мээр быыбарын иннинэ эппитин курдук, Анатолий Андреевич ОДьКХ эндирин 20-ччэ сыл билбитэ көстөр: биир да кыраам ордук-хоһу сыстыбатах эттээх-сииннээх.

Дьокутааттар хайдах наар биир кириэһилэҕэ хатан олоруохтарай, сыл баһыгар-атаҕар маннык мустан күрэхтэһэллэрэ бэйэлэригэр даҕаны, көрөөччүлэргэ даҕаны олус үчүгэй, көрдөөх, сороҕор көрүдьүөс да түгэннээх эбит.

***

Спартакиада аһыллар-сабыллар сиэригэр саха эстрадатын артыыстара кытыннылар. Ол быыһыгар хомусчут кыыс Дьүрүйээнэ, "олохтоох Кобзон" - Анатолий Бурнашов дьокутааттарга анаан кэнсиэртээтилэр. Бурнашов хааһын түрдэстэ-түрдэстэ: "Күлүҥ-оонньооҥ, доҕордоһуҥ, Ким доҕордоох ол дьоллоох!" - диэн дьокутааттарга "бирикээстээтэ". Хаарыан ырыаһыт сыанаҕа таҕыстаҕына дьэбин уоһуйа түһэрэ хомолтолоох.

***

Чэ, ситигирдик диэн туран, дьокутааттар күөн көрсүһүүлэрин түмүгэр, биэс көрүҥ кэнниттэн  1 миэстэни - Дьокуускай куорат Думатын дьокутааттарын хамаандата ылла, 2 миэстэни - үөһээ бүлүүлэр, 3 миэстэни - намнар ыллылар,  4 миэстэҕэ - мэҥэлэр, 5-скэ - ньурбалар таҕыстылар.

 ***

P.S.: Ньурбалар маннык хабааннаах күрэхтэһиигэ бастакы кыттааһыннара, 12 хамаандаттан 5 иһигэр киирии - олус үчүгэй көрдөрүү, онон дьокутааттар улуустааҕы мунньахтарын бэрэссэдээтэлин Сергей Евсееви эҕэрдэлиибит!

 

 

Добавить комментарий

Защитный код
Обновить

Aartyk.ru