Айсен Николаев инаугурациятыгар 300-тэн тахса киһи сырытта диэн барыллаан аахтылар. Ханнык баҕарар үрдүк дуоһунаска ананыы кэнниттэн эргимтэ ахсааныгар ким киирэрин таайыы саҕаланар. Мээрийэҕэ барыта 620-ччэ киһи үлэлиир. Бу дьонтон инаугурацияҕа бары ыҥырыллыбатылар.
Биллэн турар, оннук да буолуохтааҕа, Саха театрын миэстэтэ 200 эрэ. Ыҥырыллыбатах дьон ахсааныгар киирбэтэх мээрийэ үлэһиттэрэ үлэбититтэн тохтотуллар буоллубут диэн хом санаабыттара иһиллэр. Кинилэри сэргэ, ытык кырдьаҕастар Сүбэлэрэ, социалистическай үлэ дьоруойдара ыҥырыы туппакка эмиэ хомойбут тыллара-өстөрө иһиллэр.
Биир өттүнэн, мээр дуоһунаһыгар үктэнии сиэрэ-туома, эбэтэр улахан саалаҕа – Опера уонна балет театрыгар тэриллиэхтээҕэ эбитэ буолуо. Иккис өттүнэн, аһара далааһыннаныы, аны, өссө үрдүкү салалта хараҕар олуонатык көстүөн сөп диэн сэрэхэдийии эмиэ баһыйдаҕа. Били, бокуонньук Виктор Черномырдин эппитинии, «үчүгэйи баҕарбыппыт, биһиэнэ биһиэнин курдук буолла» дииринии таҕыста. Оннооҕор аймах иһигэр уруу тэрээһинигэр ыҥырыллыбакка хом саныыр дьон булгуччу көстөллөр.
Бэҕэһээ дьон тоҕуоруспучча кэпсээн-сэһэн тэнийдэ. Ол курдук саҥа баһылык солбуйааччыларын аатын ааҕан кэчигирэттилэр. Сурах быһыытынан, солбуйааччыларын «испииһэгэр» Е.Н. Федоров, П.С. Ефремов ааттара ахтыллар. Оттон мээр аппараатын салайааччытынан Афанасий Ноев кандидатурата көрүллэр диэн этэллэр.
Кыым.ру
