Баһылай Винокуров-Кыталык Уйбаан «Кыталык» үҥкүү бөлөҕүн өрө көтөҕүүлээх, эрчимнээх хамсаныылаах сүр көтөҕөр үҥкүүлэрин астына-дуоһуйа көрдүбүт-иһиттибит. Владимир Кузьмин салайааччылаах «Манчаары» дүҥүр дорҕоон бөлөҕө барабааннарын күүстээх ритмнээхтик охсубут тыастара көрөөччүлэр сүрэхтэрин тэбиитин, хааннарын сүүрүүтүн биир киһи курдук биир тэтимҥэ киллэрдилэр. Махтал буоллун, кырачаан эр бэрдэргэ!

Олоҥхоһут, тойуксут, алгысчыт Николай Баишев тойугунан алгыстаабытыгар, уу сахалыы тыл имэҥин, илбиһин истэн, биһиги сахалар кулгаахпыт чуорданан, дууһабыт өрө көтөҕүллэн, олоҥхобутунан киэн тутуннубут.

Сыанаҕа көрсүһүү саҕаланыан иннинэ кэлбит ыалдьыттар киэҥ саалаҕа быыстапка көрбүттэрэ, норуот эмчиттэрин кытта ирэ-хоро кэпсэппиттэрэ, кырыымпа музыкатын истибиттэрэ.

Майаттан Евдокия Саввична салайыытынан 30-ча киһи, Амматтан Елена Николаевна, Тамара Яковлевна көҕүлээн, салайан, 15 киһи кэлбиттэрэ. Чурапчыттан, Намтан эмиэ элбэх дьон сылдьыбыта. Барыта  400-тэн тахса киһи баара.

Кулан эр дьоҥҥо Сүр көтөҕүүнү, дьахталларга Айылгы арыйыыны хомуска тардан, алгыс этэн, сүрэхпитигэр-быарбытыгар дириҥник өтөн киллэрбитэ, эппитигэр-сииммитигэр иҥэрбитэ. Бу кэмҥэ Үөһээҥҥи Үрдүкү Айыылартан уот суһум, араас сардаҥа түһэн, арчыламмыппытыттан үөрүүбүт үксээбитэ.

Дорҕоон күүһүн туһанан, бары «о-ом» диэн дорҕоону уһуннук таһааран дуораһыппыппыт, эмтэммиппит. Үрдүкү Үрүҥ Айыыларга баарбытын, кинилэри кытта бииргэ үлэлэһиэхпитин биллэрбиппит.

Кырдьык, Үөһээ Айыылартан алгыс, сардаҥа, күүс иҥэринэн, эр дьоннорбут сүргэлэрэ көтөҕүллэн, Кулаҥҥа махталлара үгүс.

Маннык үрдүк таһаарыылаах, дириҥ суолталаах духуобунай көрсүһүүгэ кэлбит бар дьоҥҥо Махтал, Таптал, Алгыс буолуохтун. Олохторугар табыллыыны, дьолу-саргыны баҕарабыт.

Уруй-айхал Саха Эр Дьонугар!

Александра Гаврильева