Атырдьах ыйын 16 күнүгэр, куораттааҕы суут саалатыгар Попов судьуйа көрүүтүгэр уонна истиитигэр сууттанааччылар адвокаттара хадатаайыстыбалаан үс киһи туоһу быһыытынан кытыннылар. Икки туоһу Москубаттан бу сарсыарда көтөн кэлбиттэр. Ол – урукку «Сахатранснефтегаз» АО генеральнай дириэктэрэ Игорь Корнев, «Газресурс» САО генеральнай дириэктэрэ Александр Турин уонна «Ленанефтегаз» билиҥҥи салайааччыта маннааҕы киһи -- Андрей Хацевич.
Суут бэрт тыҥааһыннаахтык ааста. Икки эдэр кыыс -- судаарыстыбаннай буруйдааччылар уонна эмсэҕэлээбит өрүт -- «Якутгазпром» бэрэстэбиитэллэрэ буолан, куолаан туоһулары араастаан олуйан, ордук бастакы туоһуну – Александр Турины сүрдээхтик ыктылар-түүрдүлэр. Куолас сонооһуна, үрүт-үөһэ боппуруоһунан көмүүлэрэ, төттөрү-таары эргитэн аҕала-аҕала ыйытыыларынан сыбааһыннара… мөлтөх ньиэрбэлээх киһи сонно тута туохха барытыгар билиниэх айылаах. Аттыбар олорор араас сууттарынан сылдьан «идэтийбит» суруналыыс: «Көрөҕүн: дэлби сылатан-илиһиннэрэн, кыйахаан-кыыһырдан баран наадалаах хоруйдарын ыла сатыыллар», -- диэн прокурордар үлэлиир ньымаларын быһааран сибис гынна.
Прокурордар уонна бэрэстэбиитэллэр (кэлин биллибитинэн урукку прокуратура үлэһиттэрэ эбит) биир кэм иэҕэн, Максимовтааҕы тэриллиилээх преступнай группировка (ОПГ) оҥоро сатыыллара илэ көстөр. Сотору-сотору Туринтан, чуолаан «Максимовы, Пахомовы, Чикачеву, Рожины билэҕин дуо, төһө чаастатык мунньусталлар этэй, тугу кэпсэтэр-сүбэлэһэр этилэрий, кинилэртэн ураты ким баар этэй, эн тэрилтэҥ векселлэринэн төһө элбэх операция оҥоһуллубутай?» диэн сураһаллар. Турин «дьыала уруккута бэрт, 2006-07 сыллааҕыны өйдөөбөппүн» диэн биир халыып хоруйу этэ турда. Уопсайынан, бразильскай сериал амнезията биһиги олохпутугар эмиэ тахсыан сөбө элбэхтик көһүннэ. «Якутгазпром» (билигин "ЯТЭК") бэрэстэбиитэлэ  «травмалааххын дуо?» диэн көбдьүөрүөр диэри туоһу умнугана хаарылынна.
Турины доппуруостаабыттарынан сэрэйдэххэ, «Якутгазпром» 2007 сыллаахха «Газресурс» диэн САО тэрийбит. Саҥа тэрилтэ генеральнай дириэктэринэн Александр Турин анаммыт. Турин тэрилтэтин нөҥүө «Якутгазпром» «Якол" НК  68 мөл. 555 тыһ. 85 солк. 06 харчы суумалаах вексели аһарбыт. Судаарыстыбаннай буруйдааччылар туоһуттан: «Өссө атын сыаналаах кумааҕы, үп-харчы эн тэрилтэҥ нөҥүө «Яколга» барбыта дуо?» -- диэн сураһа сатаатылар. Киһилэрэ чопчу хоруй биэрбэтэ: «Баҕар ааспыта буолуо, баҕар суох -- өйдөөбөппүн».
Игорь Корнев суукка дьыала ис хоһоонун быһаарарыгар элбэх бириэмэ барда. Сахабыт сиригэр ньиэп уонна гаас улахан промышленнай хабаанынан хостоммута букатын аҕыйах сыл буолла. Урут Талакаан ньиэбин хостоон Витимҥэ диэри сүүрдэн ыларга, өссө правительство бэрэссэдээтэлинэн Юрий Кайдышев олордоҕуна (1994-97сс.), ыһыллар-хомуллар турбаны, ханнык эрэ байыаннай чаастан атыылаһан аҕалан таҥмыттар. «Бу маннык турба ситимин байыаннай, эбэтэр ыксаллаах быһыыга-майгыга быстах кэмҥэ эрэ туттуохха сөп», -- диэн Корнев быһаарар. Правительство, президент (В.А.Штыров) сорудаҕынан «Саханефтегаз» ААО Талакаантан Витимҥэ тиийэр стационарнай турба тутуутун саҕалыыр. Үбүлээһин хара-хара кэлэриттэн сылтаан, 1,5 сыл иһигэр тутуллуохтаах турба «быдан дьылларга» тардыллар. «Тутууну хаһан да, «тоҥорботохторо». Харчы баар буоллаҕына туталлар, харчы суох буоллаҕына туппаттар», -- диэн Корнев этэр. Ол «быдан дьыллар» быыстарыгар улахан уларыйыылар-тэлэрийиилэр бөҕөтө тахсаллар. «ЮКОС» кэлэр, онтон айдааннаахтык холдьоҕуллар кэмнэрэ эҥин кэлитэлээн ааһаллар. «Ар-бур» буола сырыттахтарына, били, байыаннай турбалара тоҕо баран араллаан бөҕөтүн таһаарар. (Санатар эбит буоллахха, ол саҕана, чуолаан, «СНГ» буруйунан, кинилэр туппут турбалара алдьаммыт диэн этэ, онтубут олох даҕаны эргэ турбаларын ситимэ алдьаммыт эбит). Дьэ, ол экологическай саахал суоһаабытыгар (Корнев тохтубут ньиэп кээмэйэ бэчээккэ кыччатыллан бэриллибитэ диир), правительство, президент ыксаан «Саханефтегаһы» стационарнай турбаны хантан эмит харчыта булан тута охсоллоругар сорудахтыыр. Оттон турбаны эрдэ тохтуу-тохтуу тута сылдьыбыт бэдэрээччит «ПМК-5» харчыларын төлөөбөтөхтөрүттэн өһүргэнэн өрөспүүбүлүкэттэн баран хаалар. Атын «Учур» диэн тэрилтэни аҕалан туттараллар. Аны, онтулара генеральнай бэдэрээччит буолбатах буолан, үлэтин Ростехнадзор туппат. Онон бастакы бэдэрээччиттэрин – «ПМК-5» тэрилтэни үҥэн-сүктэн көрдөһөн төттөрү аҕалаллар. Генеральнай бэдэрээччит салалтата «СНГ»-ны кытары үлэлииртэн аккаастанар (эрдэ харчытын төлөөбөтөҕө аахсыллар), онон «Ленагаз» (Игорь Корнев бас билэр тэрилтэтэ) иэһэ-күүһэ суох «сабыс-саҥа» самалык тэрилтэтин «Ленанефтегазстройу» сакаасчыт быһыытынан оҥороллор.
«ЮКОС» «Саханефтегаз» актыыбын атыылаһан, инвестициялаан, бэдэрээччиттэрин үлэлэрин син төлөһөллөр. Ол гынан баран, бу сууттарынан иирии түмүгэр ол турбабыт ситимэ билигин даҕаны силигэ ситэ илик. Корнев этэринэн, объект 98%-на тутуллубут. Тиһэх холбонор түһүмэҕэ эрэ хаалбыт.
Аны, тутуу хаачыстыбатын өттүгэр «турбаларга идэтийбит специалист» дипломнаах Игорь Корнев «ньиэп барар турбатын тутуу бэйэтэ туспа уустук быраабылалардаах» . Хас түһүмэҕи туттах аайы чинчийии ыытыллар. Ол чинчийии сүрдээх кытаанах ирдэбиллээх – «Ростехнаддзор» кыраҕатык хонтуруоллуур. Онон хаачыстыбаҕа күтүрээһин олоҕо суох диэн этэр.
Уопсайынан, дьыала ис-иһигэр киирдэххэ, иһэ-хоойо хойдон иһэр быһыылаах. Афанасий Максимов өрөспүүбүлүкэ ньиэп-уонна гаас аныгы промышленноһын уустук дьылҕатын төрүттэспит, түһүүтүн-тахсыытын илэ көрбүт, билбит киһи буоллаҕа. Аҕыйах сыллааҕыта «летчик идэлээх киһи хайдах курдук правительство сорудаҕын ситиһиилээхтик толорон, ньиэп уонна гаас промышленноһын баһылаабытын» хайҕыыртан соло булбаппыт. Улахан промышленность политиканы кытары ыкса ситимнээх. Хайдах даҕаны, производство арыыланан, бэйэтин бэйэтэ дьаһанан олорор кыаҕа суох кэмигэр, сороҕор соруйан, сороҕор кыһалҕаттан даҕаны сокуону кэһии, ханан эрэ эргитии баар буоларын сэрэйэбит. Ол эрээри бу бүгүн түөрт сууттана олорор дьон өрөспүүбүлүкэбит, дойдубут олорон кэлбит олоҕун судургута суох дьиҥ чахчытын туоһулуур уутааҕы күлүктэрэ диэх санаа кэлэр.