“Үс боросуонак” “Азия оҕолоругар” киэркэйиэ дуо?

Среда, 29 Февраля 2012 10:28
Оцените материал
(0 голосов)

Аны сайын “Азия оҕолоро” оонньуулара бэһис төгүлүн ыытыллаары турар. Дьокуускайбыт барахсан эмиэ сууйуллан-сотуллан, “потемкинныы” кырааскаланан кылгас да кэмҥэ киэркэйэ түһээхтиэ буоллаҕа. Ол курдук бу сыллар усталарыгар салҕанан бара турар кэриҥнээх. Оттон куорат кытыылара, суолбут-ииспит, бөхпүт-сыыспыт, ыппыт-куспут өтөрүнэн кыалларын ааста.

Этэн этэн эппэт, саҥаран саҥаран саҥарбат да буолан эрэбит. Ол эрээри куорат кытыыта эрэ буолбакка, киин сиргэ турар олорор дьиэлэр дьүһүннэрэ-бодолоро ынырыксыйда. Холобур, киин куораппыт хабайар хаба ортотугар, Горькай уулуссаҕа хороллон турар норуокка “үс боросуонак” диэнинэн биллэр үс тоҕустуу этээстээх малосемейка дьиэлэри ылан көрүөҕүҥ. Уулуссаларын да аатын батыһардыы, дьон олоҕо манна аһыылаах, абалаах, ардыгар кыһыылаах даҕаны. Горькай, 98 быйыл тутуллубута лоп курдук отут сылын туолар. Ол тухары билигин олорор дьонтон лифт үлэлээбитэ диэни ким да өйдөөбөт. Хам сааллан, тоҥон турар. ТСЖ-ттан туоһуластахха, чөлүгэр түһэрэргэ лоп курдук 3 мөл. солк. наада үһү. Скважинатын экспертизатыгар уонна өрөмүөнүгэр. Дьэ, сөҕүмэр суума диэтэҕиҥ! Быйыл күһүн уонунан сылларга ырыкыныап ыыспатыныы хараҥаран, лүҥкүрэн турбут подъезд, этээстэр уотунан сандаардылар. Электрощиттары олорчу уларыттылар. Тахсан киирэргэ аналлаах улахан турбалары кыбартыыларынан сылдьан бүтүннүүтүн саҥартылар. Кыһыны супту “батареяҕыт сылаас дуо?” диэбитинэн киэһэ-сарсыарда тоҥсуйан кыһамньы баарын илэ биллибит. Этээстэр түннүктэрин евротүннүккэ уларыттылар. Киирэр ааны домофоннаары тимир ааны олортулар. ТСЖ өттүттэн үлэ бөҕөтө барда. Арай олохтоохтор хайдах сыҥсардаабыттарай, соннук олороохтууллар. 4 тыһ. хамнастаах подъезд хомуйааччы күһүнтэн үс-түөрт төгүл уларыйда. Муҥнарын ытаан уурайан иһэллэр. Күнүн аайы тобус толору пиибэ, араас бөх уончалыы куулун таһааран көрүҥ эрэ! Лифт үлэлээбэт – барытын санныгар сүгэн. Айакката бэрт дии! Онтон төннөн киирэҕин – эмиэ этээстэр аайы бэрт чөкөтүк бөхтөөх бакыат бөҕөтө кэккэлээбит буолар. Ким ааһан иһэн силлиир, ким көрдөрөн туран сыыҥтыыр, бөлөҕүнэн туран эрэ табахтыы-табахтыы арыгылааһын, ааһан иһэр дьону “булуу” – бу барыта эрэйдээх-буруйдаах Горькай малосемейкалара.

Киров уулуссатыгар турар эмиэ секционнай хостордоох тоҕус этээстээх уопсай дьиэлэри ааспыт күһүн таһын кырааскалаабыттара. Горькай киэннэрин эмиэ кырааскалыахтара диэн кэтэспиппит – мэлигир. Аттыбытыгар бассейн тутуллан тыас-уус бөҕөтө. Барыта саҥардыллар, уларыйар, хамсыыр. Арай биһиги эрэ дьиэлэрбит кур бэйэлэрэ кубулуйбакка, көйгөтүллэн киин куораппыт киинигэр тураахтыыллар. Хаһыс мээр бу дьиэлэри сөргүтүөй? Уокурук диэн уопсайынан баар дуу, суох дуу? Быыбар буоллаары гыннаҕына эрэ арай бөх хомуйааччы үлэтин үксэтэн хаһыатынан, листовканан көмөн кэбиһэллэр. Онтон эмиэ умналлар. Тойон Членов сыбыс-сымыйанан талылларын саҕана өҥөҥнөөбүтэ – билигин отой да суох, ылы-чып. “Членов уокурукка тугу эрэ гынан эрэр үһү” диэни дьөрү истибэппит. Аныгыс быыбарга диэри истибэппит да буолуо. Ол баҕас эрэбил.

“Азия оҕолоро” буолуохтара. Ынырыык баҕайы дьиэлэрбит таһынан араас омук дойду оҕолоро, ыччаттара ааһыахтара, өҥөҥнүөхтэрэ турдаҕа. Туох эрэ дии саныыллара буолла? Ааһар барыта тахсан киирэр сиргэ кубулуппута, кыаммат, мөлтөх киирэн биэрбэт урдустар түүн да, күнүс да диэни аахсыбакка подъезка туран эрэ арыгылыыллар диэн куһаҕан түүллэригэр да көрбөттөрө буолуо... Манна олорор, оскуолаҕа үөрэнэн улаатар оҕолор дьиэлээхпин диэн кими ыҥырыахтарай? Саата да бэрт дии!

Саамай куһаҕана, кыбыстыылааҕа, абалааҕа – ол арыгылааччыларбыт кыһайбыт курдук үгүстэрэ сахалар буолаллар ээ! Сүүрбэ-отут саастаах, саамай күүстэрин үгэнигэр, үөрэнэр, спордунан дьарыктанар, ыал-күүс буолар кыахтаах ыччаппыт. Тугу гынаары чааһы чааһынан тура тэбинэн сыҥсар буолбут подъезка арыгылыыллара, кэпсэтэллэрэ буолла? Биир бэйэм итини олох өйдөөбөппүн. Баҕар, саха үксэ дьоллоох Дьокуускай куораппытыгар дьиэтэ-уота суоҕуттан, куортамнаан муннугу-ханныгы кэйэ сылдьалларыттан, саатар көрсүһэн атах тэпсэн олорор сирэ суоҕуттан буолаарай? Саха. Эмиэ саха. Оттон сахалар буолумуна. Бэйэ дьоно, бэйэ киэнэ ордук ыарыылаахтык уонна дьэҥкэтик көстөр. Атын омуктар кыргыһан да турбуттарын иһин бэйэ омук оҕотун, ыччатын урутунан харыстыы, аһына, “ыалдьа” саныыгын.

Быыбар ааһыа. Ким эрэ мээр буолан хончоллуо. Оттон “үс боросуонактар” соннук көрүүтэ-истиитэ суох туруохтара. Ама, туох да уларыйыы тахсыа суоҕа дуо?

Горькай малосемейкатын олохтооҕо.

Комментарии 

#1
Видеокамера 06.03.2012 13:44
Видеокамера туруордахха син а5ай буолуо дуу? Уонна истиэнэлэргэ дэлби хартыына ыйаталаан бистэххэ син дьон тутутнуо дии саныыбын.
#2
мир 06.03.2012 16:22
главное домофон, лифт!
#3
Лиида 06.03.2012 22:02
Атын омуктар кыргыһан да турбуттарын иһин бэйэ омук оҕотун, ыччатын урутунан харыстыы, аһына, “ыалдьа” саныыгын.- наьаа дии...
#4
Иван 07.03.2012 07:53
Кырдьык ити дьиэлэргэ бол5омто ууруллара наада дии саныыбын. Домофон, лифт, вахта энин коруллэрэ буоллар ба5ар син туттунуо этилэр. Биир торуотунэн ити дьиэлэргэ уксэ куортамнаан олорооччу дьон ол иьин аанньа ахтыбаттара буолуо ди саныыбын
#5
Марина 07.03.2012 09:39
Куортамнаан олорбуттарын да иьин бэйэлэрин кэннилэриттэн хомуна сылдьыахтаахтар буолла5а ди.
#6
Татьяна 07.03.2012 10:43
Мин Лермонтова м/с олоробун. Оннук же картина.Подъезд аана да суох. Про окна даже говорить не надо.Тсж-т уларыйан хоть на улице мусор стали убрать.
#7
эл 09.03.2012 10:11
Мне кажется нужно объединиться постоянным жильцам и что-то решить самостоятельно, а не ждать "дядю" со стороны. Я сама за!
#8
Петр 11.03.2012 13:46
:o Саамай учугэй малосемейка Якутскайга ханна баарый?
#9
Ева 12.03.2012 12:39
Да, ТСЖ обещали косметический ремонт - давно пора покрасить перила и стены. Внутри секций тоже, а не в общем коридоре. А то действительно гости-спортсмен ы в обморок упадут от такой красоты. И надо срочно устанавливать видеокамеру и домофон

Добавить комментарий

Защитный код
Обновить

Aartyk.ru