Уус Тааттаҕа тахсыбыт правительство делегациятын СӨ Тыатын хаһаайыстыбатыгар уонна аска-үөлгэ политикатын миниистирэ Иван Слепцов салайан сырытыннарбыт. Делегация састаабыгар Гаврил Кононов - Силиэстийэлиир управление начальнига эмиэ киирбит.

Биллэрин курдук, Уус Таатта - дьокутаат Афанасий Максимов  дойдута. Афанасий Максимов онно регистрациялаах. Кини аҕатын аатынан уулусса кытары ааттаммыта. Онон да сиэттэрдэххэ,  Максимовтар дьиэ кэргэттэрэ Тааттаҕа улаханнык ытыктанар дьиэ кэргэн.

Отчуоту, дьиҥинэн, нэһилиэнньэ олохтоохторо көнөтүнэн ылыммыттар. Онтон арыыга ууну - Гаврил Кононов дакылаата куппут. "Дьэ быраабы араҥаччылыыр, ирдиир-силиэстийэлиир уорганнар тахсыылаахтык үлэлээтибит, улахан тойоттору, миниистирдэри, политиктары утары холуобунай дьыаланы тэрийдибит, тутаттаатыбыт, хаайдыбыт", - диэн.

Хайдах өйдөөх-санаалаах киһи Афанасий Максимов төрөөбүт-үөскээбит нэһилиэгэр тахсан итинник чабыланыан сөбө эбитэ буолла?! Соруйан эрэ дииргэ тиийиллэр... онтон атын киһи хайдах да быһаарар кыаҕа суох.

Биллэн турар, оҕонньоттор онуоха оргуйан-кыйаханан турдахтара. Киһи тулуура да кэмнээх. Таатта улууһун дьонун-сэргэтин төһөлөөх репрессийэлээбиттэрэ буолуой, төһөлөөх киһи хараҕын уутун түү сыттык иҥэриммитэ буолуой... ааҕан сиппэккин. "Саха норуота улахан сүтүктэммитэ" диибит, оттон бу быһаччы хаан уруу ийэ-аҕа, быраат-балыс, оҕо-убай кыргыллыбытын киһи хайдах умнуоҕай! Сырҕан баас буолан иһийэ сытарын, дьон хараҕыттан туора бүөм кистэммити киһиргэнэ таарыйа хаан оҕуолатыахха сөбүй... 

Туох сыалтан-соруктан? Төттөрү түстүннэр диэн дуо?

...Уус таатталар правительство үлэтин сыаналыыртан аккаастаммыттар. "Ытык күөллэр бэйэлэрэ сыаналаатыннар" диэн эппиттэр. 

Дьон тууйуллубутун таһаарбыт ухханыгар араас тыл-өс күөдьүйбүт. Салалта, сылаас тылынан ахтыллыбытаҕын өйдүүр инигит.