«Саха КВН» оҕо сайдар түһүлгэтэ

Пятница, 20 Января 2012 09:08
Оцените материал
(1 Голосовать)

_copy_copy_copy_copy_copy_copy_copy_copy_copy«Саха КВН Лигата» общественнай түмсүү кэнники сылларга туспа суоллаах-иистээх, сыаллаах-соруктаах бэйэтин кыанар түмсүүнэн биллэн эрэр. «КВН ыччаты иитиигэ төһүү күүс буоларын, дьон өйдөөн эрэр», – диир Лига Президенэ Геннадий Охлопков. Дэлэҕэ даҕаны, быйылгы Ыччат баалыгар «Бастыҥ түмсүү» анал аакка  СР Ыччат Парламенын кытары тэҥҥэ, «Саха КВН» түмсүүтэ кыттыа дуо.

Саҥа дьыллааҕы сынньалаҥ кэннэ республика араас муннуктарыттан сүүстэн тахса оҕо «Саха КВН оскуолата» бастакы республикатааҕы кыһыҥҥы түмсүү-лааҕырыгар муһунна. КВН оскуолата «Бэс чагда» санаторийга олохсуйбута. Дьикти оскуола тэрийээччилэринэн «Саха КВН Лигата» общественнай түмсүү, СР оҕолорун общественнай холбоһуктарын Сойууһа уонна СР Үөрэҕин министерствота буолаллар.

Саха КВН оскуолата номнуо үһүс сылын үлэлиир. Ол эрэн, бу иннинэ эдэр КВН-щиктар сайын мусталлара. Быйылгы кыһыҥҥы оскуола сүрүн сыалынан КВН-щик оонньуур маастырыстабаларын үрдэтии, КВН теориятын баһылааһын, сыанаҕа оонньуур кистэлэҥнэри билии буолар.

Лааҕыр маҥнайгы сезонун үөрүүлээх сабыллыытыгар КВН-щиктар бу биэс күн тугу баһылаабыттарын көрдөрөр КВН күрэҕэ буолла. Оскуола-лааҕыр сабыллыытыгар Ил Түмэн вице-спикерэ, «Саха КВН Лигатын» бочуоттаах Президенэ Александр Жирков кэлэн ыалдьыттаата:

Саха тылын баайын ыччакка төнүннэриигэ болҕомто ууруллуохтаах. Хомойуох иһин, билигин ордук ыччат ортотугар тылы-өһү бутуйан туттуу түгэнэ наһаа үксээтэ. Ыччат сахалыы тылын сатаан туттубат, куорат оҕолорун этэ да барбаккын. Туох ханнык иннинэ оҕо бэйэтин төрөөбүт төрүт тылынан, Өксөкүлээх убайбыт этэринии ийэтин үүтүн кытта эмсэхтэммит тылынан саҥарыахтаах. «Саха КВН Лигатын» үлэтэ онно туһуланар. КВН ис-иһигэр киирдэххэ аҥаардас көр-күлүү эрэ буолбакка, оҕону түргэнник бэйэ санаатын этэригэр, тобуллаҕас өйдөөх буоларыгар, сатаан мөккүһэригэр көмөлөһөр», - диэтэ.

Оҕолор 10 хонук устата КВН ымпыгар-чымпыгар уһуйулуннулар, ааранан эмтэннилэр, саҥа доҕордоннулар. Барыахпытын олох баҕарбаппыт дииллэр.

Кеша Бугуев, 5-с этэрээт, «От сыта» хамаанда капитана:

«Бу аҕыйах хонук иһигэр да буоллар, биһиги хамаандабыт олуһун түмүлүннэ, доҕордостубут. Мин маннык КВН лааҕырыгар саҥа сырыттым. КВН-ан дьарыктаммытым соччо ыраата илик, онон КВН үөрэҕэр уһуйуллубутум миэхэ олус туһалаах.»

Люба Иванова, 4-с этэрээт, «Ытыс-пытыс» хамаанда оонньооччута:

«Мин Дьокуускай куорат 26-с №-дээх орто оскуолатын «Дьикти дьон» КВН хамаандатыгар оонньуубун. Лааҕырга наһаа элбэх доҕордоннум, сайынным. Инникитин даҕаны маннык лааҕырдар ыытылла турдуннар.»

Айсена Федотова, баһаатай:

«Лааҕырбыт олус тэрээһиннээхтик ааста. Ол эрэн аҕыйах хонук буолбута биир өттүнэн хомолтолоох. Оҕолор манна үөрэммит билиилэрин оонньууга ситэ туһамматылар. Ол да буоллар, сайдыылаах, бэһиэлэй, наһаа үчүгэй оҕолор кэлбиттэрэ киһини үөрдэр. Биһиги «КВН», «фристайл», «сцена» уо.д.а. терминнэри быһааран, сыанаҕа хайдах тутта-хапта сылдьыахтаахтарын туһунан кэпсээтибит, үҥрэттибит».

Түмүк оннугар

Сахалыы КВН оскуола оҕолоругар кырдьык даҕаны, бэйэтэ туспа «бренд» буолбутун сөхтүм. КВН тэрилтэтин кытта саҥардыы алтыһарбар, былырыын оскуола оҕолорун илин эҥээрдээҕи күрэхтэһиитигэр сылдьыбытым. Ол сырыыны уонна бу күрэхтэһиини тэҥнээтэхпинэ, олох атын көстүү. Баҕар КВН оонньуутун ымпыгар-чымпыгар уһуйуллубут буоламмын буолуо. Ол эрэн, туораттан көрөргө наһаа үчүгэй эбит. Оҕолор бэйэлэрэ эрэ билэр тылларынан, терминнэринэн кэпсэтэллэр, дьиҥнээх КВН-щик курдук тутталлар-хапталлар. Хамаандалар бэйэ-бэйэлэрин чугастык билсэллэр, күүстээхтэртэн саллаллар, кинилэргэ тэҥнэһэ сатыыллар.

«Саха КВН» хамсааhыны уонна Лига председателин Геннадий Охлопковы хас биирдии улуус, нэһилиэк аайы баар КВН-щиктар билэллэр, убаастыыллар. Онон, «Саха КВН» үрдүк үктэлгэ таҕыста, оҕону иитэр суолтата үрдээтэ диэн этиэҕи баҕарыллар.

Виктория ФЕДОТОВА.


Комментарии 

#1
Б8ТУУСЭ 10.06.2012 12:56
саха квн Forever

Добавить комментарий

Защитный код
Обновить

Aartyk.ru