Өрөспүүбүлүкэбит сирэ киэҥ эрээри, киһитэ аҕыйаҕа бэрт буолан, соруннахха кими баҕарар сэттис көлүөнэтигэр диэри түөрэн билиэххэ сөп. Билиҥҥи былааһы утарар дьон да суох, террорист, экстремист да сыта суохпут. Ол биирдэ эмэ куукуна иһигэр мөҕүттүбүппүт аахсыллыбат, былакааттанан-былаахтанан уулуссаҕа тахсан сүүрүөхпүтүн билбэппин. Кыһарыйдахха халлаан да тымныыта бэрт.
Ол да буоллар сүрэхтиин-быардыын быыбар туһугар өрүкүнэйэ сылдьар уолаттар-кыргыттар улахан баартыйаларга сэмсэ тэриллибит ыччаттарын түмсүүтүгэр күнүстэри-түүннэри бокуойа суох түбүгүрэллэр. Былакаат түҥэтэллэр, көрсүһүүлэргэ дьону ааҥҥа көрсөллөр, сурунаал-хаһыат тарҕаталлар. Сэтинньи 30 күнүгэр президент Егор Борисов тэрилтэ салайааччыларын кытары көрсүһэригэр бөрүкүтэ суох быһыы таҕыста.
«Якутия 21 век» сонун ааҕыныстыбатын суруналыыһын Лариса Анисимованы икки көстүүмнээх уолаттар кэлэн «аккредитацияҥ суох» диэн саалаттан холдьоҕон таһаардылар. Дьиҥинэн, телесуруналыыстар наһаа да элбэхтэрэ суохтар ээ. Ларисаны өссө ТНТ Дьокуускайдааҕы салаатыгар «Интересно» биэриини ыытыаҕыттан дьон-сэргэ билэр. Дьүһүнэ да киһи хараҕар хатанар суруналыыс буоллаҕа. Кылгас баттахтаах саха блондинкатын хайдах умнуоххунуй? Ол да буоллар уолаттар суруналыыһы аппаратуратын сүгүннэрбитинэн көрсүһүүттэн үүрэн таһаарбыттар.
Ханнык баҕарар тэрээһин көҕүлээччилэрэ, элбэх суруналыыһы мунньар интэриэстээхтэр. Буолаары буолан быыбар иннинээҕи көрсүһүүлэргэ босхо хаһыакка, телевизорга, араадьыйаҕа тахсаары информационнай төрүөт көрдөөн, араас сонун тэрээһиннэри тэрийэ сатыыллар. Ама, ол «ньыгыллар» оппозициялара – хомуньуустар, тумууһаптар бэйэлэрэ телеханааллаахтар үһү дуо, президени «куһаҕаннык» көрдөрө сатыыр? Ким да кэлэн уһуллун, барыларыгар сөптөөх усулуобуйаны тэрийиэхтээх этилэр.
Лариса Анисимова, аһара баран кими да кэлтэгэйдии арбаабыт дуу, үөхпүт дуу аньыыта-харата суох. Информацияны объективнайдык, санаа соҥнооһуна суох үйэ саас тухары биэрэн кэлбитэ. Ол үтүөтүгэр саалаттан холдьоҕулла сылдьар буолан тахсар.
Президент уонна правительство пресс-сулууспатын салайааччыта Афанасий Егоров бу түбэлтэни сарсыныгар эрэ билбит. «Лариса мин төлөппүөммүн билэр. Эрийиэхтээх этэ», -- диир. Арай, Лариса оннугар «Агитович төлөппүөнүн» билбэт суруналыыс турдун, оччотугар син биир кимиэхэ да төлөппүөннээн абыраммат буоллаҕа. Пресс-сулууспа үлэһиттэрэ буруйдара суох гынан баран, «гвардеецтар» «аһара бэриниилэрин» син эрдэ-сылла уҕарытар үлэни ыытыахтаахтара эбитэ буолуо. Прессаны «дьаһайар» да буоллахтарына, ол пресс-сулууспа үлэтэ этэ.
Комментарии
так держать!