Саха КВН лигата тэнийэр

Понедельник, 14 Ноября 2011 10:32
Оцените материал
(1 Голосовать)

14890_copyСаха Республикатын «Саха КВН Лигата» ыччат общественнай тэрилтэтэ – республикаҕа биир улахан уонна киэҥ далааһыннаах үлэни ыытар ыччат түмсүүтүнэн биллэр. Тэрилтэ 2008 сыллаахха төрүттэниэҕиттэн ыла көрү-күлүүнү көҕүлүүр, булугас өйдөөх, тэбэнэттээх оскуола оҕолорун уонна ыччат КВН хамаандаларын холбоон, биир тиһиккэ киллэрэн барбыта. Саха КВН тэрээһиннэрэ оскуола оҕото уонна ыччат айар дьоҕура, талаана сайдарыгар, төрөөбүт тылын баһылыырыгар, толкуйа-санаата ситэригэр киллэрсэр кылаата улаханын үгүс дьон өйдөөн эрэр. Биир бастакынан, таба көрбүт уонна өйөөбүт киһинэн, билигин тэрилтэ Бочуоттаах Президенэ, Ил Түмэн бэрэссэдээтэлин солбуйааччы Александр Николаевич Жирков буолар.

Билиҥҥи туругунан, Лига оскуола оҕолоругар уонна ыччаттарга улуус-регион-республика диэн тиһигинэн «Саха КВН» оонньууларын, маастар-кылаастары, сылын аайы «Саха КВН оскуолата» лааҕыры, сайыҥҥы Кубогы, көр-күлүү киэһэлэрин тэрийэн ыытар. Ааспыт 2010-2011 сезон Саха КВН Лигатыгар хаһааҥҥытааҕар да элбэх тэрээһиннээх, элбэх дьон болҕомтотун таппыт түһүлгэлэрдээх, атыннык эттэххэ быһаарыылаах уонна таһаарыылаах дьыл буолан ааста. Ол биллэн турар, дьылтан буолбакка, тэрийэр хамаанда түмсүүлээҕиттэн, ордук күүскэ уонна санааны, баҕаны ууран туран үлэлээбиттэн тутулуктаах. Бу – киһини үөрдэр! Уонна салгыы айанныырга, үлэлииргэ, айарга эрэл уонна кыах биэрэр.

Быйылгы сылга тэрилтэ үлэтин кэҥээһинтэн саҕалаата. Бу күннэргэ Саха Республикатын «Саха КВН Лигата» ыччат общественнай тэрилтэтэ илин эҥэргэ Аллараа Бэстээххэ уонна бүлүү бөлөххө Сунтаарга филиаллары арыйда. Илин эҥэрдээҕи филиал салайааччытынан Мэҥэ-Хаҥалас улууһун 2-с №-дээх Аллараа-Бэстээх орто оскуолатын организатора, «КэрэМеn» уонна  «StarБЭСt» КВН хамаандаларын салайааччыта Сосина Алеся ананна. Алеся салайар «КэрэМеn» хамаандата республикатааҕы «Саха КВН» оонньууларын полуфиналын кыайыылаахтара, быйылгы финал оонньууларын 2-с миэстэлээх призердара.

 

·       ___copy

Алеся Сосина 1987 сыллаахха Мэҥэ-Хаҥалас улууһугар төрөөбүт

·       2005-2008 сыллардаахха С.Ф. Гоголев аатынан Дьокуускайдааҕы педагогическай колледжка үөрэммит, социальнай педагог, баһаатай-организатор идэтин баһылаабыт

·       Биир сыл Д.Ходулов аатынан народнай театрга специалиһынан үлэлээбит.

·       2009 сыллаахха Аллараа-Бэстээххэ ыҥырыллан улэлии сылдьар.

·       Икки сыл «Бастыҥ салайааччы» анал аат хаһаайына

·       КВН-ынан оҕо эрдэҕиттэн дьарыктаммыт, билигин КВН – кини олоҕун аргыһа

 

 

Бүлүү бөлөх филиалын салайааччытынан В.Г. Павлов аатынан Сунтаар алын сүһүөх орто оскулатын директорын иитэр үлэҕэ солбуйааччы, Бүтүн Россияҕа биллибит оскуола оҕолорун «Халлаан дьоно» КВН хамаандатын салайааччыта, республикатааҕы ыччат «Саха КВН» оонньууларын финалын икки төгүллээх чемпиона буолбут «Дьикти саас» КВН хамаандатын капитана Макаров Виталий ананна.

 

·      ___

     1980 сыллаахха Сунтаар Элгээйитигэр күн сирин көрбүт

·       2002 сыллаахха армияҕа сулууспалаан баран, СР ыччат министерствотын салайыытынан Бүтүн Россиятааҕы «Океан» оҕо киинигэр баһаатайынан ананан үлэлиир

·       2004 сыллаахха Элгээйи орто оскуолатыгар ыҥырыллан организатордыыр

·       2006 сыллаахха кини салайар «Халлаан дьоно» («Люди небес») КВН хамаандата Россиятааҕы КВН фестивалыгар 36 хамаандаттан 7-с миэстэти, 2010 сыллаахха «Күөрчэх» («Сливки») хамаандата 38 хамаандаттан 5 миэстэни ылары ситиһэр

·       Саха Республикатын ыччат политикатын туйгуна 

 

 

Филиал салайааччылара билигин бэйэлэрин сайдар суолларын торумнууллар, кэлэр кэскиллэрин былаанныылар. Алеся уонна Виталий «Саха КВН» хамсааһына өссө биир үктэли дабайарыгар, саҥа таһымҥа тахсарыгар күүстэрин-санааларын ууран туран үлэлиэхтэрэ диэн эрэнэбит, үгүс үтүө сурахтары күүтэбит.

 

 

 

Вика ФЕДОТОВА

 

 

 

 

 

 

 

 

Добавить комментарий

Защитный код
Обновить

Aartyk.ru