«МАКСИМОВ» дьыалатыгар Игорь ПАХОМОВ көрдөрүү биэрдэ

Среда, 21 Сентября 2011 14:19
Оцените материал
(0 голосов)

kupizoloto.ru2838253625Бүгүн, балаҕан ыйын 21 күнүгэр, Дьокуускай куорат суутун судьуйата Попов көрүүтүгэр, айдааннаах «Максимов дьыалата» салҕанна. Санатар эбит буоллахха, суут мунньаҕа балтараа нэдиэлэ курдук сууттанааччы – норуот дьокутаата Афанасий Максимов сүрэҕэ ыалдьан балыыһаламмытыттан сылтаан, тохтотулла сылдьыбыта.

Бүгүҥҥү суут истиитэ Афанасий Николаевич «сэрэппэккэ эрэ» ыалдьыбытын ырытыыттан саҕаланна. Буруйдуур өрүт: «Суһал көмөнү 11.37 чааска ыҥырбыккын. Оттон суут 10.00 чаастан саҕаланыахтааҕа. Тоҕо эрдэ сэрэппэтиҥ?» -- диэн. Дьокутаат «өйүн сүтэрэ сытар киһи сууту сэрэтэр кыаҕа суох буолар эбит» диэн хардарда. Салгыы Максимовка кэлбит быраас Матаннанова  «арыгы сыттаах этэ, сарсыарда абырахтамматаҕыттан хаанын баттааһына тахсыбыт буолуон сөбүн» быһааран суруйбут суругун өрө-таҥнары туттулар. Максимов онтон улаханнык өһүргэннэ: «Суруналыыстар кэлэн олордохторуна (5 киһи баара – аапт.) соруйан миигин арыгыһыт курдук көрдөрө сатыыгыт, киһи итиригин-өйдөөҕүн экспертизэ эрэ быһаарар кыахтаах, миигин вытрезвительгэ буолбатах, балыыһаҕа илдьибиттэрэ!»  Афанасий Николаевич «буруйдааччылар ханнык быраабынан бырааһы доппуруостаабыттарын уонна быраас идэтин сиэрин кэспитэ тахсыбытын сокуонунан чуолкайдыырга» туруоруста даҕаны, судьуйа хадатаайыстыбаны ылыммата.

Манан диэн эттэххэ, инньэ 2008 сылтан быһа холуобунай дьыалаҕа эриллэ сылдьар киһи ынырыктаахай стресскэ сылдьар буоллаҕа. Онон испит да буоллаҕына киһи баалаабат. Дьокутаат бэйэтэ этэринии «федеральнай сокуон арыгы иһэри бобо илик», биһиги дойдубутугар онтон атыннык сылаа, ньиэрбэ тыҥааһынын устар ньыманы өссө ким да тобулбута көстүбэт.

Игорь Пахомов: «Политическай сакаастаммыт дьыала!» диэн суукка көрдөрүүтүн саҕалаата. «Ленанефтегазстрой» урукку генеральнай дириэктэрин -- Игор Пахомовы биир сыл СИЗОҕа тута сыппыттара. Пахомов: «Сылы быһа силиэстийэлиир-ирдиир үлэ ыытыллыбытаҕа. Арай, өтөр буола-буола, Карелин уонна Арбузов (үстэ) кэлэн «Максимовы утары көрдөрүүтэ биэр, биэрдиҥ да ыытыахпыт» диэн этэллэрэ», -- диир. Пахомов «наадалаах көрдөрүүнү» биэрбэтэҕиттэн буолуо, ол түрүмэҕэ сытан хаһаактар быыпсай атамааннарыттан Юрий Козийтан улаханнык кырбанан, икки сиринэй сыҥааҕа тостон, ойоҕоһо алдьанан, сиһэ-үөһэ доргуйан турардаах. Козий бэйэтэ дьыалаҕа эриллэн ол бириэмэҕэ хаалла сытара. Пахомов кырбаммыта «оронтон охтуу» курдук докумуоннанар. Дьэ, үчүгэй үрдүк орон диэтэҕиҥ. Онтон Козий камераҕа сытан «харан» өлөн хаалар. Хаайыыга киһи харыар диэри тугунан хадаҕалаан аһаталларын билбэтэх көнө.

Игорь Пахомов салайбыт «Ленанефтегазстрой» тэрилтэтэ Талакаантан Витимҥэ диэри ньиэп-гаас турбатын тутар. Дьэ, ол турба «хаачыстыбата суох» тутулунна диэн, кабинет иһиттэн ырааппатах, хаһан да тутууга сылдьыбатах бухгалтеры кытары Поляков тэрилтэ ис дьыалатыгар туттар аакт оҥорор. Ол аакка олоҕуран бастаан Пахомов тутуллубут. Эппиппит курдук сылы быһа СИЗОҕа сытыараллар, ол былаһын тухары «Максимовы утары» көрдөрүү ыла сатаабыттара диэн Пахомов суукка кэпсиир.

«Турба хаачыстыбалаахтык тутуллубута диэн, мин эрэ буолбатах «Ростехнадзор» кытары мэктиэлиир. Тоҕо диэтэххэ, «Ростехнадзор» кыраҕы хонтуруолунан турба ситимэ тардыллыбыта, кини хонтуруолунан турбаны ыраастыыр, боруобалыыр үлэ ыытыллыбыта», -- диир Пахомов.

Айдааннаах 50 мөл. суумалаах 302 диэн сыыппаранан түмүктэнэр №-дээх вексель сырыыта ырытылынна. Пахомов суукка «Якутгазпромтан» 2007 сыл олунньутугар 50 мөл. суумалаах вексель ылбыт. Ол векселин «Якутсктехнопарк» диэн тэрилтэ эмиэ итиччэ суумалаах сыаналаах кумааҕытыгар уларыппыт. Ол оннук уларытарыгар Писарева диэн урут «Яколга» сэкиритээринэн дуу, бухгалтерия отделыгар дуу үлэлээбит дьахтар кэпсэппит. Писарева «Якутсктехнопарк» тэрилтэҕэ үлэлиир этэ диэн Пахомов этэр. Оттон буруйдааччылар уонна эмсэҕэлээччи «Якутгазпром» (билигин «ЯТЭК») интэриэһин суукка көмүскүүр дьон (урукку прокурордар)  Писарева «Якутсктехнопарк» тэрилтэҕэ үлэлээбитин-үлэлээбэтэҕин улаханнык саарбахтыыллар: «Ханнык докумуоҥҥа олоҕуран эн кинини «Якутсктехнопарк» үлэһитэ дии санаабыккыный?» Киһи барыта докумуонунан кэпсэтэ-ипсэтэ, билсиһэ сылдьара бу олоххо кыаллыбат.   Ол гынан баран, сордоох вексель онон-манан эргийэн да буоллар син биир хаһаайыныгар «Якутгазпромҥа» төннүбүт. Онон, дьиҥинэн, ким да эмсэҕэлээбэтэх курдук буолан тахсар. Ол да буоллар, «далбаа оруолун толорор» прокурор кыргыттар үрүт-үөһээ өйдөөбөтөҕө буола-буола ыйытыыларын хатылаан, сууттанааччыны  кыйахаан «бэлэмнээбиттэрин» кэннэ, олуурдаах ыйытыылары, били эмсэҕэлээччини көмүскүүр урукку прокурордар биэрэллэр.

Игорь Пахомов төһө да, кыйахыы, кыыһырда сатаабыттарын иһин, олус тулуурдааҕын, киэҥ көхсүлээҕин көрдөрдө. «Маннык өйдөөбөт буоллаххытына, «тарбахпынан быһаарыам» диэн хата, төттөрүтүн бэйэлэрин кыйахаталыыр түбэлтэлэннэрдэ.

Суут истиитэ хайдах баран иһэрин кэлин да «Aartyk.ru» сырдатыаҕа.

Добавить комментарий

Защитный код
Обновить

Aartyk.ru