Арассыыйа олимпиадатааҕы сүүмэрдэммит хамаандатыгар киирбит сүүрүк кыыспыт - Елена АРЖАКОВА атырдьах ыйын 11 күнүгэр 800 миэтэрэҕэ куоталаһыаҕа. Онон саха ыалдьааччылара ыһыытыырга-хаһыытыырга куоласкытын оҥостон, хараххытын чаҕылыҥнатан бэлэм сылдьыҥ.

800 м, 1500 м сүүрүүгэ Елена АРЖАКОВА быйыл Европа чемпионатыгар бастыҥтан бастыҥ буолан турар. Чемпионат Финляндияҕа Хельсинкигэ ыытыллыбыта. Барнаулга төрөөбүт, Бүлүү Илбэҥэтигэр оҕо сааһа ааспыт кыысчаан аан дойду улуу түһүлгэтигэр бэйэтин кыаҕын толору көрдөрдөр ханнык диэн бары долгуйа кэтэһэбит.

Елена ийэтэ - Наталья Борисовна  Алтайдааҕы тыа хаһаайыстыбатын институтугар үөрэнэ сылдьан Ленаны оҕоломмут. Кыра киһи бороохтуйуор диэри Илбэҥэҕэ эбэтэ Августина Николаевна көрбүт. Августина Николаевна  РФ үөрэҕириитин туйгуна, сиэнин сахалыы ииппит. Елена  билигин даҕаны сахатын тылын умнубакка сылдьар, бэйэтин сахабын диэн ааттанар.

Онтон кыысчаан бастакы кылааска киирэригэр төрөппүттэрин кытары Хайа Алтаайга көһөн барсыбыт. Аҕыс сааһыттан чэпчэки атлетиканан дьарыктанар.